Seysenbi, 19 Qaraşa 2019
Din 12676 39 pikir 1 Mausım, 2017 sağat 08:51

Caqal men "qara oramalğa" zañmen tiım salınadı

QR Din isteri jäne azamattıq qoğam ministrliginiñ

Memleket basşısınıñ dini sipattağı sırtqı atributikağa

zañmen tıyım saludı qarastıru tapsırması jelisinde

osı mäselege qatıstı wstanımı

Soñğı uaqıtta Qazaqstan qoğamın öz halqınıñ ruhani dästüri men islam dininiñ şınayı mänin tanımay jatıp, özderin  islam bilgirleri retinde körsetip, tuğan-tuıstarı men ata-analarına din üyretkisi keletin jastardıñ  körinis bere bastauı alañdatıp otır. Olardıñ keybireuleri şeteldik uağızşılardıñ aqıl-keñesterine közsiz erip, halqımızğa tän emes dini dästürlerge boy wra bastauda.

Mwnday azamattar negizinen dindarlıqtıñ sırtqı sipatına (atributikasına) basa köñil audaradı. Bey-bereket saqal ösirgen jigitter men özderin qara jamılğımen twmşalap alatın qızdar, şın mäninde, halqımızdıñ san ğasırlıq dästürli qwndılıqtarına jäne özderi ömir sürip otırğan zamanaui qoğamğa ses körsetkisi keledi.

Olar dindarlıqtıñ sırtqı sipatın qoldanu arqılı qoğamdağı köñil-küyge selkeu tüsirip, özderiniñ islam dinine qatıstı qate tüsinikterin basqalarğa tañğısı keledi. Bwl, öz kezeginde, qoğamımızdıñ dindar böliginde qalıptasqan dästürli qwndılıqtardıñ şayıluına alıp kelude.

Olar dindi şın nietimen qabıldağan är halıqtıñ öz dästürlerin wstanuın islam dini qoldaytının tüsingisi kelmeydi.

Mwnday adamdar özderiniñ birbetkey fanatizminde keyde tım şetke şığıp, radikaldıq qadamdarğa baradı. Mäselen, soñğı jıldarı elimizde teraktiler jasağan terroristik toptardıñ barlığı derligin osınday tım şetkeri fundamentalistik közqarastağı jastar qwrağan.

Sondıqtan bügingi künde destruktivti dini ağımdardıñ wstanuşılarına tän sırtqı atributtardı jariya körsetuge, sonımen qatar adamnıñ bet-jüzin tolıqtay nemese işinara jauıp twratın kiim türlerin zañnamalıq tosqauıl nemese şekteu qoyu mümkindigi qarastırıluda.

QR Din isteri jäne azamattıq qoğam ministri N.B. Ermekbaev QR Parlamenti Mäjilisiniñ Halıqaralıq ister, qorğanıs jäne qauipsizdik komitetiniñ a.j. 19 mamırda  Aqtöbe qalasında ötken köşpeli otırısında söylegen sözinde qara jamılğığa tıyım salu mäselesi oramal men hijabqa qatıstı emes ekendigin aytıp ketken bolatın. Tıyım salu nemese şekteu adamnıñ bet-jüzin anıqtauğa mümkindik bermeytin kiim türlerine (nikab, çadra, paranjı, közi ğana körinip twratın bas kiim) ğana qatıstı boladı.

Ministr öz sözinde «Memleket basşısı QMDB ökilderimen bolğan kezdesude özderiniñ jüris-twrısı men sırtqı türimen qoğamğa jik tüsiretin adamdardı ayıptağan bolatın. Atap aytqanda, kezdesude belgili bir dini ağımdardıñ wstanuşıları ekendigin jäne dini közqarastarın  jariya körsetu maqsatında qoğamğa aşıq türde jik tüsiruge jol bermeu kerektigi turalı aytıldı», - dep atap ötti.

Ministr memleket barlıq azamattardıñ müddeleri men qwqıqtarın qorğauğa mindetti ekenin, onıñ işinde sırtqı dindarlıqtı bildiretin jamılğınıñ arğı betinde qoğamğa qauip töndiretin adamnıñ twrmağanına senimdi bolğısı keletin jäne odan qorğanğısı keletin adamdardıñ  müddeler men qwqıqtarın qorğauğa mindetti ekenine nazar audardı.

Osı rette bolaşaqta qabıldanuı mümkin şekteuler men tıyımdar kez-kelgen konfessiyanıñ dini qızmetkerlerine, şetel azamattarına (eger qoğamdıq qauipsizdikke qater töndirmeytin jağdayda) jäne adamnıñ bet-jüzin jasıratın kiimdi medicinalıq sebeppen kietin adamdarğa nemese qızmettik qajettilikpen baylanıstı jağdaylarğa taralmaytın boladı.

Eger adamnıñ saqalı öziniñ sırtqı türimen jwrtşılıqtıñ keleñsiz pikirin tudırmaysa, destruktivti ağımdardıñ wstanuşısınıñ belgisi bolıp tabılmasa saqal qoyuğa tıyım salınbaytın boladı. Bwl jağdayda mäseleni adamnıñ basqa da sırtqı atributtarımen birge keşendi türde qarastıru qajet.

Elimizdiñ Konstituciyası men zañdarı ärbir adamğa senim  bostandığın beredi jäne dini senimderinen täuelsiz teñqwqıqtılıqtı kepildendiredi.

Qazirgi künde dini sipattağı sırtqı atributikağa zañmen tıyım saludıñ naqtı şaraları turalı aytu äli erte. Bwl jerdegi mäsele elimizdiñ damuınıñ zayırlı qağidattarı men dästürli mädenietimizden bas tartuğa aşıq türde şaqıratın jäne osı rette dini sipattağı sırtqı atributtardı qoğamnan bölip körsetetin qwral retinde paydalanatın dästürli emes dini ağımdardıñ äreketterine tosqauıl qoyumen baylanıstı.

Memleket basşısınıñ tapsırmasın orındau şeñberinde Din isteri jäne azamattıq qoğam ministrligi basqa da müddeli memlekettik organdarmen birlesip dini sipattağı sırtqı atributikağa zañnamalıq şekteu qoyu boyınşa elimizdiñ zañnamalıq bazasın, halıqaralıq täjiribeni jäne qoğamdıq pikirdi mwqiyat zerdeleu nätijesinde mäseleniñ oñtaylı şeşimin tabatın boladı.

Bizdi ilgeride ötken ata-babalarımız şınayı mwsılman kiimimen nemese sırtqı kelbetimen emes,  öziniñ  işki senimimen, imanınıñ küştiligimen, ömir sürip otırğan ortasına degen  meyirimdilimen jäne saliqalı aqıl-oyımen erekşelenedi dep üyretken.  Islam dininiñ jağımdı twsı – bwl jergilikti dästür men mädenietke toleranttı qarauı, olardan när aluı.

Biz bügingi künde sanamızdı jañğırtuğa, töl tarihımız ben ruhani baylımızdı saqtauğa jäne bayıta tüsuge bet tüzedik. Patriotizm, otanğa degen süyispenşilik, el işindegi twraqtılıq – bizdiñ bolaşağımız. Tez özgerip otırğan jahandanu däuirinde Qazaqstan öziniñ wlttıq qwndılıqtarın, mädenieti men dästürlerin saqtap qaluı tiis – öytkeni ol bizdiñ damuımızdıñ jäne ekonomikalıq örkendeuimizdiñ kepili.

Uaqıt dindi dwrıs tüsinu men wstanu üşin soğan säykes keletin dini mädeniet pen dästürdiñ kerek ekenin töreşi retinde körsetip otır. Dini dogmalardı oy eleginen ötkizbey naqpa-naq tüsinu jäne qoldanu öte qauipti.

Abay-aqparat

 

 

 

 

 

39 pikir