ەۋرازيالىق ەكونوميكالىق وداق قۇرۋ تۋرالى شارتقا قول قويۋ ءۇشىن رەسەي پرەزيدەنتى ۆلاديمير پۋتين مەن  بەلارۋس پرەزيدەنتى الەكساندر لۋكاشەنكو استاناعا ءىس ساپارمەن كەلدى. بۇل تۋرالى قازاقپارات حابارلادى.

اتاپ ايتقاندا، بۇگىن استاناداعى تاۋەلسىزدىك سارايىندا مەملەكەت باسشىلارى دەڭگەيىندەگى جوعارى ەۋرازيالىق ەكونوميكالىق كەڭەستىڭ وتىرىسى وتەدى. وتىرىستىڭ شاعىن قۇرامداعى كەزدەسۋىنە قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ، رەسەي فەدەراتسياسىنىڭ پرەزيدەنتى ۆلاديمير پۋتين جانە بەلارۋس رەسپۋبليكاسىنىڭ پرەزيدەنتى الەكساندر لۋكاشەنكو قاتىسادى. سونىمەن بىرگە، قۇجاتقا قول قويۋ راسىمىنە ارمەنيا مەن قىرعىزستان پرەزيدەنتتەرى دە كەلەدى دەپ كۇتىلۋدە.

اتالعان وداق تۋرالى كەلىسىمگە قول قويىلار بولسا،  قۇجات 2015 جىلدىڭ 1 قاڭتارىنان باستاپ كۇشىنە ەنەدى.

 ەۋرازيا ەكونوميكالىق وداعى تۋرالى كەلىسىمگە قول قويىلعاننان سوڭ نۇرسۇلتان نازارباەۆ پەن ۆلاديمير پۋتين جەكە كەزدەسىپ، قازاقستاندا اتوم ەلەكتر ستانتسياسىن (اەس) سالۋ تۋرالى كەلىسىمگە دە قول قويادى دەپ جوسپارلانىپ وتىر.

اباي-اقپارات