Düysenbi, 18 Qaraşa 2019
1396 0 pikir 29 Tamız, 2019 sağat 16:16

Eriktiler arıstıq ata-analarğa balaların mektepke dayındauına kömektesip jatır

Bir top erikti jarılıstan zardap şekken Arıs qalası twrğındarınıñ jaña oqu jılına dayındaluına kömektesip jatır.

Belsendi Bella Orınbetovanıñ aytuınşa, tamız ayınıñ basınan bastap eki apta boyı balaların mektepke äzirleude qiındıq körip otırğan otbasılarğa arnap, qarajat jinalğan. Oğan respublikanıñ tükpir-tükpirinen jüzdegen adam üles qosıp, şamamen 900 mıñ teñgege juıq aqşa jinalğan. Oğan mektepke qajet ryukzak, däpter, qarındaş satıp alınğan.

Eriktiler jinalğan qarajat esebin Facebook-tağı "Arıs.Aqparat" arnayı tobında jariyalap otırğan. Bella Orınbetovanıñ sözinşe, 300 otbasığa kömek berilgen. Eriktiler kömekke mwqtaj otbasılardıñ tizimin äkimdikten alğan.

- Biz bwğan deyin äkimdikten "Jaña oqu jılı qarsañında otbasılarğa kömek berile me, berilmey me" dep swrağanbız. Olar oğan şamamız jetpeydi dep ayttı. Osılayşa özimiz jasayıq dep kelistik, - deydi Bella Orınbetova. Onıñ aytuınşa, kömek akciyasına türli jastar wyım ökilderi qatısqan.

Türkistan qalasınan kelgen erikti Ğani Temiräliwlınıñ aytuınşa, üş künnen beri tört erikti eki kölikpen Arıs qalasında qajetti zattardı twrğındarğa ülestirip jatır.

- Jağdayı naşar otbası men üyi bülingen twrğındarğa taratıp jatırmız. Bir otbası mektepke dayın, biri dayın emes. Keybiri "biz tizimde nege joqpız? Nege bizdi qospağan?" dep te renjip jatır. Bizdiñ özimizge habarlasıp, kömek swrap jatqandar da bar. Arasında kiim swrağandarı da boldı. Şamamız kelgenşe qamtamasız etuge tırısıp jatırmız. Qazir 11 otbasını tappay qaldıq. Olardıñ üyi bülingen, biraq qalada emes eken. Olardı tauıp, ülestiruimiz kerek, - dedi Arıs qalasında jürgen Ğani Temiräliwlı.

2019 jılğı 24 mausımda Arıs qalasındağı äskeri oq-däri qoymasında jarılıs bolıp, jergilikti ondağan mıñ twrğın meken jayın tastap qaşuğa mäjbür bolğan. Olardıñ köbi qaladan öz küşimen şıqqan. Jarılıstan tört adam mert bolğan.

28 tamızda bilik Arıs twrğındarına üylerine oraluğa rwqsat berdi. Jergilikti biliktiñ mälimetinşe, jarılıs saldarınan qaladağı üylerdiñ 85 payızı bülinip, 20-dan astam üy örtenip ketken. Ükimet Arıstağı bülingen twrğın üyler men äleumettik nısandardı byudjet esebinen qalpına keltiruge uäde etken. Qalada jöndeu jwmıstarı äli jalğasıp jatır. Twrğındardıñ keybiri jöndeu jwmıstarına köñili tolmaytın aytadı.

Soñğı on jılda Arıs qalasında äskeri oq-däri saqtalatın qoymalar men olardı joyuğa arnalğan jerde tört ret jarılıs bolıp, birneşe adam qazağa wşırağan. Biıl mausımdağı jarılıstan keyin qorğanıs ministrligi äskeri oq-däriniñ "eldimekenderden aulaq jerge" köşiriletinin mälimdegen.

Arıs qalasında 45 mıñğa juıq adam twradı.

Abai.kz

0 pikir