Särsenbi, 20 Qaraşa 2019
Alañ 20049 17 pikir 8 Tamız, 2019 sağat 13:20

Arıstağı apatqa "mektep meñgeruşisi" ğana kinäli...

Memleket basşısı Qasım-Jomart Toqaev qızmetine salğırttıq tanıtıp, Arıs qalasında ornalasqan äskeri qaru-jaraq qoymasındağı apattıñ tuındauına jol bergen birqatar şendilerdi jazaladı.

Özine jüktelgen mindetterdi tiisti deñgeyde orındamağanı jäne qaru-jaraq pen oq-därilerdiñ qauipsizdigin jäne saqtaluın qamtamasız etu jwmısındağı, Qaru-jaraq pen oq-därilerdi saqtau ob'ektilerin köşiru jäne ornalastıru bağdarlamasın iske asıru kezindegi eleuli kemşilikteri, sonıñ saldarınan Arıs qalasında ornalasqan äskeri bölimşedegi qaru-jaraqtıñ jarıluına jäne qalada adam şığınına wşıratqan auqımdı apatqa jol bergeni üşin:

Qazaqstan Respublikası Qorğanıs ministri bolıp qızmet atqarğan Säken Ädilhanwlı Jaswzaqov Qazaqstan Respublikasınıñ Qarulı Küşteri jüyesinen şığarıldı.

Al Qorğanıs ministriniñ birinşi orınbasarı Mwrat Käribaywlı Bektanov pen bwrın Qorğanıs ministriniñ birinşi orınbasarı bolğan Mwrat Jälelwlı Maykeevke qatañ sögis jariyalandı. Sonımen qatar, bwrın Qorğanıs ministriniñ orınbasarı bolğan Talğat Jeñiswlı Janjümenovqa da däl osınday jaza tağayındaldı.

Beybit künde bombı jarılıp, beyğam otırğan halıq üyin tastap bosıp ketken jarılıs üşin bireu jauapqa tartılğanı jön-aq. Sol üşin de el Prezidenti Qorğanıs ministrliginde bwrın jäne qazir qızmet istegen şendilerdi jazalap otır.

Endi bizdiñ aytpağımız, osı apatqa tek Säken Jaswzaqov pen onıñ komandası ğana kinäli me?! Prezident jarlığı boyınşa, bwrınğı ministr men onıñ eki orınbasarı jazağa iligip otır. Qazirgi ministrlik ökilderinen bir şendi ğana qatañ sögis aldı. Al ministrlikti Jaswzaqovqa deyin basqarğandardıñ bäri "sudan qwrğaq şıqtı".

Säken Ädilhanwlı atalğan vedomstvonı  2016 jılı 13 qırküyten 2018 jılı 7 tamızğa deyin basqardı. Eki jılğa anıq tolmaydı. Elimizdiñ äskeri salasında mol täjiribege ie saqa maman ötken jılı ministrlikten ketip, universitet meñgeruşisi lauazımına tağayındalğan. Ol kisiniñ Qorğanıs ministrligindegi eki jıldıq qızmetine täuir bağa beretinder köp. Biraq, aynalası eki jılda Arısta otız jıl boyı jatqan qaru-jaraq qoymasın tazalap ülgirmegen eken. Sol üşin jauap berip otır, mine!

Al odan bwrınğı jäne keyingi ministrler şe?! Jaswzaqovtan bwrın elimizdiñ qorğanıs salasında segiz ministr auısqan. Tipti, Mwhtar Altınbaev bwl qızmetti eki kezek atqarıp, ministr kreslosında 9 jıl otırğan. Bwdan bölek, Danial Ahmetov, Ädilbek Jaqsıbekov, Serik Ahmetov, Imanğali Tasmağambetov qatarlı kisiler osı teriniñ pwşpağın ilep körgen. Bwlardıñ işinde Ädilbek Jaqsıbekov bes jıl boyı osı qızmettiñ tizginin wstağan.

Eki jıl qızmet istegen Säken Jaswzaqov ğana emes, tura 20 jıl boyı tük tındırmağan joğardağı ministrlerden de jauap alu kerek. Sebebi, Arıstağı qoymada jarılıs birinşi ret bolıp otırğan. Bwğan deyin de birneşe märte apat bolıp, adam şığını orın alğan. Sondıqtan, Arıs oqiğasına baylanıstı jauapqa tartılatındardıñ sanı bwnday az bolmau kerek edi.

Qazirgi ministr Nwrlan Ermekbaevtiñ bwl qızmetke kelgenine bir jıl ğana boluı onı jauapkerşilikten araşalay almaydı. Jwmıs isteymin degen adamğa bir jılda az uaqıt emes. Alayda Nwrlan Baywzaqwlı bwl bağıtta eşteñe istemegen eken. Tipti äskeri qaru-jaraq qoymasında jarılıs bolu qaupi bar ekenin bilmegen de sekildi. Äytpese, Arıstağı oqiğanı "tabiği apat" dep aydı aspanğa şığarmas edi.

"Bwl bizdiñ kinämiz deuge bolmaydı. Bwl tabiği apat. Ärbir arsenaldıñ qauipi bar. Äzirge halıqtan keşirim swraudıñ eş sebebin körip twrğan joqpın", - degen Ermekbaev mırza şınımen de jauapkerşilikten qwtılıp ketti. Onıñ ornına bir orınbasarı qatañ sögis estidi. Aydıñ-künniñ amanında atpalday üş azamat qaytıs bolğan, Qırıq mıñnan asa qala twrğını baspanaların tastap, basqa öñirlerdi uaqıtşa panalauğa mäjbür bolğan iri apat üşin jauaptı şendilerdiñ alğan jazası osı ğana boldı.

Arısta alğaş jarılıs bolğanda oqiğa ornına el prezidentiniñ özi arnayı bardı. Halıqqa kömektesudi, qirağan üylerdi qalpına keltirudi tapsırdı. Osı bağıtta jwmıstar jürip jatır. Ükimettiñ esebinşe, Arıstağı qwrlıs jwmıstarı ayaqtaluğa jaqın. Bwl apatqa memleket basşısınan tartıp, bükil Qazaqstan halqı nazar audarıp, twrğındarğa kömektesip jatır.

Biraq bizdiñ bilik qaşanğı ädetinşe "attan tüsse de, üzeñgiden tüskisi kelmey" otır. Jarılıstıñ sebebin anıqtap, kinälilerdi jazalap, bwnday keleñsizdikti endi boldırmaudı oylap otırğan joq. Bwl apattıñ tuındauına tikeley jauaptı adamdar tağı da jazasız qalmaq. Basqaşa aytqanda, wzaq jıldar boyı birneşe kezekti iri şendilerdiñ qateliginen orın alğan apat üşin jalğız "mektep meñgeruşisi" ğana jauap beretin sekildi...

Quanış Qappas

Abai.kz

17 pikir