Jwma, 22 Qaraşa 2019
Jañalıqtar 5733 0 pikir 1 Şilde, 2014 sağat 14:19

WLTTIQ MUZEY RESMI TÜRDE İSKE QOSILADI

 

2014 jılı 3 şildede qala küni qarsañında Astanada elimizdiñ mädeni ömirindegi aytulı oqiğa – Qazaqstan Respublikası Wlttıq muzeyiniñ resmi aşılu saltanatı ötedi. Aşılu saltanatına QR Prezidenti N.Ä. Nazarbaev qatısadı.

«Qazaqstan Respublikasınıñ Wlttıq muzeyi» respublikalıq memlekettik mekemesi Prezidenttiñ Jarlığımen 2013 jılğı 30 mamırda qwrılğan.

 Bwl – Ortalıq Aziyada balaması joq biregey joba. Kölemi 74 mıñ şarşı metrden asatın Wlttıq  muzeyge Qazaqstannıñ erte ğasırdan bügingi künge deyingi  arheologiyalıq, etnografikalıq jädigerleri men mädeni eskertkişteri jinaqtalğan.

Wlttıq muzeydiñ qwramında Astana, Täuelsiz Qazaqstan, Altın, Ejelgi jäne ortağasır tarihı, Etnografiya, Tarih, Zamanaui öner zaldarı bar.

Muzey halıqaralıq standarttarğa say jabdıqtarmen jaraqtandırılğan. Ekspoziciyalar üşin zamanaui körme tehnologiyaları: biregey iilgiş ekran, media-eden, qazirgi Astananıñ ortalıq böliginiñ  serpindi maketi, köptegen mediaekrandar, gologrammalar, diodtı jarığı bar LED-tehnika, sensorlı düñgirşekter, mul'timediyalıq jolserik qoldanıladı.

 

14.00-de QR Wlttıq muzeyi men Resey etnografiyalıq muzeyi jäne «ROSIZO» Memlekettik muzey-körme ortalığı äriptestik turalı memorandumğa qol qoyadı.

Resey etnografiyalıq muzeyi Europadağı iri etnografiyalıq muzeylerdiñ biri. Onıñ qorına Euraziyadağı 157 halıqtıñ mädeni mwrası şoğırlanğan. (bwrınğı Resey imperiyasınıñ territoriyası). Resey etnografiyalıq muzeyiniñ 100 jıldıq tarihı bar. Ol Orıs muzeyiniñ etnografiyalıq bölimi retinde imperator Nikolay II pärmenimen onıñ äkesi imperator Aleksandrdıñ III amanatın orındau jäne onı este qaldıru üşin qwrılğan. Imperator jäne imperator otbasınıñ basqa müşeleri alğaşqılardıñ biri bolıp qor qalıptastırdı. Romanovtar üyiniñ jekelegen zattarınıñ kollekciyaları bölimniñ jinağına kirdi. 1991 jılı Resey Federaciyası halıqtarı mädeni mwrasınıñ asa qwndı nısanı retinde memlekettiñ nazarına alındı.

«ROSIZO» Memlekettik muzey-körme ortalığı – memlekettik jäne kommerciyalıq qwrılımdardıñ körmege qatıstı jobaların wyımdastıratın jäne jüzege asıratın köpsalalı wyım. «ROSIZO» körmeleri öz kollekciyaları jäne muzeyaralıq kollekciyalar arqılı da jasaladı. Negizi qalanğannan  beri «ROSIZO» qorınan Resey muzeylerine beyneleu öneriniñ 500 000 mıñğa juıq tuındısı tapsırıldı. Soñğı on jılda «ROSIZO» Resey men şetelde 350-den astam körmeniñ wyımdastırıluına atsalıstı. Onıñ işinde iri halıqaralıq jobalar da bar.

 

Jeti zalda wsınılatın negizgi ekspoziciyalardan bölek Wlttıq muzey äriptesteriniñ de körmeleri aşıladı:

«Ortalıq Aziya men Kavkazdağı dästürli toqıma - Wlı Jibek jolınıñ mwrası » (REM,  Sankt-Peterburg q.);

«Orıs körkemsuret öneriniñ 4 ğasırı» («ROSIZO» Mäskeu q.);

«Wlttıq dästür jäne älemge aşıqtıq» (Qazaqstan Respublikası Suretşiler odağı);

Qazaqstan Respublikası qolönerşileriniñ järmeñkesi. «19-20 ğasırlar toğısındağı qazaqtar» mwrağat suretteriniñ körmesi, Vengriya suretşisi Djudit Poks pen Resey suretşisi YAna Volkovanıñ  kiizden jasağan jwmıstarınıñ fotokörmesi, QR eñbek siñirgen öner qayratkeri Säule Bapanovanıñ «Seyhun tolqındarı» attı kiizden jasalğan kiimderiniñ jiıntığınıñ körsetilimi (Qazaqstan qolönerşileriniñ odağı)

İs-şarağa qatısuğa Qazaqstan  muzeyleriniñ jetekşileri jäne Resey, Qıtay, AQŞ, Wlıbritaniya, Äzirbayjan, Özbekstan, Qırğızstan, Monğoliya sındı şetel muzeyleriniñ jetekşileri şaqırıldı.

 

14.45-te kişi mäjilis zalında şeteldik qatısuşılarmen baspasöz konferenciyası ötedi. Jurnalisterdiñ swraqtarına tanımal ğalımdar, önertanuşılar, ataqtı öner qayratkerleri jauap beredi:

Djon Simpson - Britan muzeyi Tayau Şığıs departamentiniñ kuratorı;

Djon (Djek) RasmussenAmerika universiteti janındağı Katcen atındağı Öner ortalığınıñ negizin qalauşı jäne direktorı;

Çen Sie Djun – Şanhay muzeyiniñ direktorı, Şanhay mädeni jädigerler basqarması direktorınıñ orınbasarı;

Irina Aleksandrovna Antonova – A.S. Puşkin atındağı memlekettik beyneleu öneri muzeyiniñ prezidenti;

Irina Vladimirovna Lebedeva – Memlekettik Tret'yakov galereyasınıñ bas direktorı;

Vladimir Moiseeviç Grusman – Resey etnografiyalıq muzeyiniñ direktorı;

Viktoriya Gennad'evna Zubravskaya – «ROSIZO» Memlekettik muzey-körme ortalığı körme böliminiñ jetekşisi;

Çingiz Abdulmejidoviç Farzaliev –  Äzirbayjan Wlttıq öner muzeyiniñ direktorı;

Cvetana K'oseva Lazarova – Bolgariya tarihı Wlttıq muzeyi direktorınıñ orınbasarı;

Imankulova Nurhat Ernisovna – Qırğız Respublikası Wlttıq tarih muzeyi direktorınıñ qor-esepteu jwmısı jönindegi orınbasarı, bas saqtauşı.

 

15.00-de ülken mäjilis zalında şeteldik qonaqtar men mädeniet jäne öner qayratkerleriniñ qatısuımen «Mädenietterdi jaqındastırudağı muzeylerdiñ röli» attı halıqaralıq ğılımi simpozium jwmısın bastaydı.

17.30-dan 22.00-ge deyin muzeydiñ barlıq keluşilerine «Wlı Jibek jolımen sayahat» attı merekelik bağdarlama wyımdastırıladı.

Muzeydiñ bükil  aumağı Türkistan, Sauran, Ispidjab, Taraz, Sığanaq, Aq meşit, Otırar, Suyab siyaqtı Jibek jolı ötken Qazaqstandağı ortağasırlıq qalalarğa bölinedi.

Suretşiler men qolöner şeberleriniñ şeberlik-sınıptarı, sändik-qoldanbalı öner järmeñkesi, suretşilerdiñ aspan astında suret saluı, wlttıq kiim ülgisimen suretke tüsu, balalarğa arnalğan interaktivti oyın bağdarlaması, wlttıq naqıştağı sändi kiim ülgileriniñ körsetilimi, wlttıq oyındar, wlttıq tağamdar men susındardan däm tatu, dombıraşılar keşi,  balalarğa arnalğan attrakciondar, balalarğa arnalğan interaktivti alañ, viktorina ötkiziledi.

"Abay-aqparat"

0 pikir