سەيسەنبى, 19 قاراشا 2019
1611 0 پىكىر 30 ءساۋىر, 2019 ساعات 10:33

قازاقستان حالقى اسسامبلەياسىنىڭ XXVII سەسسياسى ءوتتى

2019 جىلى 29 ءساۋىر كۇنى ەلوردامىز نۇر-سۇلتان قالاسىندا قازاقستان حالقى اسسامبلەياسىنىڭ كەزەكتى XXVII سەسسياسى ءوز جۇمىسىن باستادى. اتالعان ۇيىمنىڭ كەزەكتى وتىرىسى اسسامبلەيا تورعاسى، قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان نازارباەۆتىڭ توراعالىعىمەن ءوتتى، - دەپ حابارلايدى اباي-اقپارات.

قازاقستان حالىقتارىنىڭ تاتۋلىعى مەن بىرلىگىنىڭ الەمدە جوق تەڭدەسسىز ەرەكشە وزىندىك مودەلىن جارىق دۇنيەگە اكەلگەن قازاقستان حالقى اسسامبلەياسىنىڭ بۇل كەزەكتى سەسسياسى دا جۇزدەن اسا ءار ءتۇرلى دياسپورا وكىلدەرىنىڭ باسىن قوسىپ، تالاي اڭگىمەلەردىڭ اعىتىلۋىنا سەبەپ بولدى.  قازاقستان حالقى اسسامبلەياسىنىڭ كەزەكتى XXVII سەسسياسىنا قازاقستاننىڭ ­ بارلىق وڭىرلەرىنەن كەلگەن اسسامبلەيا مۇشەلەرى قاتىستى. ولاردىڭ اراسىندا پارلامەنت دەپۋتاتتارى، جوو رەكتورلارى، زيالى قاۋىم، ار­داگەر، وڭىرلىك ءھام رەسپۋبليكالىق ەتنومادەني بىرلەس­تىك­تەردىڭ توراعالارى، ءتۇرلى ءدىني بىرلەستىكتەردىڭ مۇشەلەرى، ورتالىق اتقا­رۋشى ورگانداردىڭ، ساياسي پارتيالاردىڭ وكىلدەرى، ۇكىمەتتىك ەمەس ۇيىم­داردىڭ باسشىلارى، ت.ب بار.

«بەيبىتشىلىك پەن كەلىسىم فورمۋلاسى: بىرلىك جانە جاڭعىرۋ» اتتى قازاقستان حالقى اسسامبلەياسىنىڭ كەزەكتى XXVII سەسسياسى ادەتتەگىدەي ءانۇراننىڭ شىرقالۋىمەن باستالدى. ءانۇران ايتىلىپ بولعاننان كەيىن قازاقستان رەسپۋبليكاسىنىڭ تۇڭعىش پرەزيدەنتى ەلباسى نۇرسۇلتان نازارباەۆ اسسامبلەيانىڭ توراعاسى رەتىندە جيىنعا قاتىسۋشىلاردى قۇتتىقتادى.

«قازىرگىدەي اۋمالى-توكپەلى زاماندا الەمدە ءبىر عانا قۇندىلىق بار. ول – جالپى قوعامنىڭ بىرلىگى مەن ۇلتارالىق كەلىسىمى»، – دەپ جينالىستى رەسمي اشىپ، العىسوز ارناعان قازاقستان حالقى اسسامبلەياسىنىڭ توراعاسى قاتىسۋشىلارعا قازاقستان حالقى اسسامبلەياسىنىڭ ەلدەگى تۇراقتىلىق پەن بەيبىتشىلىكتى ساقتاۋدا، ۇلتارالىق ىنتىماقتى نىعايتۋ جولىندا كوپ جۇمىس اتقارعانىن ايتتى.

وسى سەسسيانىڭ وزىنە 487 وكىلدىڭ قاتىسىپ وتىرعانىن تىلگە تيەك ەتىپ، اسسامبلەيانىڭ وتكەن تاريحىنا دا توقتالدى.

"بۇگىنگى جەتىستىكتەرىمىز – بەيبىتشىلىك پەن تۇراقتىلىقتىڭ ارقاسى" دەگەن ەلباسى ينگۋش، شەشەن دياسپورالارىنىڭ "ۆايناح" مادەني ورتالىعى تۋرالى جانە وسى دياسپورالاردىڭ تاريحى جونىندە وي قوزعاپ، تاعدىرى مەن تاريحى، تالعامى مەن تانىمى ءبىر ەكى دياسپورانىڭ بەرەكە-بىرلىگىنىڭ مىعىم بولۋىن تىلەدى.

ەلباسىنىڭ باستاماشىلىعىمەن قۇرىلعان «قازاقستان حالقى اسسامبلەياسىن» قازاقستانداعى كوپ ەتنوستاردىڭ بىرلىگىن جاراستىرىپ، ەل حالقىنىڭ ۇزاق جىلدار بويى بەرەكەلى ءومىر سۇرۋىنە ۇيتقى بولىپ وتىرعان تاتۋلىق ورداسى دەپ اتاپ ءجۇرمىز. وسى ءسوزىمىزدىڭ ايقىن دالەلى رەتىندە ايتايىق، بۇگىندە كونستيتۋتسيالىق ورگان دەپ مويىندالاتىن اسسامبلەيانىڭ ەل ومىرىندە الار ءوز ورنى وتە ماڭىزدى.

ەلباسى نۇرسۇلتان نازارباەۆ جيىنالىسقا قاتىسۋشىلاردى سەسسيا جۇمىسىنىڭ باستالۋىمەن قۇتتىقتاي وتىرىپ، بۇگىنگى مىناۋ تىڭ تەحنولوگيالارمەن تولىعىپ، جاڭارىپ بارا جاتقان قوعامنىڭ باستى قۇندىلىعى ەل بىرلىگى مەن ۇلتارالىق تاتۋلىق ەكەنىن ءتۇسىندىردى. ول كىسىنىڭ ايتۋىنشا، بۇىگىنگى تاڭدا الەمدە تەحنولوگيا، ەكونوميكا جانە ادام ءومىرى مۇلدە وزگەردى. سول ءۇشىن عالامداعى وسى وزگەرىستى وڭ باعىتتا قابىلداپ، سوعان ساي ۇيرەنىپ، ۇيلەسۋىمىز كەرەك. بىراق، وسىنداي قۇبىلمالى قوعامدا ءبارىبىر ماڭگىلىك قۇندىلىعىمىز تاتۋلىق پەن بەرەكە-بىرلىكتى ساقتاپ قالۋىمىز كەرەك.

نۇرسۇلتان نازارباەۆ سونىمەن قاتار تاۋەلسىزدىك العان العاشقى جىلدارى كوپتەگەن ادامداردىڭ قازاقستانداعى ەتنوسارالىق قارىم-قاتىناستاردىڭ كەلەشەگىنە كۇمانمەن قاراعانىن ايتتى. الايدا بۇنداي دەسترۋكتيۆتى بولجامداردىڭ ءبارىن ءبىز جوققا شىعارىپ، ۇلتارالىق ىنتىماعى ورنىققان تۇراقتى مەملەكەت قۇرا الدىق. ەلباسىنىڭ ايتۋىنشا، ءتۇرلى تاريحي سىناقتاردىڭ ءبارىن ەڭسەرىپ، بۇگىنگىدەي ەكونوميكاسى قارقىندى دامىپ جاتقان وزىق ەل قۇرا اۋلىمىز ەلدەگى بەرەكە-بىرلىكتىڭ ارقاسى. سونىمەن قاتار ەلدەگى ەتنوسارالىق قارىم-قاتىناستار الىس-جاقىن شەتەلدەرگە ۇلگى بولىپ وتىر. قازاقستانداعىداي ۋاقىت سىناعىنان ءارى تاجىريبەدەن وتكەن تاتۋلىق قاتىناسقا كەز-كەلگەن ەل قىزىعۋشىلىقپەن قارايدى.

وسىلاي دەگەن تۇڭعىش پرەزيدەنت قازاقستانداعى تۇراقتىلىقتى ساقتاۋدىڭ ماڭىزدى ەكەنىن ايتتى. سەسسيا بارىسىندا ەلباسى ەلدەگى وسىنداي ۇيىعان تىنىشتىق پەن تۇراقتىلىقتى ساقتاۋ ءۇشىن مەملەكەت بارلىق سالادا بۇگىنگىدەي ءتيىمدى جۇمىستاردى ۇزدىكسىز جالعاستىرۋ كەرەك دەپ اتاپ ءوتتى.

قازاقستاننىڭ تۇڭعىش پرەزيدەنتى نۇرسۇلتان ءابىشۇلى نازارباەۆ مەملەكەتتىك ورگاندار جانىنداعى مەدياتسيا ينستيتۋتى مەن قوعامدىق كەڭەستەردىڭ جۇمىسىن جانداندىرۋ قاجەتتىگىن دە ايتتى. سونىمەن قاتار، ەلباسى اسسامبلەيا كاسىپكەرلەرىنىڭ قاۋىمداستىعى ارقىلى شەتەلدىك ينۆەستورلارمەن ەكونوميكالىق ىنتىماقتاستىقتى نىعايتۋعا جانە قازاقستان حالقى اسسامبلەياسىنىڭ دەپۋتاتتىق كورپۋسىنىڭ الەۋەتىن بەلسەندى پايدالانۋعا شاقىردى.

سونىمەن قاتار، ەلباسى نۇرسۇلتان نازارباەۆ قازاقستان حالقى اسسامبلەياسىنىڭ ەلدەگى تۇراقتىلىق پەن تاتۋلىقتا ساقتاۋدان بولەك ەل ەكونوميكاسىنىڭ وسۋىنە دە زور ۇلەس قوساتىنىن ايتتى. اسسامبلەيا سىندى قوعامدىق ۇيىمدار مەن مەملەكەتتىك ورگانداردىڭ جانە قوعامدىق كەڭەستەردىڭ جۇمىسىن بارىنشا جانداندىردى تاپسىردى. اسسامبلەيا كاسىپكەرلەرىنىڭ قاۋىمداستىعى ارقىلى شەتەلدەن ينۆەستورلار تارتىپ، ەلدەگى ەكونوميكالىق ىنتىماقتاستىقتى بەكەمدەۋ ءۇشىن دە پايدالانۋ كەرەك ەكەنىن ايتتى. سونداي-اق، قازاقستان حالقى اسسامبلەياسىنىڭ دەپۋتاتتىق كورپۋسىنىڭ دا جۇمىسىن جوعارى باعالادى. كونستيتۋتسيالىق ورگان سانالاتىن اسسامبلەيادان ەل پارلامەنتىنە دەپۋتاتتار سايلانىپ جۇرگەنىن ءبارىمىز بىلەمىز. انىقىراق ايتقاندا، 2016 جىلعى پارلامەنت سايلاۋىنىڭ ناتيجەسى بويىنشا، اسسامبلەياعا ماجىلىستەن توعىز ماندات بەرىلگەن بولاتىن.

ءسوز سوڭىندا نۇرسۇلتان نازارباەۆ مۇسىلمان قاۋىمىن رامازان ايىمەن، ال پراۆوسلاۆ حريستيان وكىلدەرىن پاسحا مەرەكەسىمەن قۇتتىقتادى. سونىمەن قاتار، 9 ماۋسىمعا بەلگىلەنگەن سايلاۋعا بايلانىستى دا پىكىر ءبىلدىردى. كەزەكتەن تىس سايلاۋعا «Nur Otan» پارتياسىنىڭ اتىنان تۇسكەلى وتىرعان قاسىم-جومارت كەمەلۇلى توقاەۆ اسا تاجىريبەلى مەملەكەت قايراتكەرى. ءارى مەملەكەتكە باسشىلىق ەتۋگە ابدەن لايىق تۇلعا ەكەنىن ايتتى. ءارى بارشا قازاقستاندىقتاردان سايلاۋعا بەلسەنە قاتىسىپ، ەل بىرلىگىن ايگىلەۋدى سۇرادى.

نۇرسۇلتان ءابىشۇلى نازارباەۆ, قازاقستان رەسپۋبليكاسىنىڭ تۇڭعىش پرەزيدەنتى، ەلباسى:

– بۇكىل قازاقستان حالقىنا، سونداي-اق سونىڭ ىشىندە قازاقستان حالقى اسسامبلەياسىنىڭ بۇكىل مۇشەلەرىنە بىزگە قولداۋ كورسەتكەنى جانە بارلىق ماسەلەدە تۇسىنىستىك تانىتقانى ءۇشىن زور ريزاشىلىعىمدى بىلدىرە كەتكىم كەلەدى. الداعى 9 ماۋسىم كۇنى ەلىمىزدە پرەزيدەنت سايلاۋى بولادى. جاقىندا عانا وتكەن پارتيامىزدىڭ كەزەكتەن تىس ءحىح سەزىندە «Nur Otan» پارتياسىنىڭ توراعاسى رەتىندە قاسىم-جومارت كەمەلۇلى توقاەۆتىڭ كانديداتۋراسى پرەزيدەنتتىككە ۇسىندىم. توقاەۆ ىسىلعان، وتە تاجىريبەلى مەملەكەت قايراتكەرى. مەنىڭ ويىمشا بۇگىندە قازاقستانعا باسشىلىق ەتۋگە ابدەن لايىق بىردەن ءبىر تۇلعا. ول - ەلىمىزدىڭ ناعىز پاتريوتى. مەن بۇكىل قازاقستاندىقتاردى، اسسامبلەيانىڭ مۇشەلەرىن الداعى 9 ماۋسىمدا وتەتىن سايلاۋعا بەلسەندى قاتىسىپ، اۋىزبىرشىلگىمىزدى كورسەتۋگە شاقىرعىم كەلەدى. بارشا قازاقستاندىق ازاماتتاردىڭ اسپاندارى اشىق بولسىن!

ەلباسىدان كەيىن ءسوز سويلەپ، ورتاعا شىققانداردىڭ ءبارى دە قازاقستان ساياساتىنىڭ دۇرىس جولدا دامىپ كەلە جاتقانىن ايتتى. ءوز سالاسىنىڭ وزىق ازاماتتارى اتانعان ولار قازاقستانداعى بارلىق دياسپورالار قازاقستان رەسپۋبليكاسىنىڭ تۇڭعىش پرەزيدەنتى ەلباسى نۇرسۇلتان نازارباەۆقا قارىزدار ەكەنىن تىلگە تيەك ەتتى.

قازاقستان حالقى اسسامبلەياسىنىڭ كەزەكتى XXVII سەسسياسىسىندا ءسوز سويلەگەندەردىڭ بارلىعى دا ءوز سالاسىنىڭ "سەن تۇر، مەن اتايىندارى".  ەلدەن وزا شاۋىپ، ەڭبەك ەتىپ، تاۋەلسىز قازاق ەلىن دامىتۋ ءۇشىن تەر توگىپ جۇرگەن ازاماتتار. مىسالى، دجامالايل ەليمحانوۆ شەشەنستاندا تۋعان. شەشەن ەلىندە دۇربەلەڭ باستالىپ، سوعىس وتى تۇتانعاندا ەكى جاسار بالا بولعان ەدى. سول سوعىستا اعاسى شەيىت كەتىپ، ءوز جانارىنان ايرىلىپ قالعان.  دجامالايلدىڭ وتباسى وسىدان كەيىن تۋعان جەرىن تاستاپ، بوسىپ كەتۋگە ءماجبۇر بولدى. وسىنداي قيىن-قىستاۋ زاماندا قازاق ەلى ولارعا پانا بولدى. قازاقستانعا قونىس اۋدارعاننان كەيىن ەسكى جارانىڭ بەتى جازىلىپ، ولار ەل قاتارىنا قوسىلدى. بۇگىندە بەس ءتىلدى ەركىن مەڭگەرگەن دجامالايل ەليمحانوۆ وسىلاردى ايتا كەلىپ: «قازاقتىڭ جەرى مەنى تاربيەلەدى، قازاق جەرىنىڭ قاسيەتتى دەرتىمنەن قۇلان-تازا ايىعۋىما سەپتەستى. قازاق جەرى دەنساۋلىعىمدى جاقسارتىپ، ءومىر سۇرۋگە دەگەن قۇشتارلىعىمدى وياتتى»، – دەدى.

دجامالايل ەليمحانوۆتىڭ وسىنداي ايانىشتى ءھام جۇرەكجاردى پىكىرىنەن كەيىن تۇركيالىق ساياساتتانۋشى كيۋرشات زورلۋنىڭ ايتقاندارى دا سەسسيا قاتىسۋشىلارىن سەرپىلتىپ تاستادى.

تۇركيالىق ساياساتتانۋشى كيۋرشات زورلۋ كوپ جىلدان بەرى قازاقستاننىڭ تۇڭعىش پرەزيدەنتى - ەلباسى نۇرسۇلتان ءابىشۇلى نازارباەۆتىڭ ءومىر جولىن، ۇشان-تەڭىز ەڭبەكتەرىن زەرتتەپ كەلەدى ەكەن. ول تۇركى حالقىنىڭ ەلباسىداي ايتۋلى تۇلعاسىن 20 جىلدان بەرى زەرتتەپ كەلە جاتقانىن ايتا كەلىپ: "بۇكىل تۇركى حالىقتارى تۇركيا مەن رەسەي اراسىنداعى تۇيىتكىلدى ماسەلەنى وڭتايلى شەشكەنى ءۇشىن ەلباسىعا قارىزدار" دەدى. وسى ءبىر اسا ماڭىزدى ساياسي شيەلەنىستىڭ شەشىلۋىنە ايرىقشا ۇلەس قوسقانى ءۇشىن ەلباسىنا ءوزى دە اسا ريزا ەكەنىن ايتتى.

كيۋرشات زورلۋ، تۇركيالىق ساياساتتانۋشى:

- قۇرمەتتى، نۇرسۇلتان ءابىشۇلى! ءسىزدىڭ پرەزيدەنتتىك وكىلەتتىگىڭىزدى ءوز ەركىڭىزبەن ۋاقىتىنان بۇرىن توقتاتۋ تۋرالى باتىل شەشىمىڭىزدى كۇللى تۇركياداعى ميلليونداعان حالىق كوردى. بۇل حاباردى ەستىگەن جۇرتشىلىق راسىن ايتقاندا ءوز وكىنىشتەرىن ايتىسىپ جاتتى. ءسىزدىڭ وكىلەتتىگىڭىزدى قىسقارتۋ تۋرالى مالىمدەمەڭىز بۇكىل الەۋمەتتىك جەلىدە قىزۋ تالقىعا ءتۇستى. ەڭ قىزىعى سول الەۋمەتتىك جەلىدەگى بەلسەندى جاستاردىڭ كوپشىلىگى قازاقستانعا كەلىپ، سىزدەن وكىلەتتىكتەن باس تارتپاۋىڭىزدى سۇراماق تا بولدى. بۇل ولاردىڭ سىزگە دەگەن ىقىلاسى ەدى. وسى مالىمدەمەدەن باس تارتۋىڭىزدى وتىنگىسى كەلەتىن جاستار سىزگە عانا سەنەدى. دەسە دە، ءسىزدىڭ قازاق ۇلتىنىڭ تاعدىرى ءۇشىن دەر كەزىندە پرەزيدەنتتىك وكىلەتتىكتەن باس تارتقان ساليقالى شەشىمىڭىز الەمدەگى كوشباسشىلاردىڭ تاريحىندا التىن ارىپتەرمەن زەرلەنىپ، قاشالاتىنى انىق. ءدال ءسىز سەكىلدى قادامعا تەك ەلىن ويلاعان ناعىش كوشباسشى عانا بارا الادى. بۇل ناعىز ليدەردىڭ عانا قولىنان كەلەتىن ۇلكەن ءىس. 

قازاقستان حالقى اسسامبلەياسىنىڭ كەزەكتى XXVII سەسسياسىندا ەۆگەني دەميدەنكو اتتى ون جەتى جاستاعى ءجاسوسپىرىم بۇكىل قازاق ەلىنەن ءسۇيىنشى سۇرادى.

ۇلتى بەلارۋس ەۆگەني دەميدەنكو رەسەي فەدەراتسياسىنىڭ استاناسى ماسكەۋدە وتكەن حالىقارالىق وليمپيادادا توپ جارىپ، التىن اكەلىپتى. قازاق جەرىندە تۋىپ-وسكەن جاس جىگىتتىڭ بۇل كوپ جەڭىسىنىڭ ءبىر بولىگى عانا. ەۆگەني دەميدەنكو قازىر ۇشاق قۇراستىرۋ ىسىمەن قاتار انيماتسيا، بيولوگيا،  ساۋدا لوگيستيكاسى سەكىلدى بىرنەشە سالادا ەڭبەك ەتىپ، تالاي اسۋلاردى باعىندىرىپ جۇرگەنىن تىلگە تيەك ەتتى.

ول ءوز سوزىندە ەڭبەگىن «بوينگ» كومپانياسى ساتىپ العانىن دا ايتتى.

- راس، مەنىڭ ارنايى ءبىلىمىم جوق. سوعان قاراماستان وتكەن جىلى «بوينگ 757» ۇشاعى نەگىزىندە جاڭا ۇشاق جابدىقتاپ شىقتىم. بۇل جوبا بويىنشا ۇشاق ديزاينەرلىك تۇرعىدا بارىنشا جەتىلدىرىلدى. وسى ەڭبەگىمدى «بوينگ» كومپانياسى جوعارى باعالاپ، جوبامدى ساتىپ الدى. ەندى وسى جاساعان جۇمىسىمدى ۇلىبريتانياداعى اەروعارىش ۋنيۆەرسيتەتى وندىرىسكە ەنگىزۋ ءۇشىن جۇمىس جاساپ جاتىر. اتالعان ۋنيۆەرسيتەت جان-جاقتى زەرتتەۋ جۇرگىزىپ، بۇل جوبانى وندىرىسكە ەنگىزەرىنە سەنىمىم كامىل. مەن بۇگىنگى تاڭدا «I Learn» ءموبيلدى قوسىمشاسىن جاساپ جاتىرمىن. ياعني، بارشاعا تۇسىنىكتى تىلمەن ايتسام، «I Learn» ءموبيلدى قوسىمشاسى YouTube جەلىسىنىڭ جاڭا جەتىلگەن بالاماسى بولادى. وسى جوبام ارقىلى«Google scinse fair» وليمپياداسىندا ەكىنشى ورىندى جەڭىپ الدىم. 25 مىڭ تالاپكەر قاتىسقان وسى جارىستا ەكىنشى ورىن الۋ مەن ءۇشىن از جەتىستىك ەمەس دەپ ويلايمىن.

سەسسيا جۇمىسىن جان-جاقتى قورىتىندىلاعان ەلباسى نۇرسۇلتان ءابىشۇلى نازارباەۆ اسساملەيانىڭ جۇمىسىن جوعارى باعالادى. تاۋەلسىزدىكتىڭ العاشقى جىلدارىندا قۇرىلىپ، سودان بەرى ەلدىڭ ىنتىماعىن ارتىرۋ باعىتىندا تالماي ەڭبەك ەتىپ كەلە جاتقان بۇل جۇمىس بولاشاقتا دا ءوز جالعاسىن تابۋعا ءتيىس ەكەنىن دە ايتتى. تاۋەلسىزدىك جىلدارىندا قالىپتاسقان وسى ءبىر مادەنيەتتى كەلەر ۇرپاققا تابىستاۋدىڭ ماڭىزدى ەكەنىن دە باسا ايتىپ، "تورتەۋ تۇگەل بولسا، توبەدەگى كەلەدى" دەگەن حالىق دانالىعىن ەل ەسىنە سالدى.

سونىمەن قاتار، قازاقستان حالقى اسسامبلەياسىنىڭ كەزەكتى XXVII سەسسياسى اياسىندا قحا توراعاسىنىڭ جاڭا ورىنباسارلارى تاعايىندالدى. ەندى بۇل لاۋازىمدى قىزمەتتى يۋسۋپ كەليگوۆ جانە شەرزود پۋلاتوۆ اتقاراتىن بولادى.

ءتۇيىن

قازاقستان حالقى اسسامبلەياسى 1995 جىلعى ءبىرىنشى ناۋرىزدا قازاقستان رەسپۋبليكاسىنىڭ تۇڭعىش پرەزيدەنتىنىڭ جارلىعىمەن قۇرىلعان. سودان بەرى بۇل ۇيىم 24 جىل بويى مەملەكەتىمىزدەگى ىنتىماق پەن بىرلىكتىڭ باستى ۇيىتقىسى بولىپ كەلەدى. قازىر قازاقستانداعى تۇراقتىلىق پەن تاتۋلىقتىڭ باستى كەپىلى بولىپ سانالاتىن وسى ۇيىمنىڭ جۇمىسىن الداعى ۋاقىتتا جاڭا توراعا ورىنباسارلارى جانداندىرا تۇسەدى دەپ سەنەمىز. ارقاشان دا ەڭ وزەكتى ەلدىك ىستەردىڭ باستاماشىسى بولىپ جۇرەتىن قازاقستان حالقى اسسامبلەياسىنىڭ جۇمىسىن يۋسۋپ كەليگوۆ پەن شەرزود پۋلاتوۆ ورگە سۇيرەسىن دەپ تىلەيىك.

Abai.kz

0 پىكىر