Düysenbi, 21 Qazan 2019
Masqara! 3202 28 pikir 28 Mausım, 2019 sağat 18:29

Elbası sözin "it tartqan tulaqşa" jwlmalağan kim?

Bizdiñ elde keybir memlekettik mekemelerdiñ memlekettik tildi moyındağısı kelmeytini ökinişti. Qazaq tiliniñ qazaq elinde ögey küy keşip jüruiniñ bastı sebebi de osı.

Pavlodar oblısı, Jelezin audanındağı «Jelezin jalpı bilim beretin №1 orta mektebi» memlekettik tilge degen qwrmetsizdiktiñ elde joq «ozıq ülgisin» körsetip otır. Twtas söylemdi män-mağınası joq qoyırtpaqqa aynaldırğan jelezindikterdiñ janında birer äripten nemese sözden jañılğandarmen jılap körisetin sekildimiz.

Jelezindikter nağız jürek jwtqandar eken. Basqa-basqa Twñğış Prezident Nwrswltan Nazarbaevtiñ sözin it tartqan tulaqşa jwlmalaptı. Tap mına söylemniñ qate ekenin qazaq tilinen az ğana sauatı bar adam da bayqar edi. Sonda bükil bir audanda memlekettik tildi biletin bir adam bolmağanı ma?!

Mätindi qarañız:

«Oficer – bwl twraqtı şama äskerler, ortalıq figura, mi joldas ta qorığa äskerler, wyımdastıruşı Jeñister

N.Ä.Nazarbaev

7440 oficerlerdiñ soğıstardağı jılda Keñes odağınıñ qaharmanıñ atağı layıqtağan, 115 oficerlerdiñ olardıñ oları eki ret»

Atalğan mekteptiñ alğaşqı äskeri dayındıq kabinetiniñ qabırğasında osınday «körkem mätin» közge wrıp twr. Mına söylemnen birdeñe tüsinu mülde mümkin emes. Tipti eletrondı audarmaşılardıñ özi mätindi mınaday mänsiz etip audarmaytın şığar. Bwl memlekettik tildi mensinbeu, qorlau jäne barıp twrğan masqara!

Reseymen şekaralas jatqan Jelezin audanında qazaqtardıñ üles salmağı -  40,5 %. al orıstar - 46,15% eken. Audandı qazirgi tañda Qanat Şaymardanwlı Qaşkirov basqarıp otır. Ömirbayanın şolıp şıqqan edik, tek Pavlodarda oqıp, Pavlodarda qızmet etip kele jatqan azamat eken. Qol astındağı bildey bilim beru oşağı qazaq tilin däl bwlay qorlağanına qarağanda, basşısınıñ özi memlekettik tildi meñgermegen boluı mümkin.

Soltüstiktegi körşimizdiñ salqını qattı tigeninen bolar, elmizdiñ tüstik aymağı memlekettik tilge bey-jay qaraydı. Al biz söz etip otırğan mına jağday mülde şekten şıqqandıq. Sol üşin de audan äkiminiñ atın atap, tüsin tüstep otırmız. Memlekettik tilge qwrmetsizdik tanıtqan jauaptı adamdarğa tiisti şara qoldanudı talap etemiz.

Quanış Qappas

Abai.kz

28 pikir