Ресей президенті Владимир Путин кеше «Казахстанская правда» газетіне сұхбат беріп, Қазақстанда орыс тілін үйрену қажеттілігі бар екенін және соған байланысты мектептер салуға дайын екенін айтты.

Оның айтуынша, Қазақстанда Ломоносов атындағы Мәскеу мемлекеттік университетінің және Ресейдің басқа да жоғары оқу орындарының филиалдары табысты жұмыс істеп жатқан көрінеді. Қазақстанда Ресейдің басқа жоғары оқу орындарының филиалдары да табысты жұмыс істейді.

«Қазақстан Республикасында орыс тілін оқу қажеттілігінің артып келе жатқанын ескере отырып, біз бірлескен білім беру инфрақұрылымын кеңейтуді көздеп отырмыз. Мысалы, біз Қазақстан Республикасындағы мектептерді салу және білім беру қызметінің басқа да түрлерін дамыту бойынша жинақталған тәжірибені қолдануға және кеңейтуге дайынбыз, бұл Қазақстандағы орыс тілді мектептердегі білім беру сапасын арттыруға және елдеріміз арасындағы екіжақты ынтымақтастықтың қарқынды дамуын көрсететін маңызды жобаға айналады», – деп қосты Ресей басшысы.

Путин өз сөзіне дәйек ретінде Абайдың ойларын алға тартты.

«Орыс әдебиетінің классиктерін қазақ тіліне аударған қазақтың халық ойшылы, ағартушысы Абай Құнанбаев айтқандай, «жамандықтан аулақ болу, жақсылыққа жету үшін орыс тілін, орыс мәдениетін білу керек». Ол оларды «өмір кілті» деп атады», – деді ол.

Солтүстік іргедегі көршіміздің басшысы аталмыш сұхбатта орыс тілі ұйымын құру бастамасын көтергені үшін Тоқаевқа алғыс айтты.

«Орыс тілі – біздің ортақ мұрамыз және бәсекелестік артықшылығымыз екені сөзсіз, бірақ ең бастысы, ол орыс-қазақ достығын нығайта түсетін маңызды фактор. Мен Қазақстан Президенті Қасым-Жомарт Тоқаевқа халықаралық орыс тілі ұйымын құру бастамасы үшін алғыс айтамын. ТМД-да орыс тілінің жылы деп жарияланған 2023 жылдың осы жылдың 13 қазанында Достастық Мемлекеттер басшылары кеңесінің Құрылтай келісімі мен осы құрылымның Жарғысына қол қою туралы шешім қабылдауының символдық мәні бар. Бұл біздің халықтарымызды одан әрі жақындастырудың қуатты факторы болатынына сенімдімін», – деді ол.

Естеріңізге сала кетейік, Қазақстан президенті Қасым-Жомарт Тоқаев та кеше ресейлік басылым – «Известия» газетіне сұхбат беріп, Ресейдің Қазақстанмен шекаралас облыстарында қандастарымыз үшін мектептер ашылатынын мәлімдеген еді.

Abai.kz