وبلىس اكىمدىگىندەگى قىزمەتكەردىڭ 11 مامىردا حابارلاۋىنشا، ءماجبۇرلى تۇردە وتكىزىلگەن سەنبىلىككە كەدەنشىلەر، سالىقشىلار جانە باسقا دا بيۋدجەت مەكەمەلەرىنىڭ قىزمەتكەرلەرى وبلىس باسشىسى شۋحرات گانيەۆتىڭ جارلىعىمەن شىققان. فەرعانا وبلىسى بويىنشا كەدەن كوميتەتى باسقارماسىنىڭ ءبىر باسشىسى قاراماعىنداعى قىزمەتكەرلەردىڭ سەنبىلىككە شىعارعانىن راستادى.

ءوز ەسىمىنىڭ اتالماعانىن قالاعان كەدەنشى ورگاندا قىزمەت ەتە ءجۇرىپ كوشە سىپىرعانىنا ارلانعانىن ايتتى.

"باسقارما باسشىسى ازيموۆتىڭ نۇسقاۋىمەن ءبىز ارىق تازالايمىز، كوشە سىپىرامىز، اعاش اكتەيمىز. ءبىر قىزىعى، بىرەۋ-مىرەۋ سۇراي قالسا، ءبىز ماحاللانىڭ ەرىكتى بەلسەندىلەرى رەتىندە تانىستىرۋىمىز كەرەك بولدى. فورمامىزدى شەشىپ، سەنبىلىككە ءۇي كيىمىن كيىپ كەلۋدى تاپسىردى", - دەدى باسقارما قىزمەتكەرى.

"فەرعانا باسشىسى شۋحرات گانيەۆ 9 مامىردا وبلىس اكىمدىگى عيماراتىندا ۇلكەن جينالىس وتكىزدى. ول فەرعانا وبلىسىنا پرەزيدەنتتىڭ كەلۋى قارساڭىندا ءاربىر جەردى تازالاۋدى تاپسىردى. ول ءاربىر باسشىعا، سونىڭ ىشىندە كەدەن ورگانىنا دا تازالانۋى قاجەتتى جەردى ءبولىپ بەردى. ول جەرلەر دۇرىس تازالانباعان جاعدايدا، وبلىس باسشىسى مەكەمە باستىقتارىن جۇمىستان شىعارام دەپ قورقىتقان", - دەدى وبلىس اكىمشىلىگىنىڭ وكىلى.

ايتا كەتەرلىك جايت، فەرعانا وبلىسىندا بيۋدجەت قىزمەتكەرلەرى ءماجبۇرلى تۇردە سەنبىلىككە شىققان كۇنى وزبەك ۇكىمەتى ءماجبۇرلى ەڭبەكپەن كۇرەسۋ تۋرالى قاۋلى قابىلداعان.

ۇكىمەت قۇجاتىندا مەملەكەتتىك قىزمەتكەرلەردى كوشە تازالاۋ نەمەسە ماقتا تەرۋ سەكىلدى جۇمىستارعا ءماجبۇرلى تۇردە شىعارۋعا بولمايتىنى تۋرالى ايتىلعان. قاۋلىدا مەملەكەتتىك ورگانداردان، سونىڭ ىشىندە باس پروكۋراتۋرا مەن ەڭبەك مينيسترلىگىنەن مۇنداي ءۇردىستى دوعارۋ ءۇشىن قاجەتتى شارا قولدانۋ تالاپ ەتىلگەن.

Abai.kz