جۇما, 18 قازان 2019
جاڭالىقتار 3969 0 پىكىر 30 قازان, 2015 ساعات 15:06

قىتايلىق جەردىڭ استىمەن قازاقستانعا وتپەك بولدى

قحر ازاماتى جەردى قازىپ، قازاقستانعا قاشپاقشى بولدى، - دەپ حابارلايدى Tengrinews.kzء تىلشىسى قر ۇقك شەكارا قىزمەتىنە سىلتەمە جاساپ. وقيعا 30 قازاندا قر ۇقك شەكارا قىزمەتى "شىعىس" وڭىرلىك باسقارماسىنا قاراستى جاركەنت شەكارا وتريادىنىڭ "ىنتالى" شەكارا زاستاۆاسىندا بولدى.

دابىل تۇنگى ساعات 00.31-دە بەرىلدى. وتە قۋاتتى جىلجىمالى جارىق بەرۋ ماشيناسىن جانە ءىزشىل ءيتتى وزدەرىمەن بىرگە الىپ، شۇعىل تۇردە دابىل تۇسكەن اۋماققا كەلىپ جەتكەن دابىل توبى ءىز باقىلاۋ جولاعىنان كورشىلەس ەلدىڭ اۋماعىنان ءبىزدىڭ جەرىمىزگە قاراي وتكەن ادامنىڭ ىزدەرىن بىردەن تاپتى.

"تەكسەرە كەلە، شەكارا بۇزۋشى ەلەكترلى دابىل بەرۋ كەشەنىنىڭ استىن قازىپ وتكەنى بەلگىلى بولدى. بۇل ۋاقىتتا كورشىلەس شەكارا زاستاۆالارىنىڭ دابىل توپتارى دا وقيعا بولعان اۋماقتى باقىلاۋعا الىپ ۇلگەرگەن ەدى", - دەپ حابارلادى شەكارا قىزمەتىندەگىلەر.

التىنكول تەمىرجول ستانتسياسىن بەتكە العان شەكارا بۇزۋشى مەملەكەتتىك شەكارا سىزىعىنان 8 شاقىرىم قاشىقتىقتا ۇستالدى.

ايتا كەتەيىك، وزىمەن بىرگە الىپ جۇرگەن تولقۇجاتى بويىنشا، ول 1985 جىلى قحر-دىڭ فەنتيۋ ۋەزىنىڭ حەناي پروۆينتسياسىندا تۋعان قىتاي ازاماتى. ەر ادام شەكارانى بۇزىپ ءوتۋ سەبەبىن ءومىر سۇرۋگە جايلى جەر ىزدەۋىمەن تۇسىندىرەدى. "سومكەسىنە 501 يۋان، ازىق-تۇلىك، ەلەكترلى قولشام، كيىمدەر، تەمەكى بلوگىن، قىتاي تىلىندەگى الەم كارتاسىن جانە تاعى دا باسقا كەرەكتى زاتتاردى سالىپ الىپ شىققانىنا قاراعاندا، بۇل ازاماتتىڭ ءبىزدىڭ ەلىمىزدەگى جوسپارى ۇزاق مەرزىمگە ارنالعان ءتارىزدى. الايدا، قازاقستاندىق شەكاراشىلار ونىڭ جولىن شەكارادان ۇزاتپاي-اق كەسىپ ۇلگەردى", - دەدى شەكارا قىزمەتىندەگىلەر.

اباي-اقپارات

0 پىكىر