Jwma, 15 Qaraşa 2019
Qauip etkennen aytamın 2520 12 pikir 31 Qazan, 2019 sağat 14:17

Eldik mäseleni eşkimmen aqıldaspay şeşe almaysız, Ahmetov mırza!

Şığıs Qazaqstan oblısınıñ äkimi Danial Kenjetaywlı Ahmetov ötkende Kürşimdik jwrtpen kezdesipti. Öskemende. Söytip, özi basqaratın öñirde ornalasqan şekaralıq aymaqtardı damıtu üşin oblıs äkimdigi arnayı bağdarlama äzirleytinin aytıptı. Bwl turalı sayasatker Erlan Sairov äleumettik jelide habarladı.

Jazbadan wqqanımız oblıs äkimi Danial Ahmetov jañağı şekaralıq aymaqtardı damıtu bağdarlaması ŞQO qwramındağı Katon-Qarağaydı, Marqaköldi, Tarbağatay men Maqanşını qamtığanımen, jeke audan bolıp qayta qalpına keltirilmeydi depti-mis. Osını aytıp dabıl qaqqan Erlan Saiırovtıñ jazbasın talqığa wsınğandı jön kördik.

Erlan Sairov:

-ŞQO äkimi Danial Ahmetov jaqında Öskemende Kürşim audanınıñ aqsaqaldarımen kezdesip, oblıs köleminde şekaralıq aymaqtardı damıtudıñ arnayı bağdarlamasın jasau turalı ayttı.

Alayda, şekaralıq aymaqta ornalasqan Katon-Qarağay, Marqaköl, Tarbağatay, Maqanşı audandarı qayta qalpına keltirilmeydi eken.

Men bwğan nege män berip otırmın? Eger bwl audandar jeke şekaralıq-äkimşilik birlik bolıp qwrılsa, onda säykesinşe ol jaqqa maqsattı türde aqşa audarıladı. Al bwl degeniñiz – memleket osı aymaqtardıñ adami potencialın qayta qalpına keltiru üşin naqtı jağday jasaydı degen söz.

Alayda oblıs äkimi bwl audandardı qayta qalpına keltiruden bas tartıp, şeşim qabıldaptı. Meniñşe, bwl onıñ jeke şeşimi bolğan siyaqtı. Jergilikti şeneunikter men, mümkin, respublikalıq masştabtağı birli-jarım şeneunikten basqa eşkimmen aqıldaspağan boluı kerek.

Mine, ondağan mıñ äpke-bauırlarımızğa qatıstı şeşimder bizde osılay, kabinettiñ işinde, el-jwrtpen aqıldaspay-aq, qabıldanadı.

Qazirgi jüyeni azamattarğa qatıstı tağdırşeşti şeşimderdi qabıldauda şeneunikterdiñ osı formaldılığı qwrtadı.

Meniñ aytpağım, şekaralıq aymaqtardı damıtu turalı bağdarlama formaldı türde qabıldanadı. Al şındap kelgende mäsele şeşimin tappay jatadı.  Ärbir adamğa, olardıñ talap-tilegine kelgende köñil bölinbeydi. Deficit.

Däl osı şekaralıq aymaqtardan qazir jwrt jappay köşip jatqanı jasırın emes. Jwrttıñ bwlay üdere köşui bizdiñ tarihımızdağı eñ auır kezeñderdiñ özinde bolmağan şığar. Öskemen men Semeydiñ «daçaları» osı şekaralıq aymaqtı tastap kelgendermen tolğan. Olardıñ käsibi jwmıstarı da joq. Balaları balabaqşağa, tipti mektepke de ornalaspağan boluı mümkin. Älgi şekaralıq aymaqtan ketken keybir otbasılar sol boyı Almatı men Nwr-Swltandı jağalap jür.

Mine, osılayşa şekaralıq aymaqtar jwrtsız, qañırap bos qalıp jatır. Bizdiñ joğarğı lauazımdı şendilerimiz barıp demalğandı jaqsı köretin Katon-Qarağay men Marqakölde endi az degende jwmıs küşi de qalmaydı. Olardıñ ornına ärine, qıtaylar nemese basqalar jwmısşı bolıp keledi.

Bir ğana mısal, Marqaköl audanında 1992 jılı 25 mıñnan astam adam twrsa, qazir bar-joğı 6 mıñday ğana adam qalğan. Bwl fakt!

Ondağan mıñ adamnıñ tağdırın şeşerlik mwnday şeşimder (şeşkaralıq aymaqtardı damıtuğa qatıstı) meyli, mıñ jerden täjirbieli, jüz jerden avtoritet bolsa da, bir ğana adamnıñ maqwldauımen qabıldanbauı kerek.

Bwl bizdiñ wlttıq qauipsizdigimizge qatıstı, eldik mäsele! Men ŞQO äkimdigin halıqtıñ pikirimen sanasuğa, olarmen aqıldasuğa şaqıramın. Halıqtıñ müddesine jwmıs jasau kerek. Bwl mäsele barlığımızğa qatıstı. Bwl bizdiñ eldigimizge qatıstı mäsele. Qwday üşin, adamgerşilikten attamayıq. Mwnday mañızdı şeşimniñ qabıldanuına bärimiz aralasuımız kerek. Öz oy-pikirlerimizdi, wsınıstarımız ben talap-tilekterimizdi aytuımız kerek.

Men Ükimet pen ŞQO äkimdigine, şekaralıq aymaqtar turalı şeşim qabıldauda barlığı aşıq äri jan-jaqtı boluı kerek dep talap qoyamın!

1. Äueli qoğamdıq tıñdau boluı kerek. Oğan sol audandardıñ twrğındarı men qoğam ökilderi qatısuı kerek.

2. Respublikalıq masştabtağı sarapşılardıñ qatısuımen döñgelek üstel wyımdastırıluı kerek. Olar sol audandardıñ äleumettik-ekonomikalıq ahualın saraptauı kerek.

3. Oblıs aumağındağı ziyalı qauımnıñ pikirin estu kerek.

Kez kelgen tağdırşeşti mäsele qoğammen, halıqpen barınşa aşıq dialog arqılı talqınauı kerek. Tek sodan keyin ğana şeşim qabıldauğa boladı. Halıqtıñ talabın eskeru – mine, damudıñ jaña paradigması osı.

Jaña zaman mäseleni şeşudiñ jaña joldarın talap etedi. Memleket müddesi de osını közdeydi.  Men Danial Kenjetaywlına qwrmetpen qaraymın, biraq şındıq odan joğarı!

Abai.kz

12 pikir