Дүйсенбі, 24 Маусым 2024
Қоғам 7346 0 пікір 16 Қазан, 2021 сағат 19:13

"Рухани жаңғыру": Пандемиядағы туризм

«Рухани жаңғыру» бағдарламасы еліміздің әр тасы мен тауын сүюге, құрметтеуге шақырады. Пандемия қазіргі таңда жаңа мүмкіндіктерді ашып отыр. Ол ішкі туризмге жаңа мүмкіндіктер ашуда.

Атап айтқанда сыртқа шығу қымбат әрі қауіпті, ал ішкі туризм арзан, тиімді және ең бастысы қауіпсіз болып қалуда. Сондықтан да «Рухани жаңғыру» аясындағы ішкі туризмді дамытуға негіз болатын «Сакралды Қазақстан» бағдарламасы мен «Кіші Атамекен» бағдарламасы аясындағы табиғи мекендер бүгіннде үлкен қызығушылық тудыруда. Әсіресе Алматы облысындағы 17 нысан Қазақстанның киелі географиясы тізіміне енсе, облыстық тізімге оның 41-і еніп, жақсы дамуда. Халық арасында құрметке ие мәдени мұра ескерткіштері, кесенелер, табиғи ландшафттар, маңызды саяси, тарихи оқиғаларға байланысты орындар Қазақстандық, шетелдік саяхатшылар белсенді түрде келетін орындарға айналды.

Алматы облысы «Рухани жаңғыру» офисінің директорының орынбасары Ерасыл Толымбекұлы былай дейді. «Біздің байқауымызша: бұрын қазақстандықтар іс-шара туризмін көбірек ұнататын және қалалар мен аудандарда өтетін түрлі іс-шараларға жаппай қуана баратын. Пандемия басталып, шекаралар жабылып, тіпті ел ішінде қозғалыс қиындағаннан кейін көпшілік табиғатпен бірлікке ұмтылып, жаңа демалыс орындарын аша бастады. Былайша айтқанда, жаяу қашықтықта жүруді әдетке айналдырды. Алматы облысында әрқайсысының өзіндік тарихы бар 17 аудан, үш қала бар. Биылғы жылы «Рухани жаңғыру» жобасының кеңсесінде облыс әкімдігінің қолдауымен «Жетісу өңірінің ақындары – аңыздар» атты, «Жетісу өңірі туралы аңыздар, әңгімелер» кітабын шығардық. Қазақстандықтар Балқаш, Алакөл сияқты ең танымал демалыс орындарының тарихын, олардың атауларын білуге ынталы болады деп ойлаймын.

Ұлттық киелі нысандар тізіміне ең танымал жерлер кіреді. Хан-Тәңірі шыңы, Шарын шатқалы, Көлсай көлдері, Аңырақай, Орбұлақ шайқастары өткен тарихи мекен, Шарын шатқалы, «Алтын Емел» мемлекеттік ұлттық табиғи паркі, соның ішінде Айғайқұм, Қатутау (жанартау жартастарынан жасалған таулар), Көкбастау трактіндегі Шоқан Уәлиханов бұлағына 1,3 миллионға жуық адам келді. 2020 жылы туристер саны 800 мыңға дейін күрт төмендеді. Өйткені оған дейін «Ашық» бағдарламасы, халықты жаппай егу болған жоқ. Бірақ 2021 жылдың 9 айында бұл жерлерге 1 миллион 800 мың турист келген. Қонақтардың ең көп саны Көлсай көлдерінде болған» дейді Ерасыл Толымбекұлы.

2017 жылы аты аңызға айналған Орбұлақ шайқасы болған жерге ескерткіш орнатылды. Шара «Туған жер» мемлекеттік бағдарламасы аясында және Елбасы Нұрсұлтан Назарбаевтың «Рухани жаңғыру» мақаласында айтылған тапсырмаларға сәйкес өтті. Ескерткіш QR-кодпен жабдықталған, ол ұялы телефон арқылы сканерленгенде шайқас туралы толық ақпарат береді.
Тянь-Шань шыршасынан 19 ғасырда бір шегесіз тұрғызылған атақты сәулет кешені Жаркент мешітін тамашалауға ниет білдірушілердің легі де арта түсті. Пандемияда аталмыш орталық барлық талапқа сай қызмет көрсетті.

Abai.kz

0 пікір