Särsenbi, 16 Qazan 2019
«Soqır» Femida 6774 6 pikir 27 Naurız, 2017 sağat 18:16

Qadıralina zañğa bağınbay äli qasarısıp otır

 

Esteriñizde bolsa, 2017-jıldıñ 27-aqpanı küni  «Abai.kz» aqparattıq portalına Qaynar Kemelbekwlınıñ «QADIRALINANIÑ PREZIDENT QOL QOYĞAN ZAÑDI BWRMALAUĞA HAQISI BAR MA, MIRZAHMETOV MIRZA?!» (http://abai.kz/post/view?id=12850 ) attı maqalası jariyalanğan bolatın. Maqala şaruaşılıq qwru üşin Jer telimderin swrap ötiniş hat jazğan qandastarımızğa  Aqmola oblıstıq Jer qatınastarı basqarmasınıñ basşısı Almagül Qadıralinanıñ «Jer kodeksi» men «Halıqtıñ köşi-qonı turalı» Zañ jobasındağı normalardı bwrmalap tüsindirgen jauabına baylanıstı edi.

Jer swrağan qandastarımızğa däl sol Qadıralinaşa jauap bergen Aqmola oblısı, Ereymentau audanınıñ äkimi Ermek Nwğımanov turalı 13 naurız küni atalmış saytta «ERMEK NWĞIMANOV ELBASINIÑ ZAÑINA QARSI MA?» (http://abai.kz/post/view?id=13002 ) degen meniñ de maqalam jarıq körgen.

 

Atalğan eki maqalanıñ aldıñğısı  QR Prem'er-Ministriniñ orınbasarı, QR Auıl şaruaşılığı ministri Asqar Mırzahmetovtıñ atına jazılıptı.

 

10 naurız küni  Qazaqstan Respublikasınıñ Auıl şaruaşılığı birinşi vice-ministri Qayrat Aytuğanov «Nwr Otan» partiyasınıñ Respublikalıq qoğamdıq qabıldau bölmesinde  azamattarmen qabıldau ötkizgen kezde oralman ağayındar kelip, osı Jer mäselesine baylanıstı ötinişterin ayttı. Partiyanıñ Respublikalıq qoğamdıq qabıldau bölmesiniñ meñgeruşisi J.Jükenov te Auıl şaruaşılığı ministrliginiñ osı tüyinge nazar audaruın ötindi. Birinşi vice-ministri Q.Aytuğanov kömekşisi arqılı QR Auıl şaruaşılığı vice-ministri Erlan Nısanbaevqa tapsırma berip, qandastrımızdıñ Zañ boyınşa jer alu mäselesindegi kedergini şeşudi bwyırğan edi.

 

Bügin Auıl Şaruaşılığı ministrliginde Erlan Nwralıwlınıñ törağalığımen sol JER turalı jinalıs ötti.

 

Jinalısqa QR Auıl şaruaşılığı vice-ministriniñ keñesşisi Twrğanbay Täjmağambet, QR Auıl şaruaşılığı vice-ministriniñ Jer resurstarın basqaru komitetiniñ törağası Ermek Karentaev, onıñ orınbasarı Güljahan Bimendina, qwqıqtıq qamtamasız etu basqarmasınıñ basşısı Almas Toqsanbaev jäne Jer qatınastarın damıtu jäne jerge ornalastırudı damıtu basqarmasınıñ bas sarapşısı Asel Qırıqbaeva qatıstı.

 

Teleköpir arqılı baylanısqa şıqqan Aqmola oblıstıq Jer qatınastarı basqarmasınıñ basşısı Almagül Qadıralinanıñ qaytatın türi joq, äli qasarısıp otır. Birde «Jer zañnamasınıñ keybir normaların qoldanuğa moratoriy engizu turalı Qazaqstan Respublikası Prezidentiniñ 2016 jılğı 6 mamırdağı №248 Jarlığın», birde Qazaqstan Respublikasınıñ azamattığı turalı zañdı köldeneñ tartıp, biraz kösildi. Sondağı aytpağı: «Oralman» şeteldik, azamattığı joq adam nemese şeteldik zañdı twlğağa jatatın körinedi. Sondıqtan olarğa Jer beruge bolmaydı-mıs! Al, özi «oralman – tarihi otanında twraqtı twru maqsatında Qazaqstan Respublikasına kelgen jäne osı Zañda belgilengen tärtippen tiisti märtebe alğan, Qazaqstan Respublikası egemendik alğan kezde onıñ şeginen tıs jerde twraqtı twrğan etnikalıq qazaq jäne onıñ Qazaqstan Respublikası egemendik alğannan keyin onıñ şeginen tıs jerde tuılğan jäne twraqtı twrğan wltı qazaq balaları» dep, oralmandarğa zañda berilgen anıqtamanı zulatıp otır.

Biraq, Almagül Amanjolqızı osı anıqtamadağı «osı Zañda belgilengen tärtippen tiisti märtebe alğan» degen tüyindi tüsinip twrğan joq. Sonday-aq, anıqtamada «Oralmandardı» «şeteldik», «azamattığı joq adam» nemese «şeteldik zañdı twlğa» demey, «etnikalıq qazaq» jäne «onıñ wltı qazaq balaları» dep tayğa basqan tañbaday etip atap körsetkenin de añğaratın türi körinbeydi. «Jer kodeksiniñ» 46-babında, «Halıqtıñ köşi-qonı turalı» Zañınıñ 23-babında Oralmandarğa jer telimi beriledi dep ne üşin körsetilgeni Almagül Qadıralinanıñ qaperine kirip şığatın emes. Tipti, «Jeri bölisuge jatpaytın memlekettik auıl şaruaşılığı wyımdarınıñ qwramınan şıqqan jäne şarttı jer ülesi qwqığı bwrın berilmegen osı aumaqta twratın azamattardıñ, sonday-aq ORALMANDARDIÑ şarua nemese fermer qojalığın nemese auıl şaruaşılığı öndirisine baylanıstı özge de qızmetti jürgizui üşin arnayı jer qorınıñ jerinen birinşi kezekte jer uçaskesin aluğa qwqığı bar» degen «Jer Kodeksiniñ» 100-babın oqımağan körinedi.

 

Al, Ereymentau audanınıñ äkimi Ermek Nwğımanov Elbası qol qoyğan Zañğa senbey, audandıq prokuraturağa hat jazıp, «Oralmandarğa jer beruge bola ma, joq pa?» dep nwsqau swrap jür eken...

 

Qazaq köşi bastalğalı 25 jıl boldı. Köşi-qon sayasatı jolğa qoyılğalı da şirek ğasırdan asıp baradı. Al, Jer Kodesiniñ soñğı ret özgertuler men tolıqtırular engizilgenine de köp bola qoyğan joq. Onıñ bügingi sözderin tıñdap, şetten oralğan qandastarımızğa degen közqarasınıñ qay deñgeyde ekenin birden anıq añğardıq. Almagül Qadıralina men Nwğımanovtıñ bükil märtebesi men qwqığı zañmen erekşe bekitilgen öz qandastarın özge kelimsekterdiñ qatarına qoyuı nemese qoyuğa tırısuı – wyat! Masqara! Özi Zañğa şorqaq bolsa, zañgerleri men mamandarı ne bitirip otır?! Oralmandarğa Jer telimderin beruge kelgende Wlt Köşbasşısı Nwrswltan Nazarbaevtıñ  özi qol qoyğan Zañdarğa senbey, büyrekten siraq şığarğanı jınıñdı wstatadı eken!

 

Zañ boyınşa, Qardıralinalar men Nwğımanovtar oralmandarğa jerdi jerden şwqısa da tauıp beruge mindetti!

 

QR Auıl şaruaşılığı vice-ministri Erlan Nısanbaevtan bastap, jinalısqa qatısqan zañger – mamandar  «Jer zañnamasınıñ keybir normaların qoldanuğa moratoriy engizu turalı» Prezidentiniñ №248 Jarlığınnıñ oralmandarğa qatısı joq ekenin, «oralman» degenniñ öz aldına bölek märtebe ekenin aytıp edi, A.Qadıralinanıñ jüni jığılğanday boldı!

 

Aldağı jerde Jerge baylanıstı Zañdardı negizge ala otırıp, QR Auıl şaruaşılığı ministrligi Aqmola oblısınıñ Jer qatınastarı basqarmasına arnayı tüsinikteme hat tüsiretin bolıp kelisti.

 

A.Qadıralina sol hattıñ şeşimine qaray jwmıs jürgizedi.

 

Biz mäseleniñ oñ şeşiletinine bek senimdimiz!

 

Auıt Mwqibek

 

24.03.2017

Astana

 

6 pikir