ارگەنتينا استاناسى بۋەنوس-ايرەستە ءوتىپ جاتقان جاسوسپىرىمدەر اراسىنداعى وليمپيادا ويىندارىندا قۇراما قورجىنىنا ءتورتىنشى التىن مەدال ءتۇستى.

قازاقستاندىقتاردىڭ وڭ جامباسىنا كەلەتىن سپورت ءتۇرى بوكستان العاشقى التىن جۇلدەنى 91 كەلىگە دەيىنگى سالماق دارەجەسىندە ونەر كورسەتەتىن ايبەك ورالباي جەڭىپ الدى. ايبەك اقتىق سىندا الجيرلىك موحاممەد امين ءحاسيدتى 5:0 ەسەبىمەن ەش قيىندىقسىز جەڭدى.

بۇل ايبەك ورالبايدىڭ عالامدىق ءىرى دودالاردا قول جەتكىزگەن ءبىرىنشى جۇلدەسى ەمەس. 18 جاستاعى بوكسشى بۇعان دەيىن ازيا چەمپيوناتىندا التىن، الەم بىرىنشىلىگىندە كۇمىس مەدال العان بولاتىن.

كەشە بوكس ءتۋرنيرىنىڭ كەشكى سەسسياسىندا مەدال ءۇشىن كەزدەسۋ وتكىزگەن تاعى ءبىر سپورتشىمىز نادەجدا ريابەتس 69-75 كەلىدە قولا جۇلدەگەر اتاندى. بوكسشى قىز ءۇشىنشى ورىن ءۇشىن وتكەن كەزدەسۋدە الجيرلىك يچراك ءچايبتى 5:0 ەسەبىمەن جەڭدى.

بۇعان دەيىن 91 كەلىدەن جوعارى سالماقتا ونەر كورسەتەتىن دامير تويبايدىڭ فينالدا رەسەيلىك بوكسشى الەكسەي درونوۆقا ەسە جىبەرىپ،  جاسوسپىرىمدەر وليمپياداسىنىڭ كۇمىس جۇلدەگەرى اتانعانىن جازعان ەدىك.

ءبىزدىڭ بوكسشىلارىمىزدىڭ بۋەنوس-ايرەس تورىندە تاعى ءبىر التىن مەدال الۋعا مۇمكىندىگى بار. بۇگىن شارشى الاڭعا 64 كەلىدە جۇدىرىقتاساتىن تالعات شايكەن شىعادى. ونىڭ قارسىلاسى رەسەيلىك يليا پوپوۆ دەگەن سپورتشى.

6 قازاندا جالاۋىن جەلبىرەتكەن جاسوسپىرىمدەر اراسىنداعى III جازعى وليمپيادا ويىندارى 18 قازاندا مارەسىنە جەتەدى. ءىرى سپورتتىق شاراعا 206 ەلدەن 4 مىڭعا جۋىق سپورتشى قاتىسىپ جاتىر. ءدۇبىرلى دودادا قازاقستان نامىسىن 57 سپورتشى قورعاۋدا.

ايتا كەتەيىك، وسىعان دەيىن جاسوسپىرىمدەر اراسىنداعى جازعى وليمپيادا ويىندارى العاش رەت 2010 جىلى سينگاپۋردە، كەيىن 2014 جىلى قىتايدىڭ نانكين قالاسىندا وتكەن بولاتىن. ءتورت جىلدا ءبىر رەت ءوتىپ تۇراتىن بايراقتى باسەكەگە 14-18 جاس ارالىعىنداعى سپورتشىلار-يۋنيورلار عانا قاتىسادى.

قۋانىش قاپپاس

Abai.kz