Қазақстандық деректі кино режиссері Қалила Омаров Кенесары ханның басы қайда екенін топшылайды. Ол бұл құпияны өзінің ұлымен бірге түсіретін жаңа картинасында айтып бермекші, деп жазады «Экспресс-К» газетіне сілтеме жасаған ҚазАқпарат.

Қалила Кенесары хан жөнінде фильм түсіретін алғашқы режиссер емес. Ол туралы лентаны Жаңабек Жетіруов пен Марат Қоңыров та түсірген, дегенмен Омаровтар бұл жайтқа тереңірек үңілмек екен. «Қазақ халқының өкілдері арасында Кенесары жөніндегі пікірлер әрқалай, біреулер оны бостандық үшін күрескен ұлы хан деп санайды, екіншілері басқаша ұстанымда»., - дейді режиссер.

Омаровтың айтуынша, жаңа картинада қазақстандық, ресейлік және қырғыз зерттеушілерінің көзқарасы ұсынылады. Материалдарды іздестіру үшін түсіру тобы Кенесарының ордасы орналасқан жерде болды, сондай-ақ орынборлық, мәскеулік және астаналық мұрағаттарды ақтарды. Енді кинематографистер қазақ ханы жөнінде диссертация қорғаған Барнаул ғалымымен әңгімелеспек.

Абай-ақпарат