Jeksenbi, 7 Mausım 2020
COVID-19 QAZAQSTANDA. Jwqtırğandar — 12511. Jazılğandar — 7135. Qaytıs bolğandar — 53
46 - söz 1770 18 pikir 29 Naurız, 2020 sağat 11:57

Adam. Älde ekonomika. Qaysısın qwtqaru kerek?

Bükil älemniñ bügingi bastı dilleması – adam älde ekonomika, qaysısın qwtqaru kerek?

Ekonomikanı qoya twrıp, adamdardı qwtqarğan jağdayda, ekonomika qısqamerzimdi kezeñge ğana şıdaydı, bir aydan üş ayğa deyin. Al osı uaqıt aralığında koronavirustı jeñbesek, ekonomika, densaulıq saqtau, sayasat salalarınıñ qay-qaysısınıñ da jağdayı mäz bolması anıq. Bılayşa aytqanda, haos, deficit jäne ölim sanınıñ artuı orın aladı.

Eger virusqa män bermesten, ekonomikanı qwtqaratın bolsaq, virustıñ taraluı orasan zor masştabtı qamtıp, densaulıq saqtau jüyesi qattı zardap şegedi. Barlığımız aurudı jwqtırıp, 2%-dan 4%-ğa deyingi adamdar, äsirese, egde jastağılar, öledi. Viruspen bir auırıp şıqsaq, bizde immunitet qalıptasadı da, ekonomika tezirek ayaqqa twrıp, biz äri qaray qalıptı ömirimizdi jalğastıra alamız.

Meniñ oyımşa, qazir bilik strategiyalıq twrğıdan mañızdı, ömirlik qajettilikterdi qamtamasız etetin öndiris orındarınıñ tizimin jasauı kerek jäne bwl öndiris orındarı eşnärsege qaramastan, tipti, aspan aynalıp jerge tüsse de, jwmısın jalğastıra berui kerek. Olardıñ jwmıs jasauına tolıq jağday jasap, ekonomikanıñ qalğan sektorların karantinge jauıp tastau kerek. Boldı, nükte. Adamzat virusqa qarsı däri oylap tapqanğa deyin nemese densaulıq saqtau salasına artıq jükteme jasamay, bar halıq bir auırıp şıqqanğa deyin jalğız dwrıs amal – osı.

Amerikalıqtardıñ äreketine qaraytın bolsaq, olar ekonomikanı qwtqarudı tañdadı. Tramptıñ däyektemeleri mınaday:

Amerikalıqtar COVID-19 koronavirusınıñ taraluına qaramastan, jwmıstarına oraluı tiis. Bwl turalı Fox News telekanalınıñ efirinde AQŞ prezidenti Donal'd Tramp jariyaladı.

«Biz jwmısqa qayta oraluımız kerek. Twmaudan mıñdağan adam köz jwmadı. Sonda da, biz eşqaşan elimizdi «toqtatıp» tastamadıq. Odan da köp adam jol apatınan qaza boladı. Biraq, biz avtokölik öndiris orındarınan kölik jasaudı toqtatudı swrap jatqanımız joq», — dedi Amerika köşbasşısı.

Onıñ sözi boyınşa, iä, adamdar virustan ölip jatır, biraq, eger el kölemdi recessiya men depressiyağa tüsse, odan da köp adamınan ayırıladı.

Tramp AQŞ «jwmıssız qalu üşin jaralmağan» degen senimde.

Ol adamdar üyinde nemese päterinde qamauda otırudı qalamaytının atap ötti.

Al siz qalay oylaysız?

Marğwlan Seysembay 

Abai.kz

18 pikir