Beysenbi, 6 Tamız 2020
COVID-19 QAZAQSTANDA. Jwqtırğandar — 94882. Jazılğandar — 67031. Qaytıs bolğandar — 1058
Aymaq 3300 1 pikir 28 Mamır, 2018 sağat 09:37

Camal Eslämova häm soltüstiktiñ auıldarı

Dünie jüziniñ kileñ öner düldülderi baqtarın sınaytın Kann festivalinde «Üzdik aktrisa» atanğan Samal Eslämova turalı jurnalist äriptesterim jarısa jazıp jatır. Jerlesimniñ ärkimniñ qolı jete bermeytin biikke şığıp, jwldızı jarqırağanına qalay quanbayın! Samaldıñ öner şıñına örlegen jolın oymen şolıp otırsam, qazaq ruhın boyına darıtqan şınayı talant, wlt maqtanışı bolarlıq twlğa qazaqtıñ tiline de, önerine de jatsına qaraytın qaladan emes, mına jahandanu zamanında äli de halıq öneriniñ, ata saltınıñ jwğını saqtalıp otırğan auıldan şığadı eken.

Samal Eslämova bizdiñ Soltüstik Qazaqstan oblısı Aqqayıñ audanındağı Aralağaş auılınan. Äkesi ormanşı, şeşesi sauınşı bolğan qarapayım jandar. Samal äuelde jurnalstika fakul'tetine tüsuge talaptanıp, bir balı jetpegen soñ Qızıljardağı öner kolledjine tüsken, sodan soñ oblıstıq qazaq teatrında aldımen epizodtıq, keyin bastı rol'derde oynap darının körsetken. Aralağaşta bwrın halıq teatrınıñ dañqı şığıp twrğan, önerli jastarı köp auıl. Bizde Esil audanınıñ Ortalıq auılında da halıq teatrı bar edi, qazir ol auıl tarap ketti.

Bizdiñ oblıstan şıqqan, bala kezinde qazirgi Şal aqın audanındağı Ibıraev auılındağı qazaq mektebinde oqıp bilim alğan,  jazuşı, audarmaşı marqwm Gerol'd Bel'ger öziniñ auıl turalı tolğauında soltüstik aymaqtardağı qazaq auılınıñ ıdırauı eluinşi jıldardağı tıñ köteru kezinen bastalğanın jazğan. Onıñ estelikterinde traktormen körşi auıldarğa araq izdep baratın, mas bolıp köşedegi qazdardı mıltıqpen atatın onnan-mwnnan jinalğan tıñ köteruşilerdiñ beynesi sol kezdiñ şındığı, bügingi qazaq auılınıñ sol kezde bastalğan qasireti. «Auıl är qazaqtıñ ruhani tiregi, wlttıq salt dästürdiñ, mädeniettiñ qaynar közi, Qazaqiyanıñ negizi» dep jazğan Bel'ger öz auılı Ibıraevqa jekeşelendiru jıldarı kelgende köñili qwlazıp qaytqan edi.

Sodan beri de jwmıssız jastardıñ, tipti qartañ adamdardıñ oblıs ortalığına köşui tolastar emes. Ärine, bizde twrğındardıñ bärine jwmıs berip, jol salıp, mektep, balabaqşa, mädeniet üyin wstap otırğan Aqqayıñ audanınıñ Dayındıq auılındağı Birjan Şaymerdenov siyaqtı jekelegen käsipker azamattar bar. Sodan da Dayındıq irgesi sögilmey otır. Tipti bwl auılğa jwmıs izdegender özge jerlerden kelip qonıstanıp jatır. Är auıldan osınday bas bolar azamattar şıqsa öşip bara jatqan ata qonıs qayta jandanar edi ğoy.

Oñtüstikten öñirimizge qonıs audarıp, erinbey eñbek etip, käsip aşıp alğandar da jeterlik. Olardıñ arasında auılğa kelip baspanağa qolı jete almay, Soltüstiktiñ ayazdı qısına şıdamay, jersinbey ketip qalatındarı da kezdesedi. Mwnday jağdayda öñirimizdegi qazaqtıñ sanın arttıru qiın.

Oñtüstikten qonıs audarğan ağayındardı jergilikti basşılar aldımen auıldı jerlerde baspanamen, jwmıspen qamtamasız etui kerek. Jol salu, auız su mäselelerin de käsipkerler emes, äkimdikter şeşui kerek. Al qazirgi uaqıtta auıl äkimderiniñ bwl şaruamen aynalısuğa qarjısı joq. Sondıqtan ükimet auıldıq äkimdikterdi jetkilikti qarjılandıru, jwmıs orındarın aşu, äleumettik infraqwrılımdı damıtu üşin zañdıq pärmeni bar arnayı bağdarlama jasauı kerek. Ol bağdarlama boyınşa jwmsalatın qarjı jemqorlardıñ kömeyinde ketpey, orınımen jwmsaluı üşin auıl twrğındarı men jergilikti bilikten qwralğan qoğamdıq baqılau toptarı qwrıluı qajet.  

Ükimet tarapınan auılğa köñil bölinbese auıldan ğana emes, qazaqı bolmısımızdan, wlttıq qasietimizden de ayırılamız. Auıl sahnasındağı jan tebeter än auıl balası qalanıñ tas köşesin basqan sätten bastap üziledi.

Marat Ermwqanov

Abai.kz

 

1 pikir