Beysenbi, 28 Mamır 2020
COVID-19 QAZAQSTANDA. Jwqtırğandar — 9304. Jazılğandar — 4768. Qaytıs bolğandar — 37
Mäyekti 6439 0 pikir 8 Şilde, 2015 sağat 15:49

BÄRİMİZGE ORTAQ «ÖMİR SABAQTARI»

Qoğamda orın alıp jatqan türli mäselelerdi söz etken «Ömir sabaqtarı» derekti dramasınıñ jarıqqa şıqqanına üş ay boldı. «Habar» agenttiginiñ tapsırısımen «Mass Media Group» kompaniyası tüsirgen bwl teleönimniñ twsauı 6 säuirde «Or qazu» attı bölimmen kesilgen bolatın. Büginde teletuındınıñ 22 bölimi körermen nazarına wsınılıp, ol «Habar» agentiginiñ wtımdı jobalarınıñ birine aynaldı.

«Är bölimniñ özindik oqiğası men keyipkerleri, berer sabağı men tälimi, aytatın aqiqatı men ündeui bar» - deydi joba jetekşisi Bauırjan Ibragim. Äkeniñ zarı, ananıñ şarasızdığı, jetimniñ mwñlı közderi, aqşa quğan jandar tağdırı, twtastay qoğam men jekelegen otbasınıñ tüyitkildi mäseleleri «Ömir sabaqtarınıñ» bastı taqırıptarına aynaldı. Eñ bastısı teletuındı ömirden alınğan şınayı oqiğalar izimen tüsiriledi. Körermenniñ erekşe iltipatına ie bolğan bwl derekti drama äleumettik jeli qoldanuşıları nazarınan da tıs qalmadı. Massmediagroup akkauntımen tirkelgen kompaniyanıñ instagramdağı jeke paraqşasına jazıluşılar kün sanap artıp keledi, sonday-aq qazirgi uaqıtta fil'm you tube paraqşasında 20000-nan astam körermen jinap otır. Büginde bağdarlamanıñ reytingisi öte joğarı. Osı orayda körermender pikirine qwlaq türsek:

Anar Janpeyisova – üy şaruasındağı äyel, 52 jasta:

- «Ömir sabaqtarınıñ» är bölimin asığa kütemin. Oqiğaları ömirden alınğandıqtan körermenin baurap baradı. Mäselen, «Ene tärbiesi men kelin qwrmeti» taqırıbı mağan öte jaqın. Sebebi meniñ özim eki kelin wstap otırmın. Fil'mdi körip, özimdi tanığanday boldım. Äsirese, osınau jügi auır taqırıptı körermenge jeñil, äri wğınıqtı etip jetkizu täsili öte wnadı.

 

Aqerke Il'yasova – student, 19 jasta:

- Men «Ömir sabaqtarın» YUtubtan köremin. Sonday qızıqtı fil'm! Otandıq rejisserlardıñ jwmısın körip, riza boldım! Körermenge ötimdi kino tüsiru öte qiın ğoy. Jaqında şıqqan «Bireuge or qazba, öziñ tüsersiñ» seriyası öte wnadı. Şınında, äyel zatına qarındasıñday qarau kerek qoy. Sonımen qatar, fil'mge tüsken akterlar da öte käsibi.

 

Aslan Mırzabaev – bank qızmetkeri, 34 jasta:

- Sätti şıqqan otandıq joba. Üydegilerdiñ bäri qaraydı. Öz basım qolım bosağanda internetten köremin. Keşki uaqıtta efirge şığıp twrsa, tipti jaqsı bolar edi!

«Ömir sabaqtarı» - oqiğalar toptamasınan qwralğan köp seriyalı derekti drama. Mwndağı är oqiğa qoğamdağı belgili bir mäseleni qozğaydı. Bwl rette «Ömir sabaqtarınıñ» scenaristerine artılar jük auır. «Biz halıqtıñ mwñ-mwqtajın döp basıp, olardıñ ıstıq-ıqılasına bölenip jürmiz» - deydi, bas redaktor, scenarist Ayjanar Mwratqızı. Büginde redakciyağa kelip tüsetin hattar, qoñıraular, äleumettik jelilerdegi habarlamalar legi tausılar emes. Birinde jılı lebizder men alğıstar aytılsa, birinde körermen oy tastaydı, pikir qosadı, öziniñ basınan ötken oqiğanı bayandaydı. Scenarister olardı iriktey otırıp, ilip alarlıq, äserli oqiğalardı terip jazadı. Osılayşa, körermen oqiğasınıñ izimen jazılğan bölimder de jarıqqa şığıp jatır. Keyipker obrazına keletin bolsaq, akter tañdauda rejisserdiñ qoyatın eñ bastı talabı – obrazğa ene bilu. Büginde Q.Quanışbaev atındağı qazaq muzıkalıq drama teatrı, Jastar teatrınıñ akterları, Qazaq Wlttıq öner universitetiniñ akter şeberligi jäne teatr rejissurası kafedrasınıñ studentteri bastı rölderdi somdauda. Sonımen qatar ekinşi, üşinşi plandağı rölderge akterlar kasting arqılı da iriktelip alınadı. Bağın sınap köremin deuşilerge ärdayım esik aşıq! Bwl rette boyında darını bar, akter boludı armandaytın kez-kelgen adam üşin atalğan joba keremet mümkindik.

«Keyipkerdiñ obrazın aşa alatın akter qarapayım halıq arasında da jürui mümkin, sondıqtan biz ünemi izdenis üstindemiz» - deydi, qoyuşı rejisser Aybol Seylhan. Bwrın soñdı qazaq kinosı tarihında bolmağan jäyt- büginde tüsirilim tobı aptasına eki bölimnen tüsirude. Ärine, bwl eñ aldımen «Ömir sabaqtarı» wjımınıñ ayanbay eñbek etuiniñ, käsibiliginiñ, izdenisiniñ arqası. Endeşe, «Mass Media Group» kompaniyası wjımına sättilik tilep, «Ömir sabaqtarınan» qızıqtı da şıtırman oqiğalar kütemiz!

Abai.kz

0 pikir