Beysenbi, 9 Şilde 2020
COVID-19 QAZAQSTANDA. Jwqtırğandar — 41065. Jazılğandar — 13614. Qaytıs bolğandar — 188
Jañalıqtar 2808 0 pikir 30 Mamır, 2009 sağat 11:00

Jaña portal qazaqtildi internettiñ damuına serpin berudi maqsat twtadı

 

Soldan oñğa: Däuren Quat, Nwrlan Erimbetov jäne Aydos Sarım abai.kz internet portalına arnalğan baspasöz mäslihatında. Almatı, 25 mamır 2009 j.

 

Soldan oñğa: Däuren Quat, Nwrlan Erimbetov jäne Aydos Sarım abai.kz internet portalına arnalğan baspasöz mäslihatında. Almatı, 25 mamır 2009 j.

Qazaqstanda abai.kz aqparattıq portalı aşıldı. Qazaqtildi internet jüyesin damıtudıñ birden bir jolı retinde wsınılıp otırğan atalmış portaldıñ maqsatı – aymaqtıq jurnalisterdiñ basın qosu arqılı birtwtas aqparattıq keñistik qwruğa ıqpal etu.
Mamandardıñ esepteuinşe, 2008 jılı internetti paydalanuşı qazaqstandıqtardıñ jüz adamğa şaqqandağı sanı 14 abonentke ösken. Key boljamdar biılğı jılı olardıñ sanı 800 mıñğa jetui mümkin ekendigin körsetedi.
Almatıda bir top jurnalister, sayasattanuşılar men mädeniettanuşılar bas qosıp, qazaq internetiniñ damuına qatıstı öz oyların ortağa saldı. Sonıñ nätijesi – abai.kz aqparattıq portalınıñ aşıluı.
«Altınbek Särsenbaywlı atındağı» qordıñ jetekşisi Aydos Sarım bwl portaldıñ düniege keluin ötken ğasırdıñ basında qazaq ziyalıları bastap ketken dästürdiñ jalğasına teñeydi.
– Osıdan bir ğasır bwrın qazaqtıñ bir top ziyalısı: Twrağwl Abaywlı, Käkitay Isqaqwlı, Älihan Bökeyhanwlı sındı atalarımız jaqsı bir bastama bastap, Peterborda «Abay» degen atpen Abaydıñ twñğış öleñder jinağın basıp şığarğan bolatın. Sol eñbek şıqqannan keyin qazaqtildi jaña poeziya, qazaqtildi filosofiya, qazaqtildi jaña romandar düniege kele bastadı. YAğni, qazaqı ortanı biriktiretin ülken ruhani bastama bolğan dünie boldı dep sanaymız. Bizde soğan negizdep, arasına 100 jıl tastap, osınday abai.kz attı aqparattıq portal aştıq, – dedi Aydos Sarım.

Qazaqstanda biılğı ötken sanaqtıñ aldın ala nätijesi boyınşa, elde qazaq wltınıñ sanı 67 payızdan asqanı habarlanğan-dı.
– Büginde 15 pen 40 jas aralığındağı köpşilik azamattar internet paydalanadı. Olardıñ basım köpşiligi qazaq tildi twtınuşılar. Osılarğa layıq aqparat közderi, internet sayttarı bar ma desek, «joq» dep ökinişpen aytuğa boladı, – deydi A.Sarım.
Jaña portaldıñ bas redaktorı Däuren Quat sayt betinde qazaq jurnalistikasınıñ eñ jaqsı ülgileri jinastırılatındığın aytadı.
– Bizde oblıstıq, respublikalıq basılımdar bar, sonıñ işinde täuelsiz basılımdar da bar. Mine, ädette solardıñ barlığınıñ üni bir jerden şıqpay jatadı. Köptegen özekti mäseleler köteremiz, alayda ol bıtırañqı. Sondıqtan abai.kz aqparat portalında qazaqtildi baspasöz betterindegi eñ üzdik materialdardı jariyalay otırıp, jurnalisterdiñ işki birligin qamtamasız etip, bir birimizdi jaqınıraq bilsek degen niettemiz, – deydi Däuren Quat.
Sonımen birge, abai.kz birqatar äleumettik jobalardı da jürgizbek. Onıñ alğaşqısı, respublikalıq jäne aymaqtıq memlekettik organdardıñ qazaqtildi sayttarınıñ qoğamdıq reytingin jasau.
Däl osınday reytingiler Qazaqstannıñ sayasi partiyalarınıñ, qoğamdıq birlestikteriniñ jäne baspasöz qwraldarınıñ arasında da jürgizilmek.
Ekinşi qadam – qazaqtildi internetti damıtu maqsatında orısşa-qazaqşa internet terminderdiñ sözdigin jasau. Sol arqılı internetti barınşa memlekettk tilde söyletu közdelgen.
Sonday-aq osı künnen bastap, atalmış aqparat portalında qazaqtıñ bay ädebieti de jarıq körmek. Portal ieleri bwl üşin eldegi baspalarmen, aqın-jazuşılarmen tiisti kelissözder jürgizilgendigin aytadı.
«Eger qazirgi aqın jazuşılar kitaptarınıñ taralımı 2 mıñnan aspaytındığın eskerer bolsaq, bwl jaqsı wsınıs. Sondıqtan, düken sörelerinen taba almay jürgen kitaptarıñız bolsa, jaqın arada onı abai.kz aqparattıq portalınan tabatın bolasız», - deydi joba jetekşileri.

 

Mänşük ASAUTAY 26.05.2009 jıl
«Azattıq» radiosı

0 pikir