Särsenbi, 8 Şilde 2020
COVID-19 QAZAQSTANDA. Jwqtırğandar — 41065. Jazılğandar — 13614. Qaytıs bolğandar — 188
46 - söz 1868 6 pikir 3 Mausım, 2020 sağat 16:09

Köşpendilerdi jaladan qorğauğa ömirin arnağan ğalım

Lev Nikolaywlı Gumilev, keñes ğalımı, tarihşı, etnograf, şığıstanuşı, filosof, qos aqın Nikolay Gumilev pen Anna Ahmatovanıñ otbasında düniege kelgen. Öziniñ estelikterinde, balalıq şağınan qatarlastarı batıs mädenietine, tarihına qızığıp jürgende, öziniñ şığıs mädenietine, naqtı aytqanda köşpendi mädenieti men tarihına qızıqqandığın aytadı. Bwnı öziniñ şıqqan teginiñ türkilik bolğandığı sebebinen boluı ıqtimal dep tüsindiredi.

Orıs şovinizmi men evrocentristik pikirler keñinen qanat jayıp, qaynap twrğan zamanda, eş qaymıqpastan köşpendi türki-tatarlardıñ, orıs jäne adamzat tarihındağı eleuli orını jayında ğılımi eñbekter jazdı. Sol üşin ğılımi qoğam tarapınan ayıptalıp, ğılımi jwmıs jasauına ärtürli kedergiler keltirildi, alayda Gumilev ğılımi izdenisin tastamay, köşpeli qoğam tarihına qatıstı talay qwndı derekter men oylar qaldırdı. Ğwndardıñ, türkilerdiñ, tatarlardıñ tarihına baylanıstı "Hunnu", " Köne türkiler", "Tartariya şöli" "Qara añız" sındı eñbekter qaldırdı.

Tarih ğılımına jalpı adamzatqa jasağan eñ ülken eñbegi ol "Gumilevtiñ Passionarlıq teoriyası" boldı. Gumilev eñbekterinde keybir qatelikterdiñ de, orın alğanın joqqa şığaruğa bolmas, äytse de, köşpendiler tarihına qatıstı, bolaşaq tarihşılarğa aynımas bağıt körsetip, anıq jol salıp ketti.

Öziniñ tarihın biluge qwmartqan Wlı Dalanıñ är balası Gumilev eñbekterin oqıp şığuğa mindetti. Tağı bir esteliginde Lev Nikolaywlı "Men ömir boyı köşpendilerdi, ädiletsiz jabılğan ayıptardan qorğap kelemin",- degeni bar edi. Ömir boyı özi "qorğap kelgen" ğwn, türki, tatarlardıñ bügingi wrpaqtarı Gumilevtiñ köşpendi elder tarihına siñirgen eñbeginiñ aldında bas iip, qwrmet retinde, köşpendi mädenietiniñ qara şañırağı sanalatın Qazaq eliniñ astanasında Lev Gumilev esimin Euraziya Wlttıq Universitetine berdi. Köşpendilerdiñ bügingi wrpaqtarı atınan Lev Nikolaywlı Gumilevke ülken alğıs aytamız!

Rustem Aşetaevtıñ äleumettik jelidegi jazbasınan

Abai.kz

6 pikir