9 qarashada Qaraghandy oblystyq sotynda «Ahmetov isi» boyynsha «Topar jylyjaylary» qúrylysyna qatysty jetinshi epizodty qarau jalghasty.

Býgingi sot otyrysynda sottalushy, ispandyq «Rufera Technoagro S.L» kompaniyasynda menedjer bolyp istegen Kәmila Pirәliyeva týsinik berdi. Ayta ketelik, búghan deyin kuәgerlerden jәne sottalushylardan sotta jauap alu kezinde «Topar jylyjaylaryn» salu ýshin ispandyq «Rufera Technoagro S.L» firmasymen kelisim jasalyp, jobanyng qúny 3 mln. eurogha әdeyi kóterilgeni mәlim bolghan. Tergeuding núsqasy boyynsha eks-premier S. Ahmetovting «Topar jylyjaylary» JShS-ning qúrylysyna «QazAgroqarjy» últtyq kompaniyasynyng enshiles mekemesi 15 mln. euro qaryz aqsha bóledi. Biraq ony bólu ýshin kәsiporyn iyesi qarjylandyrudyng 15 payyzyn óz moynyna aluy tiyis. Jylyjay iyesining múnday aqshasy bolmaghandyqtan ispandyq firmagha qondyrghynyng qúnyn 3 mln. eurogha kóterip kórsetuge úsynys jasalady.

Sottaghy sózinde K. Pirәliyeva 2012 jyly sәuir aiynda «Topar jylyjaylary» JShS-ning diyrektory A. Zabirovpen qalay tanysqany, jylyjay keshenning qondyrghylaryn jetkizetin ispandyq kompaniyamen arada mәmile qalay jasalghany jóninde әngimeledi. «2012 jyly sәuirde Almatyda ótken kórmede A. Zabirovpen tanystym. Ol 8 ga jerge jylyjay salugha josparyn aityp, aumaghyn kóruge úsynys jasady. Jobanyng qúny bastapqyda shamamen 15 mln. euro dep belgilendi. Búl óte iri joba bolghan song kommersiyalyq úsynys dayyndaugha kompaniyanyng barlyq qyzmetkerleri qatysty. Biz kommersiyalyq úsynysty bir ay uaqyt dayyndadyq. Týpkilikti sheshimdi kompaniya basshylyghy ghana aita alatyn. Men shetelden kelgen qújattardy «QazAgroQarjy» kompaniyasyna jetkizip otyrdym».

A. Zabirov qondyrghynyng qúnyn әdeyi kóteruge úsynys jasaghanda, ol kelissózderge qatysugha «Rufera Technoagro S.L»-tyng bas diyrektory Hose Antonio Moralesti shaqyrady. Qazaqstandyqtar men ispandyqtar eki ret kezdesip, sonyng songhysynda mәmilening talaptary ashyq aitylady. Búl oqighanyng qalay bolghanyn kuәger K. Pirәliyeva bylay әngimeledi: «Biz H. A. Morales ekeumiz kezdesuge bardyq. Aldymen jobanyng tehnikalyq detalidary talqylandy. Sodan song qarjy mәselesi aityldy. Jobanyng qúnyn 3 mln. eurogha kóteru úsynylghanda bas diyrektor menen: «Siz búghan senimdisiz be?» dep súrady. Ol 3 mln. euronyng ýlken soma ekenin bildi. Osy kezde A. Zabirov sózge aralasyp: «Búghan bola uayymdaudyng keregi joq. Bizding joghary lauazymdy aksionerimiz bar. Ol barlyq mәselelerdi sheshe alady» dedi. Odan әride bizge aqshany Qazaqstangha qaytaratyn tórt kompaniyanyng derektemelerin jiberdi. Biz qaytarylatyn aqshanyng basqa maqsatqa qoldanylatynyna eshqanday kýmәndanghan joqpyz».

Kezdesuding nәtiyjesinde taraptar mәmilege kelip, «Rufera Technoagro S.L» qazaqstandyq kompaniyalardyng shotyna 2 mln. 600 myng euro audarady. 400 myng euro jýkti kedendik resimdeu kezindegi qosymsha shyghyndargha júmsalady. Sottalushy K. Pirәliyeva sonday-aq qazaqstandyq «Vodovodstroy», «TorgPromStroy», «Kazintraktiv 21 vek» jәne «Renessanse» JShS-men jalghan kelisim jasalghanyn habarlady. «Kelisim jasalar kezde ispandyq kompaniyagha jobanyng qúnyn 3 mln. eurogha әdeyi ósiruge jәne ol aqshany Qazaqstangha qaytarugha talap qoyyldy. Biz búl aqshanyng múnday iri mәmile jasaugha arnalghan para ekenin sezdik. Bas diyrektor bastapqyda búghan keliskisi kelmedi. Biraq ony tәuekelding óte az ekenine sendirdi. Biz eki jaghdaydy (birinshisi – kimmen mәmilege kelgenimizdi, ekinshisi – kompaniya ýshin ekonomikalyq tiyimdilikti) eskerip, úsynylghan syzbagha kelisim berdik», – dedi ol sotta.

Ámina BÁKIR

Abay-aqparat