Beysenbi, 13 Tamız 2020
COVID-19 QAZAQSTANDA. Jwqtırğandar — 101372. Jazılğandar — 76756. Qaytıs bolğandar — 1269
Koronavirus 1887 26 pikir 7 Şilde, 2020 sağat 14:32

Internet-konferenciya. Därigerge swraq qoyıñız...

Qazir qauipti indet qaharına minip twr. Kün sayın indet jwqtırğan mıñ şaqtı adam tirkelude. Ministrliktiñ soñğı mälimetine süyensek, qazir elimizde koronavirus jwqtırğandar sanı – 50 mıñğa juıqtağan. 264 adam däl osı indetten qaytıs bolğan. Äridegisin aytpağanda, soñğı bir aptada, 30 mausım men 6 şilde aralığında 76 adam KVI-den köz jwmğan.  Bwdan bölek, respublika boyınşa pnevmoniya diagnozımen 28 mıñ adam auruhanalarda jatır eken. Bwl da ministrliktiñ öz deregi.

Osınday alağay da bwlağay kezde el işinde alıp-qaşpa äñgime de köbeygen. Kündiz-tüni därihanalarda wzın-sonar kezek. «Jau jağadan alğanda, böri etekten aladı» degendey, üreyli jwrttıñ qaltasına qarap, qwlqını jıbırlap, qulıqtı oylağan äldekimder jañağı däri-därmektiñ bağasın asırıp satıp jatqanı da aqparatta aytıldı. Oğan eldegi däri-därmek jetispeuşiligin tağı qosıñız...

El auzında ärtürli äñgime. «Pälen degen em eken, tügen degen jön eken» desken jwrt bazar men därihana kezip tentirep jür. Al ağartuşılıq bağıttağı aqparat joqtıñ qası. Qwzırlılar kün sayın indet jwqtırğandardıñ sanın esepteu men «karantin talaptarın saqtañızdar» degennen özge jarıtıp aqparat tarata qoyğan joq. Esesine, äleumettik jelide äñgime köp. El jılt etken ärbir aqparatqa eleñdep otır. Ärbir aytılğan aqparatqa senedi.

Osı rette biz «Abai.kz» aqparattıq portalı twraqtı türde jürgizip kele jatqan internet-konferenciyanı – koronavirus taqırıbına arnağandı jön kördik.

Internet-konferenciya spikeri – Ädilbek Jaqsıbekwlı Nwrımbetov. Oral qalasındağı 4-şi jwqpalı aurular emhanasınıñ I sanattı infekcionist därigeri.

Ädilbek Jaqsıbekwlı osığan deyin de Facebook jelisinde ağartuşılıq bağıttağı aqparattar jariyalap otırğan. Biraz uaqıt bwrın özi de KVI jwqtırıp, emdelip şıqqan.

Koronavirustı jwqtırmau üşin ne isteu kerek? Qazir bazarlarmen men därihanalarda deficitke aynalğan qwyrıq may men aspirin, paracetamol sekildi antibiotikter qanşalıqtı paydalı? Üyde em qabıldap jatqan azamattar ne isteydi? KVI-di boldırmau üşin nemese onıñ betin qaytaru üşin eñ tiimdi em qanday?

Osı jäne özge de sizdi jäne sizdiñ jaqındarıñızdı alañdatqan saualdarğa «Abai.kz» spikeri Ädilbek Nwrımbetov jauap beredi. Spikerdiñ aşıq swhbatı men sizder qoyğan saualdıñ jauabı «Abai.kz» aqparattıq portalında jariyalanatın boladı!

Saualdarıñızdı jolday beriñizder, marhabat, märtebeli oqırman!

Abai.kz

26 pikir