Jeksenbi, 20 Qazan 2019
Qoğam 5607 0 pikir 31 Jeltoqsan, 2014 sağat 06:07

JAÑA JIL QARSAÑINDAĞI TÜRKIYA

Apta basında Europanı aq körpege orağan aua rayı keşe Kişi Aziyağa da jetti. Twtas aumağın qar basqan Türkiyada jaña jıl qarsañında ne isteldi? Az-kem şolu jasap körsek:

Keşe, 30 jeltoqsan Ankaradağı Prezident sarayında el Prezidenti Erdoğannıñ qatısuımen «Wlttıq qauipsizdik keñesiniñ» otırısı ötti. Otırıstıñ kün tärtibi negizinen elde terrorlıq aktilerdiñ boluına mülde tosqauıl salu jäne «şeşim procesteriniñ(Çözüm(şeşim) süreci nemese barış(beybitşilik) süreci – Türkiyada wzaq jıldardan jalğasıp kele jatqan kürd mäselesiniñ halıqqa jäne memleketke tiimdi bolıp bir jaqtı boluın közdeydi. 1984 jıldan beri kürdtermen soğıs nätijesinde 40 mıñnan astam adam ölgen)» atqarıluın qolğa alu mäselelerin talqıladı. Keñes qabıldağan deklaraciyağa say «Parallel'di memleket(Memleket işinde memleket qwrıluı)» qwrudıñ jüzege asırılmauı jäne zañsız küştik qwrılımdarmen küresti küşeytu bastı nazarğa alınğan. Sonday-aq Siriyadağı qarulı qaqtığıstar men ondağı qauip-qaterden saqtanu, dissidentter men bosqındarğa kömek körsetu mäselesi de qaraldı. Türik WQK otırısı ISIM(Iraq jäne Siriya Islam memleketi) terrorlıq wyımına qarsı memlekettik qorğanıstı, Falestinanıñ täuelsizdigin tanu jönindegi halıqaralıq kelisimderdiñ jüzege asırıluı men Izraildağı Islam mädenietiniñ tarihi nışandarının qorğauğa alu mäselelerine de arnayı qarar qabıldadı. Beştepedegi säuletti sarayda Prezidenttiñ qatısuımen ötken keñes 6,5 sağatqa sozıldı.

Sonımen qatar osı küni Türkiya Käsipodaqtar konfederaciyası 2015 jılı eldegi minimaldı memlekettik eñbekaqınıñ köteriletinin jariyaladı. Keler jıldıñ alğaşqı altı ayında osı eldegi eñ tömengi jalaqı qazirgi 846 liradan 949 lirağa, soñğı altı ayında 1000 lirağa (450 AQŞ dolları şamasında) köterilmek. Bwnımen qosa birqatar äleumettik järdemaqılar, student şäkirtaqıları da aytarlıqtay joğarılaytın boladı.

Türkiya biligi «Ülken Türkiya» attı damu bağdarlamasın atqaruğa bar küşin jwmıldırıp jatır. Bağdarlamağa say Türkiya 2023 jılı «Jaña Türkiyağa» özgermek.Osı jılı Türkiya älemdegi damığan on eldiñ biri boludı josparlağan. Türik Respublikasınıñ qwrıluına 100 jıl qarsañında bwl eldiñ şın mäninde quattı memleketke aynalatın qisını da bar. Sebebi eldiñ sırtqı sayasatı osını talap etedi. Sonday-aq bwl jılı Türkiyanı Batıstıñ ığına jığatın jüz jıl bwrınğı kelisim-şarttar küşin joyadı.

Jaña jıldı Täuelsizdik küninen qaşanda asırıp toylaytın Qazaq Elinde soñğı uaqıtta 6,5 sağatqa sozılğan bilik jinalıstarı ötti me eken? Qazaq dalasın üş jüz jıl bodandıqta wstağan Patşalıq Reseydiñ bügingi mwrager memleketimen odaq qwrıp, qaltamız qap-qap teñgege tolatın kün keledi dep jürgen qazaqtar 2050-ge deyin bauırlas Türik halqınan bir ülgi alsa jarar edi.

Nwrğali Nwrtay

Abai.kz

 

0 pikir