سەنبى, 7 جەلتوقسان 2019
جاعىمدى جاڭالىق 1801 6 پىكىر 1 قاراشا, 2019 ساعات 12:48

قوش بول، كەڭەستىك اتاۋلار!

رەداكتسيادان: تەمىرتاۋ قالاسىنداعى بىرقاتار كوشەلەردىڭ كەڭەستىك اتاۋىن وزگەرتكەنى جايلى اقپارات الدىق. ءبىزدىڭ جاعدايىمىزدا جاعىمدى جاقسى جاڭالىق. نەوكولونيزاتسيا ساياساتى تەگەۋرىندى جۇرگەن بۇرىنعى كسرولىقتار ءۇشىن بۇل جاڭالىعىمىز كۇلكىلى بولۋى دا مۇمكىن. ايتكەنمەن دە، جاعىمدى جاڭالىقتارىڭىز جالعاستى بولسىن دەيمىز!

ءسويتىپ، تەمىرتاۋ جۇرتى "قوش بول، سوۆەتتىك اتاۋلار" دەپتى. ناقتىلاپ ايتساق، تولياتتي كوشەسىنە – داڭقتى مەتاللۋرگ ەلامان بايعازيەۆتىڭ، كالينين كوشەسىنە – ساكەن سەيفۋلليننىڭ، گەرتسەن كوشەسىنە – احمەت بايتۇرسىنۇلىنىڭ، ديميتروۆ كوشەسىنە – ابايدىڭ، ال كومسومول داڭعىلىنا – باۋىرجان مومىشۇلىنىڭ اتىن بەرۋ تۋرالى ۇسىنىس قۇپتالىپتى. 

كوردىك، كوزىمىز ءسۇيسىندى. بارەكەلدى، دەستىك. وسى تۋرالى ەگجەي-تەگجەيلى تومەندەگى ماقالادان وقىپ، بىلەرسىزدەر...


بۇگىن تەمىرتاۋداعى قالىڭ قازاق ءۇشىن «اق تۇيەنىڭ قارىنى جارىلعان» كۇن بولدى! بۇعان دەيىن تولياتتي، كالينين، گەرتسەن، ديميتروۆ اتىنداعى ۇزىننان-شۇباق كوسىلىپ جاتقان كوشەلەر مەن ورتالىقتاعى جارىق تا كەڭ كومسومول داڭعىلىنىڭ اتاۋىن وزگەرتۋگە بايلانىستى قوعامدىق تىڭداۋ ءوتىپ، ۇسىنىلعان ۇسىنىستار تارتىستى تالقىلاندى. ناتيجەسىندە، ۇتىمدى وي-پىكىرلەرىمەن دە، سانى جاعىنان دا وزگەلەردەن باسىم تۇسكەن قالىڭ قازاق قۋانىشتارى قويىندارىنا سيماي، سۇيىنشىلەپ تاراستى.

تارتىستى تالقىلانعانى – كومسومول داڭعىلى بولدى، «كومسومول ءبىزدىڭ اتا-انامىزدىڭ جاستىق شاعى»، «تەمىرتاۋدى سالعان كومسومولدار، ولاردىڭ ەڭبەگىن قالاي جوققا شىعاراسىڭدار»، «وتكەندى ۇمىتۋعا بولمايدى، بۇل قالا تاريحىنا قيانات» دەگەن سىڭايداعى قارىسىلىقتار كوپ بولدى. دەگەنمەن، كوپشىلىك باۋىرجانداي باتىردىڭ اتىن بەرۋدى لايىق جانە وتە ورىندى دەپ سانايتىندارىن جەتكىزدى.

تەمىرتاۋدىڭ باس اقىنى قاسىم بوتانوۆ «ەگەر تاريحقا جاسالعان قيانات» دەسەڭىزدەر، وندا سوناۋ ءبىر كەزدەرى لەنينگراد، ستالينگراد قالالارىنىڭ اتتارى وزگەرتىلگەنىن ەستەرىڭىزگە سالايىن، سوندا كومسومولىڭىز ۆلاديمير يليچ پەن يوسيف ستاليننەن دە ارتىق بولعانى ما؟» . تاعى ءبىر مىسال ايتايىن، وسى تەمىرتاۋداعى لەنين داڭعىلىن رەسپۋبليكا داڭعىلى دەپ وزگەرتكەن دە ءسىز بەن ءبىز ەدىك" دەپ كەسىمدى ءسوزىن ايتتى.

سونىمەن، تولياتتي كوشەسى – داڭقتى مەتاللۋرگ ەلامان بايعازيەۆ، كالينين كوشەسى – ساكەن سەيفۋللين، گەرتسەن كوشەسى – احمەت بايتۇرسىنۇلى، ديميتروۆ كوشەسى – اباي، ال كومسومول داڭعىلى – باۋىرجان مومىشۇلىنىڭ اتىنا بەرۋ ۇسىنىسى قۇپتالدى. مادەنيەت سارايىندا وتكەن قوعامدىق تىڭداۋعا قاتىسقان 900-گە جۋىق تۇرعىننىڭ 830-دان استامى بۇل ۇسىنىستاردى قولداپ داۋىس بەردى.

رۋزا الداشەۆا

Abai.kz

6 پىكىر