Beysenbi, 4 Mausım 2020
COVID-19 QAZAQSTANDA. Jwqtırğandar — 12067. Jazılğandar — 6606. Qaytıs bolğandar — 48
Anıq 2636 6 pikir 24 Jeltoqsan, 2019 sağat 14:50

«Qızılağaştıñ jigitteri erteñ bosap şığadı»

Bügin Almatı oblısı Aqsu audandıq sotında qıtay jwmısşıların soqqığa jıqtı dep ayıptalğan bez  azamatqa qatıstı kezekti sot otırısı ötti. Biraq ekinşi ret ötip otırğan sot otırısı tağı da keyinge qaldırıldı. Bwl jolı da qıtaylıq jäbirlenuşiler sotqa kelgen joq. Osığan baylanıstı, advokat Tölegen Berliqoja qılmıstıq is jürgizu kodeksiniñ 382-babı, 3-bölimine säykes isti qısqartu tärtibimen qaraudı swradı. Memlekettik ayıptauşı men sottaluşılardıñ kelisimin alğan sud'ya bwl ötinişti qabıl alıp, kelesi otırıstı erteñge belgiledi.

"Jetisu" gazetiniñ jazuınşa, ayıptalıp otırğan bes azamat prokurormen processualdıq kelisim jasasqan. Qoldau bildiru üşin arnayı kelgen belsendiler sottaluşılar mingen köliktiñ jolın bögep, azamattardı bosatudı jäne sottıñ sol sätte ötuin talap etken. Narazılıqtıñ artı tolquğa wlasauı mümkin dep qauiptengen arnayı jasaq ta kelip, jağdaydı baqılap twrdı. Qoğam qayratkeri Rısbek Särsenbay men Aqsu audandıq prokurorınıñ orınbasarı Ädilet Asqarwlı policeylerdiñ köliginiñ üstine şığıp, halıqtı sabırğa şaqırdı.

- Bauırlarım, säl sabır etiñizder! Aqıl kerek. Biz halıqpız, osınşa adam jinalıp twrğanına biz rizamız. El bar, qazaq degen halıq bar eldiñ namısın qorğaytın. Bes batır bolsa, bes batırdıñ artında bes mıñ, bes jüz mıñ, bes million halıq bar. Biliktiñ közin jetkizdik biz. Qazir säl sabır etiñizder. Zañ bar, tärtip bar. Tärtipke bağınuımız kerek. Men sizderdiñ attarıñızdan talap qoydım. Sot processin sozbasın. Sud'ya erteñge qaldırıp otır, soğan kelispey otırmız. Solay ğoy? Sondıqtan, bizdiñ talabımız, sot processin qayta bastasın. Qazir biz qaytadan ötiniş jasaymız. Jigitterdi erkindikke kepil arqılı, ne bolmasa qolhat arqılı, ne bolmasa üyqamaq arqılı bostandıqqa şığaruın talap etemiz. Jäbirlenuşilerdi keltirsin. Sot procesin qısqartsın, - dedi Rısbek Särsenbay.

Odan keyin audandıq prokurordıñ orınbasarı Ädilet Asqarwlı:

- Jerlester, barlıqtarıñız bilesizder. Jaña estidiñizder, sot procesin erteñge qaldıruğa kelisildi. Uaqıt kerek. Erteñ üştegi sot procesinnen soñ jigitter sot zalınan bosatıladı. Sondıqtan, Rısbek ağa aytqanday, zañğa bağınayıq, qoğamdıq tärtipti bwzbayıq. Şıdamdılıq tanıtayıq, kelistik pe? Bizdi de tüsiniñizder. Erteñ sağat üşte procestik kelisim bekitilgennen keyin jigitter sot zalınan bosatıladı, - dedi.

Sot processin sud'ya Jadıra Zarıqpaeva jürgizip jatır. Jeltoqsannıñ 20-da ötken alğaşqı otırısqa 100- ge juıq adam jinalıp, zalğa sıymağandıqtan monitor arqılı baqılağan bolatın. Ayta ketu kerek, 2 otırısqa da jäbirlenuşi qıtay azamattarı kelgen joq. Qorğauşı Tölegen Berliqoja bastağan sottaluşınıñ jaqtastarı sud'yağa birneşe ötiniş jasağan. Olardıñ negizgisi sottaluşılardı kepilmen bosatu jäne üyqamaqqa jiberu. Degenmen, sud'ya, äzirge bwl ötinişterdi qanağattandırğan joq.

Foto: 7-su.kz

Abai.kz

6 pikir