سەيسەنبى, 22 قازان 2019
1841 1 پىكىر 30 ءساۋىر, 2018 ساعات 11:28

ەلشىلىك "قازاقستاندا اقش اسكەري بازاسى اشىلادى" دەگەن مالىمەتتى تەرىستەدى

قازاقستاننىڭ رەسەيدەگى ەلشىلىگى ماڭعىستاۋ وبلىسىنداعى اقتاۋ جانە قۇرىق پورتتارىندا "اقش اسكەري بازاسى قۇرىلادى" دەگەن اقپاراتتى جوققا شىعاردى.

"رەسەيدىڭ اقپارات قۇرالدارى مەن ينتەرنەت رەسۋرستارىنداعى مۇنداي اقپاراتتاردى نەگىزسىز، ويدان شىعارىلعان جالعان حابار دەپ ساناۋدى سۇرايمىز" دەلىنگەن ەلشىلىك مالىمدەمەسىندە.

ەلشىلىك سوڭعى كۇندەرى رەسەيدىڭ اقپارات قۇرالدارىندا جاريالانعان "اقش اسكەري-تەڭىز كۇشتەرى قازاقستاننىڭ كاسپي تەڭىزىندەگى پورتتارىن پايدالانادى جانە قازاقستان اۋماعىندا اسكەري بازا سالادى" دەگەن اقپاراتتىڭ شىندىققا ساي كەلمەيتىنىن مالىمدەدى.

پارلامەن وتكەن اپتادا اۋعانستاندا تۇراقتىلىق ورناتۋ جانە قالپىنا كەلتىرۋگە قاتىستى قازاقستان مەن اقش ۇكىمەتتەرى اراسىنداعى قازاقستان اۋماعىنداعى تەمىرجول ارقىلى كوممەرتسيالىق جۇك تاسىمالداۋ تۋرالى كەلىسىمگە وزگەرىستەر ەنگىزۋ جونىندەگى حاتتامانى ماقۇلداعان. ەلشىلىك مۇنداي اقپاراتتىڭ تاراۋىنا وسى كەلىسىم سەبەپ بولعانىن ايتىپ، وسى سياقتى كەلىسىمدى بۇعان دەيىن اقش-پەن رەسەي بيلىگى دە وتىرعانىن اتاپ ءوتتى.

Abai.kz

1 پىكىر