«Бордо» мен «Қайрат» арасындағы матч екі ел клубтарының алғашқы кездесуі болмақ. Франция біздің футболшыларымыз еурокубок шеңберінде кездескен УЕФА-ның 38-ші елі болғалы отыр. Франция және Қазақстан футбол клубтары биылға дейін еурокубок аясында кездеспеген болатын. Бұл туралы sport.kz жазды.

21 тамызға қараған түні алматылық "Қайрат" клубы Еуропа Лигасының плей-офф кезеңінде Францияның "Бордо" командасына қарсы алғашқы матч өткізеді. Екі команда арасындағы кездесу Бордоның "Стад Бордо-Атлантик" стадионында Астана уақыты бойынша сағат 00.30-да басталады. Матчты "Қазақстан" арнасы тікелей эфирде таратады. 

Айта кетейік, қазақстандық клубтар әзірге Әзербайжан, Англия, Андорра, Гибралтар, Италия, Лихтенштейн, Люксембург, Македония, Мальта, Португалия, Сан-Марино, Солтүстік Ирландия, Уэльс, Фарер аралдары және Черногория футболшыларымен алаңда бірге доп теуіп көрген жоқ.

Естеріңізге сала кетер болсақ, Футболдан УЕФА Чемпиондар лигасының соңғы іріктеу кезеңінде «Астана» Кипрден келген АПОЭЛ командасын қабылдап, 1:0 есебімен жеңіске жетті. Кездесудің 14-минутында сол қапталдағы Фокси Кетевоманың әуелетіп берген добына бірінші жеткен Бауыржан Жолшиев есепті ашты. 18 тамыздағы ойынға «Астана» - АПОЭЛ матчы кезінде еурокубок сынына қазақстандық командалардың өз алаңында өткізген кездесулерінде бұрын-соңды болмаған келушілер санының жаңа рекорды тіркелді. Матч кезінде «Астана Арена» стадионына 30 000 жанкүйер жиналды.

Абай-ақпарат