Jwma, 6 Jeltoqsan 2019
Bilik 6577 1 pikir 10 Säuir, 2019 sağat 11:51

Bibigül Imanğazinanıñ qamqorlıq isterde oq boyı ozıq jüretini köpke ayan

Belgili jazuşı, Qazaqstannıñ eñbek siñirgen qayratkeri, «Bibi-ana» qayırımdılıq qorınıñ prezidenti Bibigül Imanğazinanıñ qamqorlıq isterde oq boyı ozıq jüretini köpke ayan. Şalqarday şejireli mekende kindigi kesilip, boyjetken bwla şağınan ömirdiñ tauqımetin arqalağan qaysar qızdıñ tuğan jerine degen qwrmeti äste bölek. «Tauqımet» romanında bir keyipkerdiñ ömirin bayandau arqılı külli qazaq qız-kelinşekteriniñ tağdırına alañdağan qarımdı qalamger, äsirese, mügedek analardıñ mäselelerine kelgende jüregi bayız  tappaydı.

Onıñ osınday qaysar qasietine jaqında jerlesteri de kuä boldı. Wzaq jıldardan beri baspana qiındığın körip kelgen Şalqar qalasındağı Bekişovter äuletine ol aumağı 15 sotoktı qwraytın 7 bölmeli jer üydi sıyğa tarttı. Qwnı 6 mln. teñgege bağalanğan ülken üy auız sumen, kögildir otınmen qamtılğan jäne birneşe sarayları, aulasında şegendelgen qwdığı bar, mal wstauğa qora-jayları saqaday say.

- Osığan deyin baspana qiındığın bir kisidey körip keldik. Otağası Aldabergen ekeuimiz kezinde «Şetırğız» keñşarında mal şaruaşılığında eñbek ettik. Ol sovhozdıñ traktorın aydadı, men malşılarğa järdemşi, şöpşilerge aspazşı siyaqtı jwmıstardı atqardım. 2000 jılı audan ortalığına köşip, bala-şağamızben 3 bölmeli üyde 17 jılday twrdıq,  tabıs mardımdı bolmağasın onı keñeyte de, jöndey de almadıq. Bertin kele ol da apattı jağdayğa tap boldı. Jergilikti jerde baspana kezegine twrğanımızben, zañ talaptarına say jaqın arada qol jetkizu mümkin bolmadı.  Bizdiñ osı mwqtajdığımız «Bibi-Ananıñ» nazarına iligip, minekey, jerles apamızdıñ arqasında san jıldar boyğı otbasılıq armanımızdıñ orındalğan sätine kuä bolıp otırmız, - deydi quanışın jasıra almağan otanası, «Altın alqa» iegeri Bağila Bekişova.

Aldabergen ağay men Bağila apay ömirge 7 qız, bir wl ömirge äkelip, olardan büginde 15 nemere süyip otır. Kenjesi Gülşat - İ toptağı tua bitti mügedek. Jalğız wlı Sağınıştıñ jüregine ota jasalğan, auır jwmısqa jaramsız. Bağila apaydıñ da densaulığındağı kinäratına baylanıstı İİİ toptağı mügedektik tağayındalğan. Äzirge bwl äuletke kiretin twraqtı kiris közi osı eki sanatpen beriletin järdemaqılar ğana.

- Şükirşilik etemin. Eñ bastısı, baspanağa qol jetkizdik. «Jaqsınıñ jaqsılığın ayt, nwrı tasısın» demekşi, zäulim üy alıp bergen Bibigül  apağa, ötinişimizdi rettep, jağdayımızdı eskergen audan basşılarına otbasımızdıñ atınan şınayı alğısımızdı bildiremiz. Barşasınıñ denderine saulıq, isterine bereke bersin! - deydi riza keyippen köp balalı ana Bağila.

Degenmen jwmıssızdıq mäselesi bwl şañıraqtıñ da bosağasınan sığalap twr. Balalardıñ işinde diplomdarı bar bir-ekeui: «Bizge endi twraqtı jwmıs bolsa eken...» degen tilegin aytıp qaldı. Arbağa tañılğan kenjesin bağıp-qağatın anaları «otbasımızğa tamşıday bolsa da kiris bolsın», dep soñğı kezde tarı salıp satudı käsipke aynaldırğan. Auladağı keñ qazan üyde tarı quırıp, tüyip, eleuge üydegi balalardıñ barlığı kömektesip jatqanına biz de kuä boldıq.

- Qayırımdılıq jasap, bir-birimizdi demep, jığılğanğa tayanış bolu - ärkimniñ de qolınan keletin is. Ol üşin adamğa aldımen peyildiñ keñdigi, jürektiñ jomarttığı qajet. Bekişovter äuletine alıp bergen bwl üydiñ qarjısı özimniñ jıldar boyğı halıqqa qayta basılıp, taratıp kele jatqan «Tauqımet» romanınıñ taza qalamaqısınan qwraldı. Qayırımdılıqtıñ qadir-qasietin körip, sanama tüyip ösken adammın. Küni boyı arbada otırsam da qol-ayağı bütinderden qalmauğa tırısıp, mäñday tiregenge şama-şarqımşa kömektesudi parız sanaymın. Biraq istegen jaqsılıqtı jipke tizip jarnamalaytındardıñ sortınan emespin. Olay tize bersem köp qoy... Osı kezge deyin özim tağdırlas 580-dey balanıñ joğarğı oqu ornına tüsuine septesken ekenmin. Bwl - bir ğana mısal! Mağan halıqtıñ alğısınan artıq bağa joq. Kişisi sıylap,ülkenderi batasın berip jatadı,  qwrmettiñ osı türinen özim quat alamın, - deydi bizben telefon arqılı tildesken Bibigül Qabiqızı.

«Bibi-Ana» prezidentiniñ elimizdiñ är aymağında twratın şın mwqtajdarğa jasap jatqan kömegi köp. Endi tuğan jeri Şalqar qalasınıñ ortalığınan mügedek balalardı sauıqtıru ortalığın saludı  közdep otır.

Mwhtar Mırzalin

Aqtöbe oblısı,

Şalqar audanı

Abai.kz

1 pikir