|
13.07.12.
Мыңтеке мұнай кен орнында көші-қон полициясының қызметкерлері ешқандай құжатсыз жұмыс істеген қытайлықтарды анықтады. Ақтөбе облысы арқылы келген «қонақтар» көп ұзамай, Атырау өңіріне келіп жеткен. Тіпті, олар Исатай ауданы аумағындағы Мыңтеке кен орнына қызметке тұрған. Құлқындарын табыс көзі тескен қытайлықтар жергілікті жердің көші-қон полициясына барып тіркелу керектігін де «естен» шығарып алған.
Тіпті, көші-қон полициясы оларды анықтаған кезде, қытайлықтардың жұмыс жасауға рұқсаты тұрмақ, олардың жеке бастарын куәландыратын төл құжаттары да болмай шықты.
Атырау ОІІД-нің баспасөз қызметінің жетекшісі Гүлнәзира Мұхтарованың айтуынша, Қытай елінің 21 азаматы «Синопек» компаниясында қызмет етіп келген. Қазіргі күні олар уақытша қабылдау-бөлу орнына қамалды. Олардың ендігі тағдырын сот шешетін болады.
Жалпы, бұл мұнайлы өңірдегі шетелдіктер тарапынан болып отырған өрескел заң бұзушылықтың бірі ғана емес. Жыл басынан бері Солтүстік Каспий жобасы бойынша Қарабатандағы зауыт құрылысында еліміздің заңын белден басып, жұмыс істеп жүрген 340 шетелдік азамат анықталды. Табыс табуды мақсат еткендер Ресейді айтпағанда, Италия
мен Үндістаннан келіпті.
|
