Särsenbi, 8 Säuir 2020
COVID-19 QAZAQSTANDA. Jwqtırğandar — 709. Jazılğandar — 53. Qaytıs bolğandar — 7
Äleumet 3501 12 pikir 8 Mamır, 2019 sağat 17:11

Mwhtar Qwl-Mwhammedtiñ äkesi Abrar Äketaywlı dünieden ozdı

Bügin QR memleket jäne sayasat qayratkeri, Senattıñ Halıqaralıq qatınastar, qorğanıs komitetiniñ basşısı Mwhtar Qwl-Mwhammedtiñ äkesi Abrar Äketaywlı Qwl-Mwhamed toqsannan asqan şağında ömirden ötti. On perzent tärbielep twtas bir äulettiñ äkesi atanğan Abrar Äketaywlı wrpağına «Älippeden» bwrın qasietti «Qwrannıñ» ayattarın üyretken qazınalı qariya edi.

Ata-baba esimderin jattatqızıp, halıq ädebietiniñ mol mwrasımen susındatqan äkeniñ tärbiesin körgen wl men qız büginde qoğamnıñ är salasında el üşin qızmet etip keledi. Äkesi turalı Mwhtar Abrarwlı:

"Äkemniñ abayşıldığına arnayı toqtalmasam bolmas. Atamekenge oralğan 1961  jılı Mwhtar Äuezovtiñ basşılığımen, Ä.Jirenşinniñ qwrastıruımen Abaydıñ qalıñ bir tomdığı şığıptı. Äkey osını qolınan, jastığınıñ astınan tastağan emes. San märtebe qayıra, tamsana oqıp: «Jarıqtıq Abaydan bar swrağına jauap tabasıñ. Osınşama danışpandıq bir adamğa qalay ğana bitti eken!», – dep tamsanıp otıratın.  M.Äuezovtiñ «Abay jolı» jöninde: «Abay turalı jazğanda Mwhañnıñ qalamın danışpannıñ aruağı jetelep otırğan ğoy. Äytpese mwnday ğajayıp kitap düniege keler me edi», – degen sözin de talay estidim.

Orta mektepti bitirip, Almatığa oquğa attanğanda, mağan öziniñ teri siñip, qolınıñ tabı qalğan sol Abaydıñ bir tomdığın wstatıp: «Qısılsañ da, qinalsañ da, össeñ de, örkendeseñ de bar swraqtı osı kitaptan tabasıñ», – degeni äli künge deyin esimde. Solay boldı da,- dep jazadı.

Biz Mwhtar Qwl-Mwhamed mırzanıñ qayğısına ortaqtasıp, köñil aytamız!

Abai.kz

12 pikir