جۇما, 24 قاڭتار 2020
1380 0 پىكىر 31 تامىز, 2018 ساعات 11:00

الماتى اكىمى قالانىڭ جاياۋ جۇرگىنشى جانە كولىك ينفراقۇرىلىمىن رەكونسترۋكتسيالاۋ قارقىنىن جەدەلدەتۋدى تاپسىردى

الماتى اكىمى باۋىرجان بايبەك قالانىڭ جاياۋ جۇرگىنشى جانە كولىك ينفراقۇرىلىمىن رەكونسترۋكتسيالاۋ قارقىنىن جەدەلدەتۋدى تاپسىردى، - دەپ حابارلايدى اباي-اقپارات الماتى اكىمىنىڭ سايتىنا سىلتەمە جاساپ.

جۇمىس ساپارى كەزىندە مەگاپوليس باسشىسى اباي الاڭىن قايتا جاڭعىرتۋ مەن تيميريازەۆ كوشەسىندەگى BRT جەلىسىن سالىپ جاتقان مەردىگەرلىك ۇيىمداردىڭ جۇمىس قارقىنىنىڭ تومەندىگى مەن ساپاسىزدىعىن اتاپ كورسەتتى.

جۇمىس ساپارى بارىسىندا ول قالانىڭ قۇرىلىس باسقارماسىنا ون كۇن ىشىندە رەسپۋبليكا سارايىنىڭ الدىنداعى اباي الاڭىنا كەسپە تاستار توسەۋدە كەتكەن ولقىلىقتاردى قالىپنا كەلتىرۋدى تاپسىردى. بۇدان وزگە، قالانىڭ بارلىق قۇرىلىس الاڭدارىندا جۇرگىزىلىپ جاتقان جۇمىستارعا ءتيىستى باقىلاۋدى كۇشەيتۋ قاجەتتىگىن ەسكەرتتى.

«قازىرگى كەزدە قالانىڭ تەك تاريحي ورتالىعىن رەكونسترۋكتسيالاۋ ءۇشىن ءۇش مىڭعا جۋىق جۇمىس ورنى قۇرىلدى، بارىنشا اۋقىمدى جۇمىستار اتقارىلدى. ارينە، ۋاقىت بارىنشا تىعىز، دەگەنمەن رەسپۋبليكا سارايى الدىنا توسەلگەندەي ساپاسىز جۇمىستىڭ قاجەتى جوق. بارلىعىن قايتا توسەڭدەر»- دەدى باۋىرجان بايبەك.

ايتا كەتەرلىگى، بۇرىندارى ساپاسىز جۇمىستارى ءۇشىن بىرنەشە مەردىگەرلەرگە ايىپپۇل سالىنعان ەدى. قالا اكىمدىگىنىڭ كوميسسياسى كوشەلەردى اباتتاندىرۋ بويىنشا قۇرىلىس جۇمىستارىنىڭ بارىسىن تەكسەرىپ، مەردىگەرلىك ۇيىمدار اتىنا قاتاڭ ەسكەرتپەلەر جاساعان بولاتىن.

قالا داڭعىلدارىن رەكونسترۋكتسيالاۋعا قاتىسقان مەردىگەرلىك ۇيىمدار باسشىلارى مەگاپوليس اكىمىمەن كوشپەلى كەڭەس كەزىندە ايدىڭ اياعىنا دەيىن بارلىق جۇمىستاردىڭ ۋاقتىلى ءارى ساپالى جۇرگىزىلەتىنى تۋرالى ۋادە بەرگەن ەدى.

«اباي الاڭىندا ءبىز ءۇش كەزەكپەن، ءتىپتى تۇندە دە جۇمىس جاسادىق. قارا جۇمىستاردىڭ ءبارىن اياقتادىق. رەسپۋبليكا سارايىندا ءتۇرلى شارالار ءجيى وتەدى، سوندىقتان ءبىز تەحنيكانى تەز الىپ كەتىپ، ورىندى بوساتۋعا، بارلىق جەردى تازارتىپ، قوقىستى شىعارۋعا تىرىستىق. اسىققانىمىزدى مويىندايمىن، سونىڭ سالدارىنان كەسپە تاستار تەگىس توسەلمەي قالدى. ءبىز ەندى قالا تۇرعىندارىنا كەدەرگى كەلتىرمەي، كەسپە تاستاردى دۇرىستاپ قالاپ شىعامىز. جاقىن ارادا فونتاندار ىسكە قوسىلادى، سونىڭ ىشىندە قۇرعاق سۋبۇرقاقتار دا. انىقتالعان بارلىق كەمشىلىكتەردى جويىپ، كەپىلدىك اياسىندا جۇمىس جاسايمىز»، - دەدى «تريا حولدينگ» كومپانياسىنىڭ ديرەكتورى ميحايل چيكاەۆ.

قالا داڭعىلدارىن رەكونسترۋكتسيالاۋ كەزىندە جاياۋ جۇرگىنشى ايماعىن كەڭەيتۋ، كولەڭكەلى كەڭىستىكتى قالىپتاستىرۋ ءۇشىن جاسىل جەلەك وتىرعىزۋ، جاڭا سۋبۇرقاقتار سالۋ قاراستىرىلعان. كەسپە تاستار توسلەۋدە، جارىق دىڭگەكتەرى، سۋارۋ جۇيەسى اۋىستىرىلۋدا، نىسانداردىڭ كىرە بەرىستەرى مەن سىرتى جاڭارۋدا.

الماتى قالاسى قۇرىلىس باسقارماسىنىڭ باسشىسى نۇربول نۇرساعاتوۆ ۆەدومستۆودان تىس قۇرىلىس ساراپتاماسىنىڭ، كوميسسيالار ساپارلارىنىڭ قورىتىندىسى جانە قوعامدىق پىكىر بويىنشا مەردىگەرلىك ۇيىمداردى تاڭداۋدىڭ مەملەكەتتىك ساتىپ الۋ پروتسەدۋرالارىن ازايتۋ مەن وتاندىق قۇرىلىس ماتەريالدارىن پايدالانۋ ارقاسىندا قارجىنىڭ باستاپقى جوبادان 40%-عا ۇنەمدەلگەنىن ايتتى.

ول بارلىق مەردىگەرلىك ۇيىمداردىڭ ەكى جىلعا جۇمىس ساپاسى بويىنشا كەپىلدى مىندەتتەمە قابىلداعاندىقتارىن جەتكىزدى. مىسالى، وتكەن جىلى جىبەك جولى كوشەسىندە جاڭعىرتۋ جۇمىستارىن جۇرگىزگەن «اتريكس-ستروي» جشس ءوز قارجىسى ەسەبىنەن جىبەرىلگەن كەمشىلىكتەردى قالپىنا كەلتىرۋدە.

بيىلعى جىلى قالا داڭعىلدارىن رەكونسترۋكتسيالاۋ جونىندەگى كونكۋرسقا ءار ۋچاسكە بويىنشا 6 - دان 8 كومپانياعا دەيىن ۇمىتكەر بولدى. مەردىگەرلىك ۇيىمدار وتاندىق وندىرۋشىلەر اراسىنان قۇرىلىس ماتەريالدارىن جەتكىزۋشىلەردى وزدەرى تاڭدادى. قۇرىلىس كەزىندە ءونىمنىڭ ءار پارتياسىنان ساراپتاما ءۇشىن ۇلگى الىنىپ، ونىڭ قۇرامى زەرتتەلدى.

«ارينە، وتاندىق ماتەريالداردىڭ ساپاسى جوعارى دەڭگەيدە دەپ ايتا المايمىز، بىراق سۇرانىستىڭ جىل سايىن ارتۋى بارىسىندا جاقسارادى دەگەن سەنىمدەمىز. نەگىزگى ماسسا نمەسە گرانيتتى ونىمدەر مەن تروۋتار پليتكالارىنىڭ 92%-ى جامبىل وبلىسىنىڭ «كازاحگرانيت»، الماتىنىڭ «كونكريت»، «ادەمي كالا»، «يۋفورم»، قوستاناي وبلىسىنىڭ «كوستاناي مبي»، جامبىل وبلىسىنىڭ «كازاحماينينگ»، الماتى وبلىسىنىڭ «ەزمير» سياقتى كاسىپورىندارىنان الىندى، بۇلاردىڭ بارلىعىندا ساپا سەرتيفيكاتتارى بار. كاىپورىنداردىڭ بارلىق ونىمدەرى ساتىپ الىندى، قالعان ءونىمنىڭ 8%-ى شەتەلدىك وندىرۋشىلەردىكى. قازىرگى كەزدە نەگىزگى قۇرىلىس جۇمىستارىنىڭ بارلىعى اياقتالىپ قالدى، قازان ايىندا اعاش وتىرعىزۋدى باستايمىز»، - دەدى نۇربول نۇرساعاتوۆ.

جۇمىس ساپارى كەزنىدە الماتى اكىمى تيميريازەۆ كوشەسىندەگى BRT جەلىسىنىڭ قۇرىلىس قارقىنىن تەكسەرىپ، «داۋلەت دورستروي» جشس مەردىگەرلىك ۇيىمىنىڭ جۇمىسىن سىنعا الدى.

«قارجى دەر كەزىندە ءبولىندى، سوعان قاراماستان جۇمىس كەستەدەن قالىس قالۋدا. جۇمىس اۋقىمى ۇلكەن، ونى يگەرە الماي كەلەسىڭدەر. تەك ءبىزدىڭ كۇن سايىنعى تەكسەرۋىمىز بەن قوعامنىڭ سىنىنان كەيىن عانا قوسىمشا كۇش تارتىلىپ وتىر. ءبىرىنشى قىركۇيەككە دەيىن قوزعالىس بولىگى اشىلۋى ءتيىس»، - دەدى باۋىرجان بايبەك.

BRT العاشقى فازاسى باعىتىنىڭ ۇزىندىعى 8,7 كم، مۋستافين – سۇلەيمەنوۆ – جاندوسوۆ – تيميريازەۆ كوشەلەرىنەن جەلتوقسان كوشەسىنە دەيىن بارادى. مۋستافين، رىسقۋلبەكوۆ جانە سۇلەيمەنوۆ كوشەلەرىندەگى ۋچاسكەلەردى جاڭعىرتۋ جۇمىستارى اياقتالىپ قالدى. وسىنداي قۇرىلىس جۇمىستارى جاندوسوۆ جانە ي تيميريازەۆ كوشەلەرىندە جالعاسۋدا.

Abai.kz
0 پىكىر