Jeksenbi, 23 Aqpan 2020
Hantalapay 4601 0 pikir 28 Qañtar, 2015 sağat 10:55

JOLAMANOV JOLDAN TAYĞAN JOQ PA?

Wlttıq qauipsizdik komitetine qarastı Şekara qızmetiniñ bwrınğı direktorı Nwrlan Jolamanovqa (surette) qatıstı sot isi jalğasuda. Sottıñ kezekti otırısına kuäger retinde kelgen Şekara qızmeti basqaramasınıñ bwrınğı bas qarjıgeri Nwrjan Qilıbasov qilı jayttardı jayıp saldı.

Qilıbasovtıñ sözine qarağanda, ol Jolamanovpen bwrınnan tanıs-bilis körinedi. «WQK Şekara qızmeti basqaramasınıñ bas qarjıgeri qızmetine tağayındalğan kezimde men özimdi Jolamanovqa qarızdar adamday sezinip jürdim, äri odan qızmetimnen bir-aq künde qağıp tastay ma dep ölerdey qorqatın edim» dedi Qilıbasov sottağı kuälik sözinde.

Jolamanovtan zäre-qwtı qalmay qorıqqan Qilıbasovtıñ äri qarayğı äñgimesine qwlaq türsek, ol (Jolamanov) ne aytsa da bwl (Qilıbasov) bwljıtpay orınday bergen körinedi.

- Birde, - deydi Qilıbasov, -  general issaparğa şığatın boldı da, men oğan 5 mıñ dollar berdim. 3 mıñ dollardı soñınan «kişi zalda» tağı da qolına wstattım. «Bwl 3 mıñ dollar Almatıdağı toqalımnıñ jwmısına kerek» dedi ol.

Qilıbasov öziniñ zañsız äreketterge barğanına qınjıla otırıp: «Bärin amaldıñ joqtığınan jasadım», - dep aqtaladı.

Eks-qarjıgerdiñ sözderine sensek, general Nwrlan Jolamanov barlıq kelisim-şarttardan özine tiesili «sıbağasın» swrap, para alıp otırğanğa wqsaydı. «Biz qarjı mäselesin Jolamanovtıñ üyinde, üyiniñ keñ aulasında, keñsedegi demalıs bölmesinde keñesuşi edik», - deydi generaldıñ ilikidegi senimdi serigi.

Qilıbasov sotta Jolamanovtıñ mineziniñ qiındığın da jayıp saldı:

- General - aşuşañ adam. Şekara qızmetindegilerdi tım qattı qısıp wstadı. Olarğa tün jarımına deyin jwmıs istetip, keyde jeksenbi künderi de tınıştıq bermeytin. Sonday qıtımır, mazasızdığımen qosa bärimizge betiñ bar, jüziñ bar demey boqtap-boralap, döreki söyleytin.

Osılay dey kelip, Qilıbasov general Jolamanovtıñ tıqır tayağanda päleniñ bärin aynalasına jauıp, özi sudan taza, sütten aq boluğa tırısqanın ayttı.

- Birde ol jinalıs aşıp, Şekaradağı lauazımdı qızmet ielerine «Oñbağandar, sender keleñsiz iske wrınğalı jürsiñder, betteriñ jaman, şetiñnen wrısıñdar!» dey bastadı. Men sodan keyin jağdaydı tez tüsinip, bwdan bılay onıñ qoqan-loqqısına töze berudiñ mümkin emestigin oyladım da, qarsı barlau mekemesine arız jazdım jäne jasırıp qoyğan 24 million teñgeni qazınağa qayta qwydım, - dep ağınan aqtarıldı Qilıbasov sottağı kuälik sözinde.

Esteriñizge sala keteyik, Şekara qızmeti basqaramasınıñ eks-direktorı Nwrlan Jolamanov bıltır qazan ayında lauazımın asıra paydalanıp, iri kölemde para aldı degen küdikpen twtqındalğan bolatın. Jolamanovtıñ «joldan tapqan» qarjısı 252 million degen söz bar. Jolamanovtıñ qasında 2458-şi bölimşeniñ komandiri Qayrat Balmağanbetov te otır. Komandir qazir barlıq kinäsin moyındauda. Al, Jolamanov bolsa, tergeuge alınıp, twtqındaluın sayasi tapsırıs dep zar qağadı.

- Men eşqanday qılmıs jasağan joqpın. Meniñ osılay abaqtığa jabıluım wyımdasqan bir topqa kerek boldı. Meniñ basımdağı hal – sayasi tapsırıs, - dep qaldı ol sot zalınan şığıp, aydauda ketip bara jatqan kezinde baspasöz ökilderine qarap.

Rasında, Jolamanovtıñ basındağı ahual sayasi tapsırıs pa, älde ol jasağan qılmısı üşin qamauğa alındı ma? Bwl swraqtardıñ jauabına äzirge jete almaymız. Onıñ üstine, bizde adam tağdırına qatıstı qanday da bir jayttıñ wşpaq-pwşpağına jetu qiınnıñ qiını. Alayda, qızmetin adal atqarıp, öz isin ğana biletin kiside bılayğı jwrttıñ şaruası bola bermesi anıq. Qilıbasov pärmeni küşti äldebir toptıñ qısımımen qiıstırıp söyledi desek te, Jolamanovtıñ joldan tayğanın mülde joqqa şığara almaymız. Änşeyinde «jerimiz keñ baytaq» degende keremetpiz. Sol keñ baytaq jerimizdiñ tınıştığı men qauipsizdigin qalt jibermey qorğauğa, küzetuge tiis twlğalarımızdıñ türin qara. Jetibastı jalmauız siyaqtı aynalasın tonap, wrlap, jalmañdap toymay jür. Biz, ärine, ayıptauşı emespiz, biraq jolamanovtar qaytkende sot tarapınan naqtı jazasın aluı kerek.

Abai.kz  

0 pikir