Seysenbi, 10 Jeltoqsan 2019
Aqmıltıq 2312 18 pikir 15 Qaraşa, 2019 sağat 14:10

Ükimet analardıñ alqımınan alğanşa, offşordağı aqşanı tügendese ğoy...

Qazaqstannıñ är öñirinde az qamtılğan otbasılar memleketten alğan järdemaqıların keri qaytaruğa mindettelip jatqan körinedi. Oğan QR Eñbek jäne Halıqtı äleumettik qorğau ministrligi şığarğan bwyrıq sebep bolğan.

Naqtıraq aytsaq, 2019 jıldıñ 1-säuirinde QR Eñbek jäne Halıqtı äleumettik qorğau ministri Birjan Nwrımbetov eki jıl bwrın qabıldanğan "Kedeylik şeginiñ mölşerin ayqındau turalı" №290 bwyrıqqa özgeris engizdi.

Ol bwyrıqqa säykes, AÄK - Qazaqstandağı "eñ tömengi künköris deñgeyiniñ mölşerinen 70 payızdan tömen bolmaytın mölşerde ayqındaladı". Al, Statistika komiteti şilde ayında elimizdegi eñ tömengi künköris mölşeri 29 618 teñge dep mälimdegen bolatın. Demek, sizdiñ otbasılıq kirisiñiz osı künköris mölşeriniñ 70 payızınan asatın bolsa, äleumettik kömek ala almaysız. Al, onı alıp qoyğandar endi memleketke bereşek bolğan körinedi. Sebebi, olar kedeylik deñgeyinen joğarı twr.

Mäselen, Oral qalasında 254 otbasına memleketten alğan järdemaqıların qaytaru turalı habarlama kelgen. Bwl turalı "uralskweek.kz" saytı jazdı.

Atalmış aqparatqa sensek, endi jergilikti bilik osı uaqıtqa deyin az qamtılğan otbasılarğa tölengen 19 million teñgeden astam qarjını sol kedeylik şegindegi adamdardıñ özderinen öndirip almaq körinedi.

Osığan deyin memlekettik järdemaqı alğan otbasılar 2 mln. 100 mıñ teñgeni qalalıq byudjetke qaytarğan eken. Endi 254 otbası 19 million teñgeden astam qarjını qaytaru qajet. Eger, järdemaqını qaytaru turalı habarlama alğan adamdar körsetilgen somanı körsetilgen merzimde (bir ay işindedep jazadı) öz erikterimen ötey almasa, jergilikti bilik olardı sotqa berui mümkin. Bwl turalı Oral qalasınıñ jwmıspen qamtu jäne äleumettik bağdarlamalar böliminiñ basşısı Äsiya Qwrmanqwlova deytin adam aytıptı.

Onıñ aytuınşa, kedeyliktiñ resmi belgilengen şeginiñ qısqaruına baylanıstı, memlekettik järdemaqılardı qaytaru talap etilip otır.

Däl osığan wqsas jağday biıl qırküyek ayında Nwr-Swltannıñ irgesindegi Aqmola oblısında da orın alğan. "KTK" arnasınıñ aqparatına süyensek,  Uäzira Baymwqanova esimdi ana 4 balasına 89 mıñ teñge alıp kelgen. Alayda, joldasınıñ alğan qosımşa ötemaqısı otbasındağı adam basına şaqqandağı 20789 teñgeden asıp ketken. Sondıqtan ol tört ayda alğan 357 mıñ 884 teñge järdemaqını ükimetke qaytaruğa tiis bolğan.

Al, osı uaqıtqa deyin qwzırlı mekemeler el işinde "jır" bolğan 21 mıñ teñgelik äleumettik kömekti alu üşin jwrttı qıruar qwjat jinatıp, äri-beri sandaltıp qoyğanı turalı aytqanbız. Odan bölek, "üydegi teledidar, kir juğış maşinağa deyin tekserip, sanap jatır" degen äñgime aytıldı.

Osınşa maşaqat pen mıñ-san tekseristen keyin tağayındalğan järdemaqı, aynalıp kelgende zañsız bolğanı ma? Joğarıdağı aqparattan wqqanımız, älgi äure-sarsañı köp äleumettik kömek alğan analar aqşanı qaytarmaytın bolsa, isti boluı mümkin eken, tağı. Kördiñiz be?..

Tüyin. Äleumettik kömek dedik. Onıñ da artın sıyırqwymışaqtattı, äne. Uäji - qarjı joq. Million adamğa ay sayın aqşalay kömek beruge qazına-qambanıñ qauqarı jetpeydi. Maqwl. Rezeñke emes-aq bolsın.

167 milliard dollar. Bwl Qazaqstannan zañsız şığarılğan, offşordağı aqşa. Bwl - biıl mamırda aytılğan san. Qazaqstannıñ Wlttıq qorındağı qarajattan äldeneşe köp soma. Odan qalsa, jıl sayın, tipti ay sayın ölermen bop ötkizetin Halıqaralıq jiındar, forumdar men sansız sammitterge jwmsalıp jatqan qarajattı tağı eseptep köriñiz. Köz sürinip, til bügiledi.

Köp balalı analar Ükimetke alaqan jayıp otırğanda, jañağıday forumdardıñ keregi ne deysiz ğoy. Jauabı da dayın. Eldiñ imidji üşin!

Bilik analardıñ alqımınan alğanşa, dañğaza, dalaqbay jiındarğa jwmsalıp jatqan milliardtardıñ esebin bütindese käne?! Az qamtılğan otbasılarğa zañdı jäne öte ädil tekseris jürgizetin bilik offşordağı aqşağa baqılau jasap, sol milliartardıñ el qazınasına qaytarıluına qareket qılsa şe?..Äy, qaydam... Ükimettiñ bwl isi "juas tüye jündeuge jaqsı" degenniñ keri me deysiñ, osıdan soñ...

Nwrbike Bekswltanqızı

Abai.kz

18 pikir