Senbi, 14 Jeltoqsan 2019
Mäyekti 3454 0 pikir 25 Qaraşa, 2015 sağat 16:30

KULAGINNİÑ WLI JAQSIBEKOVKE NESİMEN JAQTI?

Bügin Astana qalasınıñ äkimi Ädilbek Jaqsıbekov  mırza «Almatı» jäne «Sarıarqa» audandarınıñ aktivterine  jaña äkimderdi tanıstırdı. Bwl turalı abai.kz saytı Astana qalası äkimdiginiñ resmi saytına silteme jasay otırıp habarlaydı.


Astana qalalıq mäslihattıñ kezekten tıs sessiyasında deputattar «Almatı» jäne «Sarıarqa» audandarınıñ jaña äkimderi qızmetine wsınılğan Ermağanbet Qabdulawlı Bölekpaev pen Pavel Sergeeviç Kulaginniñ kandidaturaların birauızdan qoldadı.

Al qala äkimi Ädilbek Jaqsıbekov jaña tağayındalğan  eki äkim de eñbek jolında özderin jaqsı jağınan körsete bilgen, türli lauazımdardı atqaruda täjiribeleri mol ekendigin ayttı.

Ayta keteyik, Ermağanbet Bölekpaev bwğan deyin Memlekettik qızmet isteri jönindegi agenttik jüyesinde, Qarağandı jäne Oñtüstik Qazaqstan oblıstarında Agenttiktiñ aumaqtıq basqarmalarında basşı, Astana qalası Tärtiptik keñesiniñ törağası qızmetterinde bolğan.

Aqmola oblısı äkimi Sergey Kulaginniñ wlı Pavel Kulagin bwğan deyin Astana qalasınıñ Kommunaldıq şaruaşılıq basqarmasınıñ basşısı, «Almatı» audanınıñ äkimi qızmetterin atqarğan.

Esteriñizde bolsa, 2013 jılı elimizdegi eñ jas äkim bolıp kütpegen jerden Pavel Kulagin (Astana qalasına qarastı «Almatı» audanına) tağayındalğan edi. Otızğa tolmay jatıp osı lauazımğa qayta wsınılğan Pavel Kulaginniñ ömirbayanı jwtañ. Mäskeude joğarı bilim alğan. Eñbek jolın Qostanay oblısındağı ekonomika jäne byudjetti josparlau departamentinen bastaptı. Keyin bas şaharğa qonıs audarıp jergilikti äkimdikte qızmet atqarğan. Sodan mansabı köz ilespes jıldamdıqpen ösip, Astanadağı Esil audanı äkiminiñ orınbasarı boldı. Endi Jaqsıbekov mırzağa jaqsı qırınan tanılıp, Almatı audanına jetekşilik etpek. Jas şeneunikti asa jauaptı lauazımğa tağayındağan Astananıñ äkimi Jaqsıbekov Kulaginniñ wlına ülken ümit artıp otırğanğa wqsaydı. 

Jä, deysizder ğoy. Sergey Kulaginniñ özi erterekte wlı Paveldiñ mansabı turalı qoyılğan swraqqa aqtarıla jauap bergen-di (http://kaz.tengrinews.kz/kazakhstan_news/kulagin-memlekettk-kyizmetteg-ulyina-katyistyi-oyyin-ayttyi-259059/).

"Sizder "siz qanşa jasta äkim boldıñız?" dep swrañızdar. Men 26-27 jasta keñşar direktorı boldım, men şoşqa bağatın sauınşı äyeldiñ balasımın, otbasında üşeumiz, äkemiz joq, men eñ kenje balamın. Üşeumiz de oqıdıq, şaruaşılıqtardı basqardıq, keyin men jıldam köterilip, ol kezde ağam da audan basşısı bolatın, men oblıstı basqarıp, ağamdı jwmısınan şığardım. Sizdiñşe erte me? Qazir taldau jasap, qarap köriñiz, 26 jastağılar joq pa eken? Älde Kulagindi ğana körip qaldıñız ba?", - deydi Aqmola oblısınıñ äkimi Sergey Kulagin.

Tüyin: Aqtöbe oblısı äkiminiñ orınbasarı Sara Nwrqatova hanım, öziniñ wlı men kelinin qızmetke alğanı üşin bası daudan arılmay, aqırında otbasımen qızmetten ketu turalı şeşimge kelgendigi turalı qazaqstandıq BAQ az jazbadı. Dese de Kulagin mırzanıñ qwrığı Nwrqatovağa qarağanda wzın bolsa kerek.  Äytpese jası otızğa da tolmay jatıp Tasmağambetov taqqa otırğızıp, sayasi mansap bergen Pavel Sergeeviçti osınşama äspetterdey jas äkim Jaqsıbekov mırzağa nesimen jağuı mümkin? Paveldiñ potencialı qanday? Astananıñ bir audanın örkendetu üşin ol ne istey aladı? Osığan deyin Paveldiñ pärmen salıp istegen qanday şaruasın bilemiz? Bwl swraqtarğa aldağı uaqıttarda jauap tabıla jatar... Al äzirge biletinimiz äkimniñ wlı äkim bolıp tağayındaldı.

Nwrgeldi Äbdiğaniwlı

Abai.kz

0 pikir