سەنبى, 7 جەلتوقسان 2019
1948 3 پىكىر 11 قاراشا, 2019 ساعات 11:29

ازات پەرۋاشەۆ: ازاماتتارىمىزدىڭ ءومىرى رەسەيلىكتەردەن 10 ەسە ارزان بولعانى ما؟..

«ادامداردىڭ ءومىرىن باعالاۋ كەرەك، ءبىزدىڭ ازاماتتارىمىزدىڭ ءومىرى رەسەيلىكتەردەن ارزان ەمەس». دەپۋتات ازات پەرۋاشەۆ ماجىلىستە وتكەن وندىرىستەگى قاۋىپسىزدىك تۋرالى زاڭنىڭ تانىستىرىلۋى بارىسىندا وسىنداي پىكىر ءبىلدىردى.

«اق جول» پارتياسىنىڭ جەتەكشىسى مەملەكەتتىك مەكەمەلەردە ادامدار قازا تاپقاندا نەمەسە ولاردىڭ دەنساۋلىعىنا زيان كەلتىرىلگەندە تولەنەتىن وتەماقىنىڭ مولشەرىن ەسەپتەۋدىڭ بىرىڭعاي ءتاسىلى جوق ەكەنىنە نازار اۋداردى.

«رەسەي ۇكىمەتى قايتىس بولعان ادامنىڭ وتباسىنا 1 ملن رۋبلدەن، ال اپاتتان زارداپ شەككەندەرگە 500 مىڭ رۋبلدەن باستاپ وتەماقى تولەيدى. ال، بىزدە ارقالاي. كەي جەرلەردە 200 مىڭ تەڭگە، كەي جەرلەردە 500 مىڭ، ەڭ كوبى 1 ملن تەڭگە تولەنەدى. سوندا ءبىزدىڭ ازاماتتارىمىزدىڭ ءومىرى رەسەيلىكتەردەن 10 ەسە ارزان بولعانى ما؟ ۇكىمەت نەگە وتەماقىنى ەسەپتەۋدىڭ بىرىڭعاي ءتاسىلىن ەنگىزبەيدى؟»، دەدى ازات پەرۋاشەۆ.

«بۇل ءۇشىن ءبىزدىڭ فراكتسيا ادام قازا تاپقاندا ونىڭ ءبىلىمىن، ەكونوميكا مەن قوعامعا ۇلەسى مەن رۋحاني قۇندىلىقتارىن قوسا ەسەپتەگەندە، مەملەكەت ءۇشىن ەكونوميكا جاعىنان قانشالىقتى شىعىن ەكەنىن ەسەپتەۋدى بىرنەشە رەت ۇسىندى. مەملەكەت اپاتتار مەن ءزىلزالادان كەلەتىن ەكونوميكالىق شىعىننىڭ اۋقىمىن بىلگەن كەزدە ادامداردى باعالاي باستايدى»، دەدى فراكتسيا جەتەكشىسى.

سونىمەن قاتار، ازات پەرۋاشەۆ ءوندىرىس ورنىندا 5 ادامنان كوپ قازا تاپقان جاعدايدا عانا اپاتتى زەرتتەۋ بويىنشا مەملەكەتتىك كوميسسيا قۇرىلاتىنىن سىنادى.

«اق جول» پارتياسىنىڭ جەتەكشىسى يندۋستريا مينيسترلىگىنىڭ زاڭ ازىرلەۋشىلەرىنەن: «نەگە 5 ادامنان اسقان جاعدايدا؟ نەگە التى نەمەسە ءبىر ادامنان كوپ قايتقاندا ەمەس؟ بۇل شارت قايدان الىنعان؟»، دەپ سۇرادى.

«كونستيتۋتسيا بويىنشا ادام جانە ونىڭ ءومىرى، قۇقىقتارى مەن بوستاندىعى مەملەكەتتىڭ باستى قۇندىلىعى بولىپ تابىلادى. قىلمىستىق زاڭنامادا 2 جانە ودان كوپ ادام قايتىس بولعان جاعدايدا عانا ەرەكشە جاۋاپكەرشىلىك تۋىندايدى. سوندا ءوندىرىس ورنىندا ءتورت-بەس جۇمىسشى قازا تاپسا، مەملەكەتتىڭ قاتىسى جوق بولعانى ما؟ مۇنداي كوزقاراسپەن كەلىسە المايمىن!

مىسالى، رەسمي اقپاراتتار بويىنشا چەرنوبىلدە ورىن العان العاشقى ورتتە 1 ادام قازا تاپقان. الايدا، اپاتتىڭ اۋقىمى بۇكىلالەمدىك بولىپ تانىلدى. سوندا سىزدەردىڭ ويلارىڭىزشا وسى اپات بويىنشا كوميسسيا قۇرۋدىڭ قاجەتى جوق بولعانى ما؟

بۇل ۇستانىمدى باسقا دەپۋتاتتار دا قولدادى. دەپۋتات احمەت مۋرادوۆ: «ازات تۇرلىبەكۇلىنىڭ پىكىرىمەن تولىعىمەن كەلىسەمىن. ءبىر ادامنىڭ دا قازاسى – جاقىندارى ءۇشىن وتە اۋىر. زارداپ شەككەندەر سانىن ەسەپتەگەنشە، بار كۇشىمىزبەن مۇنداي جاعدايلاردىڭ الدىن الۋ كەرەك.

مۇناي ءونىدىرىسىنىڭ ءبىر اۋىسىمىندا 5 ادام جۇمىس ىستەيدى. مەملەكەتتىڭ اپات سالدارىن تەكسەرۋى ءۇشىن ءبىر اۋىسىم تولىعىمەن قازا تابۋى كەرەك پە؟»، دەدى ول.

تالقىلاۋ ناتيجەسىندە «اق جول» پارتياسىنىڭ جەتەكشىسى مەملەكەتتىك ورگانداردى ايتىلعان سىندى نازارعا الۋ كەرەكتىگىن ايتىپ، جۇمىس توبىنا وسى جانە باسقا دا سۇراقتار بويىنشا وزگەرتۋلەردى جولداعانىن مالىمدەدى.

Abai.kz

3 پىكىر