Senbi, 11 Şilde 2020
COVID-19 QAZAQSTANDA. Jwqtırğandar — 56455. Jazılğandar — 32500. Qaytıs bolğandar — 264
1250 0 pikir 24 Qırküyek, 2019 sağat 13:30

Qızılordalıq jıraularğa şeteldik teatr rejisserlarınan jii wsınıs tüsedi

Wltımızdıñ wlı mädenietin wmıtpay nasihattap otıru - qaşan da mañızdı. Bwl twrğıda memleket tarapınan arnayı "Ruhani jañğıou" dep atalatın bağdarlama da qabıldanğan. Osı bağıttı mıqtap wstanğan Sır boyınıñ önerpazdarı ärqaşan wlttıq muzıkanıñ bayrağın tik wstap keledi. 
Mäselen, «Qorqıt jäne Wlı dala sazı» halıqaralıq fol'klorlıq-muzıkalıq öner festivali ayasında Qorqıt ata atındağı QMU-da şeberlik därisi ötti. Jiınğa Qazaqstannıñ eñbek siñirgen qayratkeri, jırau Almasbek Almatov, Qazaqstannıñ eñbek siñirgen qayratkeri, Qwrmanğazı atındağı Qazaq Wlttıq konservatoriyasınıñ ağa oqıtuşısı Wljan Baybosınova qatıstı.
Öner ieleri studentterge jıraulıq öner turalı söz qozğadı. Almasbek Almatov Qorqıt zamanınan kele jatqan mädeni mwra sol wrpaqtıñ qanında twratının, aqparattı saqtaytın twlğa da, talant ta emes, önerpazdıñ boyındağı gen ekenin basa ayttı. Al, Wljan Baybosınova adamğa bir orındauşılıq azdıq etetinin, jıraulıq, jırşılıq intellektualdı, öreli öner ekenin alğa tarttı. Iä, halıq qazınasın köpke jarqırata körsetu üşin ülken payım, parasat qajet. Sebebi, qay ortada da jır­dıñ törkinin tüsindirip ayta alu mañızdı.
Qazir bizdiñ el jıraularına şeteldik teatr rejisserlarınan da  jii wsınıs tüsedi eken. Şarada Wljan Baybosınova qazaq öneriniñ şeteldikterge qalay äser etkenin, olardı qalay tañırqatqanın tarqatıp aytıp berdi. Birde AQŞ-ta ötetin «Gerakl balaları» attı grektiñ mifine qwrılğan qoyılımda öner körsetu üşin rejisser Aziya halıqtarınıñ işinen qazaq elin tañdap, Wljan jıraudı arnayı şaqırtıptı. Olar bizdiñ jırlardıñ qay-qaysı da halıqtı biriktirip, ötkendi ayta kelip, qazirgi mäseleni qozğap, bügingini aytu arqılı keleşekke degen közqarastı bildiretinine tañırqasa kerek. Eki sağattan asatın qoyılım äldi memleketter men älsiz memleketterdiñ qaqtığısın beyneleytin körinedi. AQŞ-tıñ barlıq ştattarında qoyılğan bwl spektakl'de Wljan Afina qwdayınıñ rölin somdaptı. Bizdiñ jıraudıñ mindeti – eki eldiñ patşası sözge kelmey, qaqtığısqanda aralıq söz aytıp, jır jırlau. Al, jırdıñ audarması sahnadağı ekranda körsetilip twradı. Birde spektakl' Boston qalasında bir jarım ay boyı ötedi. Gerakldıñ qızın qwrbandıqqa şalatın qantögiske tolı qoyılımda 12 ret şığıp, aralıq söz aytu, kün sayın taqta otırıp, tragediyanı sezinu oñay emesi belgili. Bwl Wljan jırauğa auır tiip, aqırında auırıp qalıp, üş kün boyı spektakl' jırausız ötken eken. Al üş künnen keyin halıq ereuilge şığıptı. Şağımı ne deysiz ğoy? Olar «biz ärtisterdi emes, jır aytatın jıraudı köruge kelgenbiz. Biletti qaytarıñdar» dep talap etipti. Sonımen, arnayı baspasöz konferenciyası ötip, säl de bolsa ıstığı qaytqan Wljannıñ el aldına şığuına tura kelipti. Kezdesude VVS sındı tanımal arnadan kelgen tilşiler jırauğa «jırdı öziñiz şığardıñız ba?» dep saual qoyğan eken. Sonda ol «Qazaqstan aumağındağı Sır­dıñ boyında ülken dästür bolğan. Filosofiyalıq astarı bar jırlar bizdiñ moral'dik kodeksimiz sındı. Bwl – tegimizde bar öner. Biz osımen tärbielenip, ösemiz. Onı şığaruğa mümkinşiligim jetpeydi, men tek orındauşımın» degende, «Biz qalay osı uaqıtqa deyin bilmegenbiz?! Genial'nıy halıq ekensizder» dep qattı tañırqağan eken.
Şara soñında jırau tegimizde saqtalğan qwndı önerdiñ bağasın biiktetu üşin ülken eñbek qajet ekenin, tipti arnayı teatr qwrılsa da artıqtıq etpeytinin jetkizdi. Sonday-aq, kezdesu soñında öner ieleri jırdan üzindi orındadı.
Ayta ketu kerek, festival' önerpazdarınıñ şeberlik däris­teri Qazanğap atındağı Qızılorda muzıkalıq kolledjinde, M.Mämetova atındağı Qızılorda pedagogikalıq joğarı kolledjinde, oblıstıq filarmoniyada da wyımdastırıldı.
Aydana Jwmadinova
Abai.kz
0 pikir