سارسەنبى, 20 قاراشا 2019
الەۋمەت 1998 0 پىكىر 7 ماۋسىم, 2019 ساعات 14:59

قىزىلوردادا اتاۋلى الەۋمەتتىك كومەك تۇراقتى تۇردە بەرىلەدى

قىزىلوردا وبلىسىندا اتاۋلى الەۋمەتتىك كومەك بەرۋ الداعى ۋاقىتتا دا ءوز جالعاسىن تابادى. بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگتە وبلىس اكىمىنىڭ ورىنباسارى قۋانىشبەك ىسقاقوۆ مالىمدەدى، دەپ جازادى اباي-اقپارات.

بيىل اقپان ايىندا وتكەن "نۇر وتان" پارتياسىنىڭ XXVIII سەزىندە ەلباسى نۇرسۇلتان نازارباەۆ ەلدەگى كومەككە مۇقتاج كوپبالالى اتا-انالار مەن از قامتىلعان وتباسىلارعا جاردەماقىنى 30 پايىزعا كوتەرۋدى تاپسىرعان بولاتىن.

ەلباسىنىڭ تاپسىرماسىمەن ەلدەگى كوپ بالالى جانە از قامتىلعان وتباسىلارعا تاعايىندالىپ جاتقان الەۋمەتتىك كومەك حالىقتىڭ قارسى الۋىنا بولەنىپ وتىر، بۇگىنگى تاڭدا جاردەماقى الۋعا قىزىلوردا وبلىسى بويىنشا 40 مىڭنان استام كوپ بالالى، از قامتىلعان وتباسىلار جۇگىنگەن جانە الداعى ۋاقىتتا دا بۇل جۇمىستار جالعاسادى دەيدى وبلىس اكىمىنىڭ ورىنباسارى.

- قازىرگى ۋاقىتتا الەۋمەتتىك جەلىلەردە «قر پرەزيدەنتى سايلاۋىنان كەيىن اتاۋلى الەۋمەتتىك كومەك تولەۋ توقتاتىلادى» دەگەن الىپقاشپا اڭگىمەلەر تاراتىلۋدا. بۇل - جالعان اقپارات، - دەپ اتاپ ءوتتى ق.ىسقاقوۆ.

وبلىس اكىمى ورىنباسارىنىڭ ايتۋىنشا، 1 ساۋىردەن باستاپ وبلىس بويىنشا اتاۋلى الەۋمەتتىك كومەككە 40285 وتباسى جۇگىندى، 19721 وتباسىنان وتىنىشتەر قابىلدانىپ، 20564 جانۇياعا كەڭەستەر بەرىلدى. وبلىس بويىنشا ءساۋىر ايىندا 16193 وتباسىنداعى 79004 ادامعا 2,1 ملرد. تەڭگەگە اتاۋلى الەۋمەتتىك كومەك بەرىلدى. مامىر ايىندا 6755 وتباسىنىڭ ءوتىنىشى قابىلداندى. 4332 جانۇياعا اتاۋلى الەۋمەتتىك كومەك تاعايىندالىپ، ولارعا 189,4 ملن.تەڭگە تولەندى.

- قازىر ماۋسىم ايى ءۇشىن تولەمدەر جۇرگىزىلىپ جاتىر. 20 ماۋسىمعا دەيىن 100 پايىز تولەنەتىن بولادى، - دەدى ايماق باسشىسىنىڭ ورىنباسارى.

ەستەرىڭىزگە سالا كەتەيىك، 2019 جىلدىڭ 5 ساۋىرىندە «مەملەكەتتىك اتاۋلى الەۋمەتتىك كومەك تۋرالى» قازاقستان رەسپۋبليكاسىنىڭ زاڭىنا وزگەرىستەر ەنگىزىلىپ قر پرەزيدەنتىمەن قول قويىلعان.

Abai.kz

0 پىكىر