Seysenbi, 12 Qaraşa 2019
46 - söz 4306 29 pikir 3 Mausım, 2019 sağat 10:57

Bizdi äsiredinşildik qwrtadı

Men dinge qarsı emespin. Biraq äsire dinşildikti qabılday almaymın. Qazir oraza twtıp dinge bet bwru sänge aynalğan tärizdi. Ötkende Erlan Töleutay ağamızben Almatı qalasındağı bir mektepte kezdesu ötkizdik. 300-ge juıq joğarı sınıp oquşılarınıñ birde-bireui Birjan sal, Aqan seri, Jayau Mwsa, Ükili Ibıray tärizdi muzıkanıñ twlğalarınıñ kim ekenin ayta almadı. Al sasıp qalğan mektep direktorı "balalar oraza wstağan soñ şarşap jür" dep aqtaldı. Erekeñ "ösip kele jatqan bala ağzasına ünemi qorek kerek qoy" dep reniş bildirdi.

Kelesi bir jiında kolledjdiñ bir top (60 şaqtı) studenti qazaqtıñ birde-bir klassikalıq jazuşısın oqımağan, tipti tanımaytın bolıp şıqtı. Biraq bäri de ärtürli dini eñbekter (ärine, qwrannıñ özin emes) oqığan eken. Sonda olar qazaqtı bilmey qalay qazaq bolmaqşı?

31-mamır Almatıdağı quğın-sürgin qwrbandarına arnalğan eskertkişke bardıq. Seldiregen az qazaqpız. Policiya twr bwrış-bwrışta. Al tüste meşitke ağılğan jastarda esep joq.

Axmet Baytwrsınwlı muzeyinde fleşmob şarasın ötkizdik. "Su işiñder" desek, balalar tağı "orazamız, auız aşıp qoysaq künä ğoy" deydi. Aynalayın, beykünä jastar bir tamşı su işkeni üşin künähar bolsa, solardıñ künäsin arqalap tozaqta men-aq örtene qoyayınşı.

Keşke jwmıstan qaytıp kele jatıp "Şalqar" radiosın tıñdap tipti küyip kettim. Özegimdi aşı öksik zapıran qarıp ketti. Quğın-sürgin qwrbandarın aytar ma degen ümitim ädrem qaldı. Dini änder, dini uağızdar...

Keşki, tüngi bağdarlamasın ayttı. Bäri sol dini taqırıptar. Biz zayırlı elmiz be, älde dini me? Memleket qarjılandırıratın wlttıq mekemege sonday qwzır berilgeni qayran qaldıradı.

Meniñşe, 31-mamır aza twtatın kün. Barlıq BAQ osı taqırıptıñ ayasında qwrban bolğan wlı twlğalarımızdı nasixattauı tiis edi. Al bizde - din. Sol arıstar biz üşin küresip qwrban bolmağanda qaydağı auızaşar, qaydağı oraza, qaydağı qadir tüni... Wlımız qwl, qızımız küñ bolıp bayağıda-aq qwrıp keter edik qoy.

Bwl jolı anıq qwrıdıq-au. İştey iridik.

Qay ortağa barsaq ta dini uağızdar. Evreyler men arabtardıñ miftik, önegelik ömiri. Arğı türik babalardı aytpağanda bergi wlı qazaqtar turalı bir auız önegeli söz joq. Keşiriñiz, men tek wlı babalarımnıñ erligin aytqım keledi, solardıñ jolın jalğastırğım keledi.

Orıscentrizm, qıtaycentrizm men arabcentrizm ideologiyalıq ıqpalınan qwtılu üşin öz qazaqcentrizmdik sanamızdı jañğırtu kerek.

Arman Äubäkirdiñ facebook paraqşasınan

Abai.kz

29 pikir