Särsenbi, 23 Qazan 2019
Bizdiñ şeneunik 3285 0 pikir 2 Qırküyek, 2014 sağat 14:22

Ata Zañımız ayaq astı etildi

    Egemen elimiz üşin Konsituciya küni merekesiniñ ornı erekşe. Onıñ Ata Zañ ataluı mwnıñ barlıq zañdardan joğarı twruında ğana emes, sonday-aq qazaq eliniñ özgelermen terezesi teñ täuelsiz memleket ekendigin äygileytin sayasi qwjat ekendigine de eşkim şäk keltire almas. Onıñ saltanat qwruı bärimizdiñ de saltanat qwruımız dep tüsingen läzim.

     Alayda, bir ökiniştisi, keyingi kezderi mwnıñ qadir-qasietin, salmağı men ornın dwrıs bağalay almay jürgendigimiz de aşı şındıq. Mwnıñ naqtı bir körinisi—Konstituciya künin käduilgi merekelerdiñ deñgeyine deyin qwldıratıp jibergenimizde. Özge jerlerdi bilmeymin, al bizdiñ Qostanayda mwnı tipti bası artıq merekelerdiñ biri retinde sanaytındığına tipti de köñil audarmaytın boldıq. Jergilikti basşılar bwl merekeni bir sarındı etip, «äyteuir ötse boldı ğoy» deytin piğılmen qaraytın sekildi. Jıl sayın bir sarındılıq. Mereke aldında filarmoniya sarayında saltanattı jinalıs ötedi. Oblıs äkimi jetistikterdi jipke tizgendey etip, wzaq-sonar bayandama jasaydı. Soñınan bireulerdi marapattağan boladı. Al däl mereke küni qala ortalığında qalıptasqan scenariy boyınşa koncert ötedi. Sonımen is tamam. Oblıs pen qala basşıları bir mindetten qwtılğanday bolıp, «üh» dep bir demaladı.

    Biılğı Konstituciya küni merekesi nemqwraydılıq jağınan bwrınğısınan tipti de asıp tüsti. Bwl merekege Qostanay qalası küniniñ merekesi qabattasıp kelip, Ata Zañımızdı ayaq astı etkendey boldı. Oblıs pen qala basşıları Qostanaydıñ meyramın üş kün boyı toylaymız dep Konstituciya künine qam jasaudı wmıtıp ketken sıñaylı. Bwrın bwl mereke küni qay jerde qanday şaralar ötkiziletindigi jaylı jergilikti baspasözde aldın-ala habarlanuşı edi. Bwl jolı toy toylaymın dep jürip tars esinen şığarıp alğan sıñaylı. Qala halqı bolsa, jıldağı ädetpen qala ortalığına kündizgi sağat 10.00-de jinalğan edi. Konstituciya künine arnalğan şağın koncert jwrttı eki sağat boyı sarğaytıp barıp sağat 12.00- de äzer bastaldı. Äri-säri küy keşken qalalıqtardıñ tözimi tausılıp, birazı üylerine qaray ayañdadı. Minekey, Konstituciya künin qostanaylıqşa toylaudıñ «dästüri» osınday.

   Oypıray deysiñ, baytaq elimizdiñ özge öñirlerindegi osı mereke qarsañında atqarılıp jatqan igi isterdi estigende jigeriñ qwm boladı eken. Bir oblısta jaña mektepter boy köterse, ekinşisinde Ata Zañımızğa arnalğan tamaşa forum ötkiziledi, ap üşinşi jerde jüzdegen büldirşinder Elwrandı şırqap, jüregiñdi eljiretedi.

     Al bizdi Konstituciya küni qarsañında jıldağı dästürmen bard änderiniñ festivalı ötedi. Oblıs äkimi Nwralı Säduaqasovtıñ osı önerdi erekşe bağalaytındıqtan jwrttıñ bäriniñ taylı-tayağı qalmay soğan asığadı. Negizinen oğan körşi Reseydiñ bard änşileri şaqırılıp, änder orıs tilinde şırqalatındıqtan bılayğı jwrttıñ qwdayı berip qaladı. Jastıq şağın eske alğan äkimimiz de bwdan eş uaqıtta şet qalmaydı. Gitaramen qosılıp, özi de biraz äu deydi, Mwndayda qaydağı bir Konstituciya küni degen ne täyiri. Sol da söz bolıp pa?

    Şındap kelgende bizdegi ideologiya salasına jauap beretin lauazımdı jandardıñ tım kelte oylaytındığına, dayın närseni ötkizuden basqağa aqılı jete bermeytin tayazdığına tañ qalasıñ. Mäselen, osınıñ aldında ötken qala küninde bir top adamğa «oblıstıñ qwrmetti azamatı» degen atağı darday ataq berildi. Mine, osı marapattaudı nege däl osı Konstituciya künine oray oylastırmasqa? Sonda ana Çernış, Dvureçenskiy sekildi azamattar bwl ataqtı egemen eldiñ Konstituciyası özgelermen teñ därejede ğana emes, keybir eñbegi olardan da kem emes jandardan artıq sanap otırğandığın seziner me edi qayter edi? Tipti osı jağdayattı qadap twrıp aytsa da artıq emes. Qanşa degenmen özge wlt ökilderiniñ tınış ta baquattı ömir sürip otırğandığı osı Konstituciyamızdıñ arqası emes pe? Osı twjırım basa aytılsa, mümkin osındağı keybir öktemsigenderdiñ jüni jığılar ma edi.

     Ätteñ, mwnı oylaytın äkim-qara qayda?

Mwratbek Däurenwlı.

Qostanay.

 

Abai.kz

0 pikir