Beysenbi, 14 Qaraşa 2019
Bilik 3350 0 pikir 30 Qazan, 2015 sağat 15:24

OQO: ŞÄMŞİNİÑ 85 JILDIĞI ATALIP ÖTTİ

Ötken senbide oblıs äkimi Beybit Atamqwlov Şäuildir jerinde ötken Qazaq handığınıñ – 550, Otırar audanınıñ – 80, val's koroli Şämşi Qaldayaqovtıñ tuğanına 85 jıldıq mereytoyına arnayı qatısıp, otırarlıqtardıñ quanışımen bölisti, - dep habarlaydı "Oñtüstik Qazaqstan" gazeti.

Atalmış is-şara wlı kompozitordıñ kindik qanı tamğan Sarıqamısta ornatılğan monumenttiñ aşıluımen bastaldı. «Mäñgi öşpes än qaldırğan bal-şırın, kindik qanı tamğan jeri Şämşiniñ» degen ayşıqtı jır joldarımen äspettelgen eskertkiştiñ lentasın qiğan aqın Mwhtar Şahanov, şämşitanuşı-kompozitor Qaldıbek Qwrmanäli büginde eskerusiz qalğan atajwrttıñ tarihınan äñgime qozğap, sonı qayta jañğırtqan audan äkimi Calıhan Polatovqa, osı iske mwrındıq bolğan auıldıñ Dosımbek, Abılay esimdi aqsaqaldarına köpşiliktiñ alğısın jetkizse, halıq aqını Äselhan Qalıbekova jırdan şaşu şaştı.

Bwdan keyin toyğa jinalğan jwrtşılıq audan ortalığında boy kötergen «Altın dombıra» monumenti men audandıq kitaphana ğimaratınıñ aşılu saltanatına kuä boldı. Otırarda ösip, osı jerden qanattanğan, büginde Parlament törinde otırğan halıq qalaulıları Quanış Aytahanov, Şalatay Mırzahmetov, belgili satirik Köpen Ämirbek, tağı basqa igi jaqsılar tuğan jerge degen jürekjardı lebizderin bildirip, astanalıqtardıñ alğısın jetkizdi. Cenator Quanış Aytahanov jaña kitaphanağa öziniñ birneşe kitabın tartu etti.

Otırardağı mereytoylıq is-şaralar «Wlı dala örkenieti» degen taqırıppen mädeniet sarayında ötken respublikalıq ğılımi-teoriyalıq konferenciyağa wlastı. Oblıs äkimi Beybit Atamqwlov oğan jinalğan barşa qauımdı aytulı merekemen qwttıqtap, Otırar örkenietine qatıstı aldağı uaqıtta qolğa alınatın is-josparlarımen bölisti.

– Aşıq aspan astındağı köne Otırar şaharınıñ ornın körip, onı tamaşalauğa jäne zertteuge şeteldikter de köp kelip jatqanı mälim. Jaqında elimizdiñ Mädeniet ministri Arıstanbek Mwhamediwlımen aramızda ülken äñgime bolıp, sonda osı Otırar qalaşığın älemge tanımal mwrajay etsek degen öz közqarasımdı ayttım. Ol üşin keleşekte oblıstıq byudjetten qarjı közin qarastırıp, aşıq aspan astındağı mwrajaydan Arıstanbabqa deyin jol salu, onıñ boyınan arheologiyalıq zertteu ortalığın jäne respublikalıq wlttıq mwrajaydıñ filialın aşu, infraqwrılımın damıtu sekildi josparlarımız bar, – dedi Beybit Bäkirwlı.

Konferenciyanı jürgizip otırğan filologiya ğılımdarınıñ doktorı, professor Qwlbek Ergöbek äkimniñ bwl wsınısın otırarlıqtar üşin bağa jetpes batıl bastama dep bağaladı.

Bwdan soñ söz alğan aqın Mwhtar Şahanov, Parlament deputattarı Quanış Aytahanov, Şalatay Mırzahmetov, akademik Kärimbek Qwrmanäliev, tağı basqalar Otırar örkenietine qatıstı öz oy-pikirlerin ortağa saldı.

Konferenciyada mwrajay qızmetkerleri, arheologtar men ğalımdar – Aqmaral Qwdaybergenova, Jaqıpbek Altaev, Mwhtar Qoja özderi zerttegen taqırıptar töñireginde bayandama jasadı.

Tüs aua qonaqtar mereytoy qwrmetine arnalğan qazaq küresiniñ aqtıq sayısına qatısıp, ejelgi Otırardıñ tarihı bayandalğan teatrlandırılğan körinisti tamaşaladı.

Ayta ketu kerek, osı küni birneşe jaña nısan esigin ayqara aştı. Olardıñ qatarında «Äsel», «Keldebek ata» balabaqşaları, «Keremet» otbasılıq ortalığı men audandıq ardagerler üyiniñ ğimaratı da bar. Jaña nısandar demeuşiler esebinen salınğan.

Nwrlan KENJEĞWLOV. Suretterdi tüsirgen Bereke SEYITJAPPAR

Abai.kz

0 pikir