Jwma, 18 Qazan 2019
Qwyılsın köşiñ 1678 39 pikir 8 Qazan, 2019 sağat 11:26

«Praktika» izdep AQŞ-qa sabıludıñ qajeti joq!

Qazaqstan Respublikasınıñ

Prem'er-ministri

Asqar Maminniñ nazarına!

Aldıñğı aptanıñ beysenbi küni Mäjiliste «Qazaqstan Respublikasınıñ keybir zañnamalıq aktilerine halıqtıñ jwmıspen qamtıluı jäne köş-qon mäseleleri boyınşa özgerister men tolıqtırular engizu turalı» Zañınıñ jobasın talqılauğa arnalğan Jwmıs tobınıñ jetinşi otırısı ötkenin ayttıq.

Osı otırısta «Halıqtıñ köşi-qonı turalı» zañınıñ «Oralmandardıñ qwqıqtarı men mindetteri» degen 26-babına tolıqtıru engizip, qandastarımızğa «Qazaqstan Respublikasınıñ azamattığın alğannan keyin tuğan jerin twrğılıqtı jerine bir ret özgertip jazuğa;» qwqıq beru turalı wsınısımızdıñ talqığa tüskenin jaqsı bilesizder.

Atalğan wsınıs turalı aldıñğı jazğan «Deputat Quanış Swltanovqa hat» jäne «Wltıña degen Wlı mahabbatıñ bolsa, bärin jasauğa boladı!» degen maqalalarımızda sebep-saldarın tüsindirip, birşama qisındar men negizder ayttıq.

Qazir BAQ-ta bwl mäseleni jwrt qızu talqılap jatır.

Osı mäsele jöninde deputat Käribay Mwsırman ağamız «Älem elderinde osınday praktika bar ma eken? Bilu kerek! Negizi, joq şığar dep oylaymın. Biraq, key elderdiñ pasporttarı men jeke kuälikterinde azamattıñ qay eldiñ azamatı ekendigi körsetilgenimen, tuğan jeri körsetilmeui mümkin. Osı mäseleni anıqtap biluimiz qajet!» - dep, oypıl-toypıl oyların ortağa salıp, maqalamızdıñ soñına komentariy qaldırıptı.

Şaması, deputattar izdenis üstinde sekildi...

Biraq, biz taptıq. Bar eken!

Alısta emes, jap-jaqın – irgemiz tiip twrğan mına Şığıstağı körşimiz Qıtay Halıq Respublikasında!

Özderiñiz jaqsı bilesizder, 1916 jılı Resey imperiyasına qarsı şıqqan eñ iri wlt-azattıq köterilistiñ kezinde qazaq pen qırğızdıñ bir böligi Şığıs Türkistan aumağına ötip ketti. Tarihşı Säulebek Rüstemovtiñ deregi boyınşa, ol bosqındarınıñ jalpı sanı 300 mıñ adam eken.

Tarihşı Talas Omarbekov ağamız Qıtaydağı KSRO barlauşılarınıñ qwpiya bayandaularındağı derekterine süyene otırıp, 1931-1933 jıldardağı aşarşılıq qarsañında Qıtay asqan qazaqtıñ jalpı sanı – 49 mıñ 759 adam ekenin jazıptı.

Auğanstan, Iran elderine ketken qazaq qanşa ma?!

Qıtay asqan qazaqtardıñ bir böligi ötken ğasırdıñ eluinşi-alpısınşı jıldarı Keñestik Qazaqstanğa qaytıp köşip keldi. Odan qalğanı Täuelsizdik jıldarınan beri Täuelsiz Qazaqstanğa oralu üstinde.

Sol 1916 jılı Qıtayğa ötkenderdiñ közi tirisi qalmağan bolar, al 1931-1933 jıldardağı auğandardıñ birazı äli ömirde bar.

Bir qızığı, sol qazaqtardıñ ötken ğasırdıñ eluinşi-alpısınşı jıldarı Qazaqstanğa qaytpay qalğandarınıñ bäriniñ jeke kuäligi men tölqwjatında  tuğan jeri «Keñes Odağı» nemese «Säbettik Qazaqstan» emes, «Qıtay Halıq Respublikası» dep jazulı twr!

Jüz mıñdağan qazaqtı «Öz jerimde tuğan!» dep, Qıtay mwnı SSSR-ıñızdıñ ısqırıp twrğan kezinde jazıp alğan bolatın. Qazir, tölqwjattağı tuğan jeriñiz bılay twrsın, wltıñızdı öşirgeli jatır Qıtay!

Söytip, Qıtaydan kelip, «Oralman» atanıp jürgen qazaqtıñ birazı kezindegi Keñestik Qazaqstannıñ töl tuması.

Mine, deputat Käribay Imanjanwlı ağam izdep otırğan «Älemdik praktikanıñ» eñ ozıq häm öktem ülgisi.

Sol üşin Qıtaydı jazağa tartqan halıqaralıq zañdı estidiñizder me?

Auğanstan, Iran elindegi qazaqtardıñ tölqwjatın tekserip köruge boladı.

Al, odan arı «praktika» izdep, AQŞ-qa sabıludıñ qajeti joq!

Qabıldau kerek bwl wsınıstı!

Auıt Mwqibek

Abai.kz

39 pikir