Jeksenbi, 8 Jeltoqsan 2019
Qoğam 10549 0 pikir 19 Säuir, 2014 sağat 17:45

«AÑIZ ADAM» JURNALIN QARALAUŞILARDIÑ NAZARINA!

«AÑIZ ADAM» jurnalına «japtım jala, jaqtım küye» dep qaralauşılardıñ nazarına!

«Adol'f Gitlerdiñ ömirbayanı men qızmetin jazdıñ» dep jazğırıp, mäseleniñ bayıbına barmay twrıp baybalam salğan, bizdi Qazaqstan Respublikası Baylanıs jäne aqparat agenttigine aydap salıp, sırtımızdan ükim şığartuğa deyin alıp barğan DAUDIÑ basında twrğan kim deñizşi? Resey jurnalisteri! Naqtıraq aytsaq, reseylik REGNUM «Novosti» aqparattıq agentiginiñ atı belgisiz avtorı. Olar birinşiden, «bwl jurnal Gitlerdiñ 125 jıldığınıñ qwrmetine basıldı» deydi. Jurnalda onıñ 125-ke tolğanı turalı bir auız söz joq, ol, tipti, bizdiñ oyımızğa da kelmepti. Bwl – bir. Ekinşiden, «faşistik ideologiyanı aqtauğa arnalğan» deydi. Al, biz bolsaq, jurnaldıñ alğı sözinde bas redaktorımız Jarılqap Qalıbaydıñ «Biz ne üşin Adol'f Gitlerdi jazıp otırmız?» degen maqalasında bwl swraqqa tolıq jauap berip otırmız: «Onıñ eki sebebi bar: Birinşisi – memleket basına, ğayıptan tayıp A.Gitler sekildi bir adam kezdeysoq kelip qalğan jağdayda, oğan ergen bükil halıqtıñ orğa jığılatının körsetu üşin!.. Mäselen, bir ğana tarihi twlğa dünieniñ astañ-kesteñin şığarıp, töñkerip jibere jazdadı. Bükil älemniñ 72 memleketi qatısqan adamzat tarihınıñ eñ swrapıl soğısında 60 mln.-ğa juıq adam qaza tauıp, 110 mln.-nan astam adam jaraqat aldı. Osılayşa Adol'f Gitler – Ekinşi düniejüzilik soğıstıñ eñ bastı qılmıskeri bolıp tabıladı. Al oğan ergen nemis halqı Gitlerdiñ wltşıldıq-faşistik ideyasınıñ qwrbandığına aynala jazdadı.

Ekinşisi – wltşıldıq-şovinistik ideyanı qayta jalaulatıp kele jatqan qwdayı körşimiz – Resey imperiyasınıñ qazirgi biliginiñ asa qauipti sayasatınan qorğanu maqsatında jazıp otırmız!».

«Gitler men Putinniñ is-äreketterinde wqsastıq bar ma?» degen saualımızğa belgili tarih ğılımdarınıñ doktorları – Sayın Borbasov pen Zardıhan Qinayatwlı jäne sayasattanuşı-ğalım Rasul Jwmalı Reseyge Putinniñ basşı bolıp keluimen birge, skinhedterdiñ, neofaşistik qozğalıstardıñ payda bolğanın, Gitler Çehiyanıñ Sudet qalasın qoldan wyımdastırılğan referendummen qosıp alsa, Putinniñ Qırımdı osığan wqsas ädis-täsilmen Reseyge qosqanın, sondıqtan mwnday ideologiyağa der kezinde toytarıs berip, adamzat balası faşizmnen sabaq alu keregin tilge tiek etti.

Biraq, jurnal redakciyasınıñ negizgi wstanımın köpe-körneu körgisi kelmegen Resey agenttiginiñ jurnalisi jurnaldıñ mazmwnın odan äri qaray qara küyemen boyay tüsedi. Mäselen, qoğam qayratkeri Nağaşıbay Esmırzanıñ jurnal redakciyasınıñ «Gitler qanday twlğa?» degen swrağına bergen jeke pikirin, wyalmay-qızarmay bwl jurnal jurnalisiniñ «Gitler – faşist emes» dep jaqtağan maqalası retinde körsetse, ekinşi jerde – Gitlerdiñ eñbegin «Mayn Kampf» qanday kitap?» dep jazğan dep ayıptaydı. Biraq, öz paydası üşin «Mayn Kampftıñ» qanday kitap ekenin anau-mınau emes, faşimzniñ eñ bastı jauı Uinston Çerçill'diñ sol üşin Nobel' sıylığın alğan «Ekinşi düniejüzilik soğıs» kitabınan alınğan üzindi ekenin ädeyige bayqamay qaladı. Al, Nağaşıbaydıñ pikiri turalı aytar bolsaq, «jurnal jariyalanımdarındağı avtor pikiri redakciyanıñ tüpkilikti közqarası bolıp eseptelmeytini» beseneden belgili.   

Keybireuler «AÑIZ ADAM» jurnalı nege tek wlı adamdardı ğana jazbaydı?» dep ayıptaydı. Biz olarğa birneşe ret qaytalap aytamız: «AÑIZ ADAM» degen söz – wlı adam degen sözdiñ balaması emes, bwl mediajoba eldiñ auzında eñ köp söz bolıp jürgen tarihi twlğa turalı basılım. Jäne eñ bastısı, birinşi betke jeke twlğanıñ sureti jariyalanğanımen, biz ärqaşan da jeke twlğa ömir sürgen tarihi kezeñniñ aqiqatın aşuğa basa köñil bölemiz. Birinşi betti mwqiyat oqığan adam bayqamauı mümkin emes! Onda «Ekinşi düniejüzilik soğıstıñ tarihı» dep jazılğan, al Gitlerdiñ suretiniñ joğarğı jağına «adamzat qasireti» degen belgi qoyılğan.

Alayda, Resey agenttiginiñ bastı maqsatı – Vladimir Putindi Adol'f Gitlermen salıstırğan qazaq jurnalın japtıru, al onıñ «Skat» kompaniyasınıñ wşağında qazaq tilinde qızmet körsetudi talap etken «wltşıl» bas redaktorın jazağa tartqızu. Sol üşin de «arab elderiniñ mamanı bolıp tabılatın» (agenttiktiñ jazuı boyınşa) Rasul Jwmalınıñ öz swhbatında Vladimir Putindi Adol'f Gitlermen salıstırğan jerine erekşe şüyligedi. Rasul Jwmalınıñ Qazaqstandağı belgili sayasattanuşı ğalım, qoğam qayratkeri ekenin ädeyi auızğa almaydı.

Eñ bastısı, Qazaqstannıñ «Qwqıq qorğau jäne baqılau organdarı nege mwnı elemey otır?» dep QR Baylanıs jäne aqparat agenttigi men basqaların jurnal redakciyasına qaray aydaqtaydı. «Biz bwl oqiğanıñ damuın mwqiyat qadağalaytın bolamız» dep ses körsetip qoyadı. Bwğan keyinnen Rosbalt.ru saytı qosıldı.

Atalmış Resey aqparattıq agenttiginiñ öz wlttıq müddesin qorğap jazğan «japtım jala, jaqtım küye» maqalasın jerden jeti qoyan tapqanday quana-quana qayta basqan Nur.kz saytı qay eldiñ müddesin qorğap otır? Onı odan arı qolday ketken Tengrinews.kz, Today.kz, Zakon.kz sayttarı men orıstildi telearnalar qay eldiñ müddesine jwmıs istep otır? Mäselen, Resey materialın birinşi bolıp basqan Nur.kz portalınıñ qwruşısı äri bas direktorı Vasiliy Ul'yanov Novosibirde bilim alğandıqtan Reseyge büyregi bwrıp otırğan bolar. Al, basqalarğa ne joq deseyşi?

Äsirese, feysbuk siyaqtı äleumettik jelilerdegi köptiñ dürmegine erip, jurnaldı oqımay, körmey twrıp, Resey agenttigi men Reseyge büyregi bwrğan qazaqstandıq orıstildi sayttardıñ jazğan eşqanday negizsiz, däyeksiz jalasına senip,

«Köp aytsa köndi,
Jwrt aytsa boldı –
Ädeti nadan adamnıñ» (Abay) degen psihologiya boyınşa «AÑIZ ADAM» jurnalı men onıñ bas redaktorı Jarılqap Qalıbaydı jerden alıp, jerge saluına jol bolsın. Äytse de, jurnaldı oqığandar da az emes. Olar mäseleniñ bayıbına barmay twrıp, baybalam saluşılarğa tiisti toytarıs berude.

Qısqası, bwl Qazaqstan men Resey azamattarınıñ arasındağı aqparattıq soğıstıñ bir körinisi. Ökinişke oray, bizdiñ bilik 23 jıldan beri täuelsizdigimizdiñ eñ bastı twtqası bolıp tabılatın – aqparattıq qauipsizdigimizdi qamtamasız ete almadı. Sondıqtan da, körşi eldiñ aqparattıq «äskeri» bizge ne jazıp, ne qoyuımızdı jäne qalay jazu kerek ekenimizdi basqarıp, kerek bolsa, joğarıdan bwyırıp otır. Biraq, ol äriptester däl osı Adol'f Gitlerdiñ «Mayn Kampf» kitabınıñ 1992 jılı Reseyde jariyalanğanın (Gitler A. Moya bor'ba. Moskva, izdatel'stvo T-Oko, 1992 god), elektrondı nwsqasınıñ Resey sayttarında künde ilinip twratının http://www.911-truth.net/Adolf_Hitler_Mein_Kampf_Russian_translation.pdf, bwdan basqa da A.Gitler turalı jüzdegen reseylik basılımdardıñ jariyalanğanın jäne Vladimir Putin bilikke kelgen uaqıttan bastap skinhedter dep atalatın neofaşistik  wyımdar men qozğalıstardıñ qaptap ketkenin, olardıñ är küni tünde slavyan emes halıqtardıñ ökilin wrıp-soğıp, eşkim körmegen jerde öltirip jatqanın tük bolmağanday bayqamağansidı. Al, Adol'f Gitlerdiñ däl osınday wltşıldıq-faşistik ideyasına ergen halıqtıñ adamzat balasına qanday qasiret äkelgenin aşıp körsetpek bolğan qazaqtıñ «AÑIZ ADAM» siyaqtı jurnalı men onıñ «wltşıl» bas redaktorın Putindi – Gitlerge, orıs skinhedterin – neofaşisterge teñep körsetkeni üşin jazağa tartqızğısı keledi. Jäne olarğa Resey baspasözin oqıp, telearnasın köru arqılı qoğamdıq pikir qalıptastırıp otırğan keybir jergilikti orıstildi jurnalister  men qazaqstandıqtar «äyt, bas» dese qosa qabadı.

Wzın sözdiñ qısqası, qwrmetti oqırman qauım, eñ aldımen jurnalımızdı tolıqtay oqıp şığıp – sottasañızdar da, jaqtasañızdar da sodan keyin barıp – ädil pikir  bildiriñizderşi. 

Qwrmetpen,

Jarılqap QALIBAY jäne «AÑIZ ADAM» jurnalınıñ wjımı   

Abai.kz

0 pikir