الماتىداعى مۇحتار اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ ۇجىمى 94 جىلدىق تاريحى بار تەاتردىڭ ديرەكتورى ءسابيت ابدىحالىقوۆتى قىزمەتىندە قالدىرۋدى تالاپ ەتىپ، قازاقستان پرەزيدەنتى قاسىم-جومارت توقاەۆتىڭ اتىنا اشىق حات جازىپتى.

ءۇشبۋ حاتتا ابدىحالىقوۆ تەاترعا باسشىلىق ەتكەن ۋاقىتتا اتقارىلعان جۇمىستار مەن ۇجىم جەتىستىكتەرى تۋرالى ەگجەي-تەگجەيلى باياندالىپ، تەاتردىڭ قازىرگى احۋالى جايلى ايتىلعان.

ۇجىمداعىلاردى الاڭداتقان تاعى ءبىر ماسەلە، عاسىرعا جۋىق تاريحى بار قارا شاڭىراقتا ديرەكتوردىڭ ءجيى اۋىسۋى كورىنەدى.

"ۇجىم ءبىر باسشىمەن جۇمىس ىستەۋىنە ەندى ۇيرەنە بەرگەندە، اۋىستىرىپ جىبەرەتىن ءداستۇر قالىپتاستى. جاڭا باسشى كەلمەي جاتىپ، ونى دا جاقىن ارادا تاعى دا اۋىستىرادى دەگەن ءسوز شىعاتىنىنا ەتىمىز دە ۇيرەنىپ كەتتى. بۇل فاكتور تەاتر جۇمىسىنىڭ اتموسفەراسىنا، وندىرىسىنە كەرى اسەرىن تيگىزىپ كەلەدى. 94 جىلدىق تاريحى بار باسشىلىقتىڭ ءجيى اۋىسۋى ۇجىمدا تۇراقسىزدىق تۋدىرىپ، قولعا الىنعان ىستەردىڭ اياقسىز قالۋىنا الىپ كەلەرى ءسوزسىز.

ەندى مىنە، 1 جىلعا جۋىق قىزمەت اتقارعان ءسابيت ءابدىمۇتالىۇلى ابدىحالىقوۆتى لاۋازىمىنان بوساتادى دەگەن ارەكەتتەر سىزگە حات جازۋدى ماجبۇرلەپ وتىر", دەپ جازىلعان حاتتا.

ۇجىمدى الاڭداتقان وسى ماسەلەلەردىڭ جاۋابىن ءبىلۋ ءۇشىن قر مادەنيەت جانە سپورت ءمينيسترى اقتوتى رايىمقۇلوۆاعا دا حات جازىلعان ەكەن.

رەداكتسيادان: اتالعان ءۇشبۋ حات بۇگىن رەداكتسيامىزدىڭ ەلەكتروندى پوشتاسىنا كەلىپ ءتۇستى. 

Abai.kz