سارسەنبى, 29 قاڭتار 2020
1866 3 پىكىر 31 قازان, 2019 ساعات 11:53

«ءابىش الەمى» اتتى شىعارماشىلىق بايقاۋ وتەدى  

اتالمىش بايقاۋ ءابىش كەكىلبايۇلىنىڭ 80 جاسقا تولۋ مەرەيتويىنا وراي ۇيىمداستىرىلعالى وتىر.  

قازاقستان رەسپۋبليكاسىنىڭ مادەنيەت جانە سپورت مينيسترلىگى، قازاقستان رەسپۋبليكاسىنىڭ ءبىلىم جانە عىلىم مينيسترلىگى، نۇر-سۇلتان قالاسىنىڭ اكىمدىگى، قازاقستان رەسپۋبليكاسىنىڭ ۇلتتىق اكادەميالىق كىتاپحاناسى  جانە «ەگەمەن قازاقستان» گازەتى اق قاراشا اينىىڭ سوڭىندا نۇر-سۇلتان قالاسىندا «ءابىش الەمى» اتتى وقۋ كونگرەسىن وتكىزۋدى ۇيىمداستىرىپ وتىر. كونگرەسس اياسىندا «ءابىش الەمى» شىعارماشىلىق كونكۋرسى وتەدى.   

شىعارماشىلىق كونكۋرستىڭ ماقساتى: جازۋشىنىڭ سانالۋان تاقىرىپتاعى شىعارمالارى مەن ەڭبەكتەرىن قايتا وقىپ، زەردەلەي ءتۇسۋ ارقىلى ونىڭ سانقىرلى تالانتىنا تاعزىم ەتۋ جانە ونى الەم جۇرتشىلىعىنا تانىتۋ.  

كونكۋرس مىنا اتالىمدار (نوميناتسيالار) بويىنشا جاريالانادى: 

«ءابىش كەكىلباەۆ – زاڭعار جازۋشى» (قالامگەرلىك قىر-سىرى);  

«ءابىش كەكىلباەۆ – زاماناۋي ويشىل» (فيلوسوفيالىق كوزقاراسى);

«ءابىش كەكىلباەۆ – سىرلى سۋرەتكەر» (شىعارماشىلىق شەبەرلىگى); 

«ءابىش كەكىلباەۆ – ايشىقتى اقىن» (اقىندىق قولتاڭباسى); 

«ءابىش كەكىلباەۆ – تاعلىمدى تاريحشى» (شەجىرەشى-تاريحشىلدىعى); 

«ءابىش كەكىلباەۆ – عۇلاما عالىم» (عىلىمي-زەرتتەۋشىلىگى); 

«ءابىش كەكىلباەۆ – سىندارلى سىنشى» (شىنشىل-سىنشىلدىعى); 

«ءابىش كەكىلباەۆ – سۇڭعىلا ساياساتكەر» (ىشكى-سىرتقى ساياساتتىڭ بىلگىرى);  

«ءابىش كەكىلباەۆ – قوعام قايراتكەرى» (الەۋمەتتىك-قوعامدىق قىزمەتى);  

«ءابىش كەكىلباەۆ – ۇلاعاتتى ۇستاز» (ۇستاز–شاكىرت ساباقتاستىعى);

«ءابىش كەكىلباەۆ – كەمەڭگەر كوسەمسوزشى» (پۋبليتسيستىك قىزمەتى);

«ءابىش كەكىلباەۆ – بىلىكتى ءبىلىمپاز» ء(تۇپسىز تەرەڭ بىلىمدارلىعى);

«ءابىش كەكىلباەۆ – تالانتتى ءتارجىماشى» (تەلنۇسقا تۋىندىگەر);

«ءابىش كەكىلباەۆ – ابىز، اۋليە» (بولاشاقتى بولجامپازدىعى);

«ءابىش كەكىلباەۆ – پاتريوت ولكەتانۋشى» (تۋعان جەر تاريحى);

«ءابىش كەكىلباەۆ – ەتنوگراف-عالىم» (تۇرمىس-سالت زەرتتەۋشىسى);

«ءابىش كەكىلباەۆ – ونەر زەرتتەۋشىسى» (انشىلىك، كۇيشىلىك ونەر);

«ءابىش كەكىلباەۆ – دارحان مىنەزدى دارىن» (مىنەزى باي تۇلعا);

«ءابىش كەكىلباەۆ – اسىل ازامات» (ازاماتتىق-ۇستانىمدىق قاسيەتتەرى);  

«ءابىش كەكىلباەۆ – ۇلگىلى وتباسى يەسى» (وتباسىلىق ءتالىم-تاربيەسى).

كونكۋرسقا قاتىسۋشىلار اتالعان نوميناتسيالار بويىنشا بايقاۋعا  بۇرىن ەش جەردە جاريالانباعان شاعىن شىعارمالارىن مىنا ەلەكتروندى پوشتا ارقىلى جولداۋ كەرەك: ە-mail:  contest_abish.k@bk.ru (ەستەلىك، ەسسە، كوسەمسوز، اڭگىمە، ارناۋ-ولەڭ، جىر-تولعاۋ، رەتسەنزيا، عىلىمي تالداۋ، سىن-ماقالا، ت.ب. ) جولداي الادى. بەلگىلى ءبىر ەڭبەكتەن ءۇزىندى كەلتىرىلگەن جاعدايدا وعان سىلتەمە جاسالۋعا ءتيىستى.     

ءاربىر اۆتور تەك ءبىر اتالىم (نوميناتسيا) بويىنشا عانا بايقاۋعا قاتىسا الادى. ءاربىر اتالىم بويىنشا قارجىلاي سىيلىقتار جانە ارنايى جۇلدەلەر تاعايىندالعان. 

شىعارما ماتەريالدارىن رەسىمدەۋگە قويىلاتىن تالاپتار: فايلدىڭ اتى اۆتوردىڭ اتى-جونىمەن سايكەس كەلۋگە ءتيىس. شىعارما ءماتىنى ءبىرىنشى بەتىنىڭ وڭ جاق شەكەسىنە «كونكۋرسقا» دەپ جازىلۋى كەرەك.  كولەمى 2-3 بەتتەن اسپايتىن بولسىن، ءماتىن ءشريفتى «Times New Roman» - 14. شىعارما اۆتورى تۋرالى مالىمەتتەر: تولىق اتى-ءجونى، جاسى، قىزمەتى، مەكەن-جايى، بايلانىس تەلەفوندار جانە ەلەكتروندى پوشتاسى كورسەتىلۋگە ءتيىس (قوسىمشا).

شىعارمانى تاپسىرۋ مەرزىمى: 2019 جىلدىڭ 10 قاراشاسى كۇنگى ساع. 18.00.-گە دەيىن. ارنايى قۇرىلعان قازىلار القاسى كونكۋرس قورىتىندىسىن شىعارعان سوڭ جەڭىمپازدارعا حابار جىبەرىلەدى. سىيلىقتار مەن جۇلدەلەر   نۇر-سۇلتان قالاسىندا 2019 جىلعى 30 قاراشادا تاپسىرىلادى.  

جەڭىمپاز اۆتورلاردىڭ شىعارمالارى باسپادان جەكە جيناق بولىپ شىعادى.

Abai.kz

3 پىكىر