Jeksenbi, 7 Mausım 2020
COVID-19 QAZAQSTANDA. Jwqtırğandar — 12511. Jazılğandar — 7135. Qaytıs bolğandar — 53
Bilik 1102 2 pikir 20 Mamır, 2020 sağat 14:27

Prezident Joğarı Euraziyalıq ekonomikalıq keñestiñ otırısına qatıstı

Memleket basşısı Qasım-Jomart Toqaev Joğarı Euraziyalıq ekonomikalıq keñestiñ beyne konferenciya formatında ötken kezekti otırısına qatıstı.

Onlayn sammitke Armeniya Respublikasınıñ Prem'er-Ministri Nikol Paşinyan, Belarus' Respublikasınıñ Prezidenti Aleksandr Lukaşenko, Qırğız Respublikasınıñ Prezidenti Sooronbay Jeenbekov, Resey Federaciyasınıñ Prezidenti Vladimir Putin jäne Euraziyalıq ekonomikalıq odaq janındağı baqılauşı memlekettiñ basşısı retinde Moldova Respublikasınıñ Prezidenti  Igor' Dodon, sonday-aq, Euraziyalıq ekonomikalıq komissiya alqasınıñ törağası  Mihail Myasnikoviç qatıstı.

Jiınnıñ kün tärtibinde 2025 jılğa deyingi euraziyalıq ekonomikalıq integraciyanıñ strategiyalıq damuı turalı mäsele talqılandı. Otırıs barısında Memleketter basşıları Euraziyalıq ekonomikalıq odaq ayasındağı ıntımaqtastıqtıñ basım bağıttarın, sonıñ işinde, Kubağa Euraziyalıq ekonomikalıq odaq janındağı baqılauşı memleket märtebesin beru mäselesin qarastırdı.

Qazaqstan Prezidenti öz sözinde «2025 jılğa deyingi euraziyalıq ekonomikalıq integraciyanıñ strategiyalıq damu bağıttarı turalı» qwjattıñ jobasına erekşe nazar audardı.

Qasım-Jomart Toqaev bwl mañızdı qwjattı qabıldau ideyasın qolday otırıp, Strategiyanıñ keybir bölimderin qayta talqılap, äli de pısıqtay tüsu kerek ekenin ayttı.

– Aldağı birneşe jılğa arnalğan integraciyanıñ negizin qalaytın atalğan qwjattıñ erekşe mañızdı ekenin eskere otırıp, onı äli de talqılap, betpe-bet kezdesu barısında qabıldağan jön. Erte me, keş pe, biz bir-birimizben kezdesemiz, – dedi Memleket basşısı.

Sonımen qatar Prezident osı qwjatqa qatıstı birqatar tüsindirme jasadı. Qasım-Jomart Toqaev birinşi kezekte tauarlardıñ kedergisiz äri şekteusiz tasımalın is-jüzinde qamtamasız etu, sektorlar boyınşa taraptarmen kelisilgen birıñğay qızmet körsetu narığın kezeñ-kezeñimen qwru, ortaq energetikalıq jäne qarjı narığına dayındalu qajet dep sanaydı.

Memleket basşısı Odaqqa müşe elder arasındağı ekijaqtı ıntımaqtastıqtıñ köpqırlı ekenin atap ötip, onıñ ekonomikalıq, äleumettik, gumanitarlıq qatınastardı qamtitının jetkizdi.

– Sondıqtan atalğan mäselelerdi besjaqtı formatta Euraziyalıq ekonomikalıq komissiyanı qatıstıra otırıp qarastıru, onıñ naqtı iske asuın qiındatadı. Densaulıq saqtau, bilim jäne ğılım salaların Euraziyalıq ekonomikalıq komissiyanıñ qwzıretine tolıq kölemde beru, onıñ ekonomikalıq bağıtın aytarlıqtay özgertip jiberui mümkin. YAğni, 2015 jılğı Euraziyalıq ekonomikalıq odaq qwru turalı kelisimniñ mänine qayşı keledi, – dedi Qasım-Jomart Toqaev.

Qazaqstan Prezidentiniñ aytuınşa, integraciyalıq jwmıs wlttıq qwqıqtıq jüyeniñ erekşelikterin eskeruge tiis äri wlttıq zañnamanı üylestiru jäne birizdendiru mäselelerin qarastıru kezinde «jetkilikti qajettilik» qağidatın wstanuı kerek.

– Strategiyada  wsınılğan zañnamanıñ «üylestiruge jäne birizdendiruge» qatıstı qwqıqtıq jauapkerşilik ornatu bölimindegi äkimşilik jäne qılmıstıq, keden isi, tehnikalıq retteu, twtınuşılardıñ qwqığın qorğau siyaqtı birqatar sala, bizdiñ pikirimizşe, aqılğa qonımdı jetkiliktilik qağidatına äli de tolıq jauap bermeydi. Al bwl wlttıq qoğamdıq oy-pikirdiñ Strategiyanı qabıldamauına alıp keledi. Öytkeni Strategiya ükimetter men parlamentterdiñ derbes qwqığın şekteydi, – dedi Prezident.

Sonımen qatar Qasım-Jomart Toqaev Euraziyalıq ekonomikalıq komissiyanıñ ökilettigin keñeytu mäselelerine mwqiyat boluğa şaqırdı.

– Euraziyalıq ekonomikalıq odaqqa müşe-memleketterdiñ qızmet körsetu, özara sauda mäseleleri boyınşa üşinşi elmen ötkizetin ekijaqtı kelissözderine Komissiyanıñ qatısu qwqığın beru qosımşa zertteudi qajet etedi, – dedi Prezident.

Memleket basşısı däl qazirgi jağdayda Euraziyalıq ekonomikalıq odaqpen ıntımaqtastıqtıñ basım bağıtı ekonomikanı qayta qalpına keltiru mäselesi boyınşa qwrıluı kerek ekenin jetkizdi. Qasım-Jomart Toqaev Özbekstan Parlamentiniñ Euraziyalıq ekonomikalıq odaqqa baqılauşı memleket retinde kiru turalı şeşimin qwptadı.

Memleket basşısı özara sauda, biznesti qoldau, cifrlandıru jäne köliktik logistika salalarındağı ıqpaldastıq mäselelerin odan äri nığaytu jönindegi naqtı wsınıstarın ortağa saldı.

Birinşiden, Qazaqstan Prezidenti pandemiya kezinde payda bolğan barlıq şekteuler men kedergilerdi kezeñ-kezeñimen aludıñ josparın jasau qajet dep sanaydı.

– Bizdiñ densaulıq saqtau, sanitarlıq, veterinarlıq jäne özge de baqılauşı vedomstvolarımız dağdarıstan sabaq alıp, sonday-aq, bir jağınan azamattarımızdıñ densaulığın saqtaytın, ekinşi jağınan tauarlardıñ kedergisiz qozğalısın qamtamasız etetin ıqpaldastıqtıñ tiimdi mehanizmderin wsınuı qajet. Pandemiyağa qarsı küres kezinde, odan keyingi şekteuler alınğan kezeñde de kölik qwrılımdarınıñ, sanitarlıq qızmetterdiñ, şekaralıq vedomstvolardıñ jwmısı jüyeli boluı mañızdı, – dedi Qasım-Jomart Toqaev.

Memleket basşısı ekinşi mäsele retinde Euraziyalıq ekonomikalıq odaqtıñ aqparattıq jüyesin biriktiru jwmıstarın qolğa aludıñ mañızdılığın ayttı.

– Memlekettik organdarımızdıñ ıqpaldastıq ornatqan negizgi aspektilerin cifrlandıru arqılı bizdiñ elderimiz biznes-procesterdi jeñildetuge, özara tauar aynalımın arttıruğa, bizneske äkimşilik jüktemeni azaytuğa qol jetkizedi, – dedi Qasım-Jomart Toqaev.

Üşinşiden, Qazaqstan Prezidenti kölik-logistika qızmetin damıtu qajet dep sanaydı.

– Atalğan bastama ayasında biz wlttıq tauar ötkizu jüyesin qwrudı bastap kettik. Ol 2022 jılğa qaray 24 köterme-taratu ortalığınan twratın boladı. Bwl 5 million tonna auıl şaruaşılıq önimin saqtap, öñdep, taratuğa mümkindik beredi. Odaqqa müşe müddeli elderdiñ arasında tauar taratudıñ ortaq jüyesin qwru mümkindigin qarastırudı wsınamın, – dedi Memleket basşısı.

Qasım-Jomart Toqaev biznesti qoldau mäselesine de erekşe nazar audardı. Prezident qazirgidey dağdarıs kezeñinde Euraziyalıq ekonomikalıq odaqqa müşe memleketterdiñ barlıq resursı jwmıs orındarın twraqtandıruğa jäne saqtap qaluğa bağıttalğanın ayttı. Sonımen qatar Memleket basşısı Odaqtıñ şığını köp jekelegen şeşimderin orındau, atap aytqanda, qazirgi dağdarıs jağdayında keybir tauar türlerin mindetti türde tañbalau asa qajet emes dep esepteydi.

Qazaqstan Prezidenti Euraziyalıq ekonomikalıq odaqqa müşe elderdiñ qarjı-ekonomika ministrlikteri basşılarınıñ, jalpı ükimetterdiñ dağdarıstan keyingi kezeñdegi sırtqı sın-qaterler men ekonomikanı damıtuğa qatıstı şaralardı talqılau üşin arnayı alañ aşıp, onı belsendi qoldanudıñ mañızdılığın mälim etti.

Sammit qorıtındısı boyınşa Qasım-Jomart Toqaevtıñ wsınısımen «2025 jılğa deyingi euraziyalıq ekonomikalıq integraciyanıñ strategiyalıq damu bağıttarı turalı» qwjat negizinen maqwldanğanımen, qabıldanğan joq. Odaqqa müşe memleketterdiñ ükimetteri men Komissiyağa Strategiyanı pısıqtau tapsırıldı.

«Euraziyalıq bestiktiñ» köşbasşıları Joğarı Euraziyalıq ekonomikalıq keñestiñ kelesi otırısın 2020 jıldıñ küzinde Minsk qalasında ötkizuge uağdalastı.

Abai.kz

2 pikir