Jeksenbi, 7 Mausım 2020
COVID-19 QAZAQSTANDA. Jwqtırğandar — 12511. Jazılğandar — 7135. Qaytıs bolğandar — 53
Kübirtke 2438 18 pikir 2 Säuir, 2020 sağat 18:27

Tağı da şetelden qarız alamız

Qazaqstannıñ Qarjı vice-ministri Berik Şolpanqwlov bügin «Qazaqstan qarız beruge qauipsiz el. Sondıqtan biz äli qarız ala alamız», - dep süyinşilepti. «KazTag» habarladı.

«Memlekettik qarızdı anıqtaudıñ negizgi kriterileriniñ biri - onıñ qauipsiz deñgeyde boluı. Qazirgi uaqta qauipsiz deñgey - JİÖ-niñ 23,6%-ın qwraydı. Biz bwl deñgeyden asqan joqpız. Sondıqtan memlekettik qarız körsetkişi qauipsiz deñgeyde. Bwl degeniñiz - bizge qarjılay qarız alıp, onı ekonomikanı damıtuğa jwmsauğa mümkindik bar degen söz», - depti kişi ministr Şolpanqwlov.

Ministrdiñ sözinen wqqanımız - bizdiñ Ükimet şeteldik kreditorlar aldında senim limitin äli tauısqan joq. Sondıqtan, äli de qarız aluğa mümkindik bar eken. Sondıqtan, şetelden tağı da qarız alatın boptı.

Qazaqstan sırtqı narıqtardan şamamen 3 milliard dollar qarız aladı. Mwnı da jañağı kişi ministr Şolpanqwlov ayttı. «Zakon.kz» saytı jazdı. 

«Byudjet tapşılığın qarjılandıru üşin 2,4 trillion teñge qarız alu kerek. Onıñ işinde 3 milliard dollardı şeteldik kapital narıqtarınan aludı josparlap otırmız», - depti ministr.

Bwğan deyin ol dağdarısqa qarsı şaralarğa 5,9 trln teñge köleminde şığındar qajet bolatının, onıñ 2,5 trillion teñgesi byudjetten tıs qarajat esebinen jäne 3,5 trln teñge respublikalıq byudjetten bölinetinin aytqan.

Bile jüriñizder:

2019 jılğı qazan ayındağı körsetkiş boyınşa Qazaqstannıñ sırtqı qarızı - 157,7 milliard dollar

Onıñ işinde:

Wlttıq banktiñ qarızı - 634 million dollar;

Bankterdiñ qarızı - 4,6 milliard dollar;

Memlekettik basqaru organdarınıñ qarızı - 12,8 milliard dollar;

Firmaralıq qarız - 98,5 milliard dollar;

Basqa sektorlardıñ qarızı - 41,2 milliard dollar.

Al:

Qazaqstandağı eñ tömengi jalaqı - 42 500 teñge;

Qazaqstandağı eñ tömengi zeynetaqı - 38 636 teñge;

Qazaqstandağı ortaşa aylıq jalaqı - 203 900 teñge;

Aylıq eseptik körsetkiş - 2 651 teñge;

Eñ tömengi künköris deñgeyi - 31 183 teñge.

Al Wlttıq qor men Wlttıq banktiñ jalpı rezervi 90 milliard 425 million dollar bolğan.

Abai.kz

18 pikir