سەيسەنبى, 10 جەلتوقسان 2019
بىلگەنگە مارجان 6091 10 پىكىر 31 تامىز, 2017 ساعات 17:36

عۇمار قاراش: دۇمشە مولدالار عانا تەك مال سويۋدى دارىپتەپ ءجۇر

 

رەداكتسيادان: 19 عاسىردىڭ سوڭى 20 عاسىردىڭ باسىندا ءومىر سۇرگەن، الاشتىڭ ارداقتى ازاماتى، كورنەكتى اقىن، ويشىل-فيلوسوف، حالقىن ونەر مەن عىلىمعا شاقىرىپ، بەرەكەلى ەل بولۋعا ۇندەگەن قايراتكەر-اعارتۋشى، ءدىن-شاريعات، يماندىلىق جولىن، اراب، پارسى، تۇرىك تىلدەرىن جەتىك بىلگەن عۇلاما-احۋن، قوعام قايراتكەرى عۇمار قاراش اتامىزدىڭ قۇربان شالۋ تۋرالى ءتاپسىرىن informburo.kz سايتى قۇربان ايت كۇنىنىڭ قارساڭىندا جاريا ەتتى. ءيسى مۇسىلمان ءۇشىن قاسيەتتى قۇربان ايت كۇندەرى ىسىراپشىلدىققا كوپ جول بەرەتىنىمىزدى ەسكەرە كەلىپ، عۇمار قاراشتىڭ ەسكەرتۋىن ەل ەسىنە سالىپ قويۋدى ءبىز دە ءجون كوردىك.

«... الگى جوعارىدا ءبىرسىپىراسىنىڭ اتتارى جازىلعان قاتىرما تىستى قالىڭ كىتاپتارعا قاراعاندا قۇربان ايىنىڭ 10-ىنان باستاپ 12-ءسى كۇنى كۇن باتقانعا شەيىن ءحالى جەتكەن ادامدار ءبىر قوي ياكي ءبىر ەشكىنىڭ، يا بولماسا تۇيە، سيىردىڭ بىرەۋىنىڭ جەتىدەن ءبىرىن شالىپ، قانىن اعىزۋى شارت.

قۇران ءشاريفتىڭ 32, حاجى تۋرالى سۇرەسىندەگى: «ءلام ءيانالۋللاھۋ ءلاحۋاحۇما ءۋالاد ءماھۋھا ۋالاكين ءيانالۋھۋ ءانناھۋا مينكۋ» دەگەن تەرەڭ ماعىنالى اياتىنا قاراعاندا، اللا رازىلىعى ءۇشىن دەپ شالىنعان مالدىڭ ەتى، قانى جەتپەيدى، بالكي اق نيەت، ادال جۇرەك جەتەدى، ياعني مالدى شالىپ، قانىن اعىزۋ ياكي تاباقتاپ ەتىن تارتۋ ماقسۇد ەمەس، بالكي ادام مال-مۇلكىن قيىپ، جاقسى كۇندەردە اللا جولىنا ءتۇسۋى ماقسۇد دەگەن.

ءبىردىڭ ەمەس، كوپتىڭ، جالپى جۇرتتىڭ، ۇلتتىڭ پايداسىنا جاراعان ورىندى. اللانىڭ ءوزى ھەش نارسەگە مۇقتاج ەمەس. ەندى وسى زامان ءحالىن، ۇلتىمىزدىڭ ءجايىن ويلاپ قاراساق، الگى اياتتىڭ كورسەتكەن جولىمەن جۇرسەك، سول قۇرمەتتى ىزگى ءۇش كۇندە نەندەي ورىن ءتيىستى، ۇلتىمىزعا پايدالى بولىپ، سول ورنىمىزعا مالىمىزدى سارپ ەتۋ جارايدى، ناعىز ساۋاپتى قۇربان بولىپ موينىمىزدان تۇسەدى. مۇندا ھەشبىر ساداقا بولۋعا ورىن جوق".

ەندى عۇمار قاراش اتامىزدىڭ قۇربان شالۋ تۇرعىسىندا حاميدوللا باۋىرىنا جازعان ءپاتۋا حاتىن كۋالىككە شاقىرايىق.

عۇمار قاراش: "قۇرمەتلى باۋىرىم حاميدوللا! سىزگە بۇنىڭ عاجاپ بولىپ كورىنۋى – جاسىڭىزدان قۇربان دەگەن قان اعىزۋ دەپ باسىڭىزعا ءسىڭىپ قالعاندىقتان، سىزگە ۇيرەتكەن مولدالار قۇرباندى اشىپ، شاريعاتتىڭ رۋح ءپالساپاسىن ۇيرەتۋدىڭ ورنىنا، الگى قالىڭ كىتاپتارداعى مىڭ جىل بۇرىنعى حالگە، زامانعا قاراي ايتىلىپ قالعان سوزدەردى ۇيرەتىپ، وسىدان ايرىلماي، تاپ وسىنى وزگەرتپە دەگەندىكتەرىنەن. ءوزىڭىز ويلاپ قاراڭىزشى: جىل سايىن حاجدارداعى مىنا دەگەن جەردە قۇربان كۇنى ءجۇز مىڭنان ارتىق مال: قوي، تۇيە، سيىر ءبىر كۇن ىشىندە شالىنىپ، جەرگە كومىلەدى، بۇل ۇيات ەمەس پە؟! مۇنداي يسراپتى اق شاريعات قوسار ما؟

مىنە، وسىلاردىڭ ءبارى شاريعاتتىڭ رۋحىن تاستاپ، اداسۋىمىزدان كەلىپ تۇر. پايعامبارىمىز (س.ع.) زاماناسىندا يسلام مادەنيەتىنىڭ نەگىزى جاڭا باستالىپ سالىنعان ۋاقىت بولعانى ءۇشىن مەكتەپ، مەدرەسە، كىتاپ-قۇرال دەگەن زاتتار بولماعان، جازۋ-سىزۋ دا مۇندا از بولعان. سول سەبەپتى ول كۇندەرى قۇرباندىقتى شالىپ، فاقىراعا ەتىن تاراتۋدان باسقا ءتيىستى ورىن تابىلماعان. وسى كۇندە پايعامبارىمىز ءتىرىلىپ، قايتادان ارامىزعا كەلىپ، حالىمىزدى كورسە، ەڭ اۋەلى باستاپ ءوز قۇرباندىعىن ساتىپ، ءبىزدىڭ عىلىمدى-ونەرلى بولۋىمىزعا، باسقا ەلدەرگە قاتارلاسۋىمىزعا جۇمسار ەدى".

Abai.kz

10 پىكىر