جۇما, 29 ناۋرىز 2024
قوعام 6416 11 پىكىر 11 قازان, 2019 ساعات 11:28

قىتايتانۋشى سىروەجكين دەگەن كىم؟

ۇلتتىق قاۋىپسىزدىك كوميتەتى (ۇقك) "مەملەكەتكە وپاسىزدىق جاسادى" دەپ ايىپتالعان قىتايتانۋشى كونستانتين سىروەجكينگە سوت ۇكىمى شىققانىن راستادى.

"2019 جىلى 7 قازاندا الماتى قالالىق مامانداندىرىلعان اۋدانارالىق قىلمىستىق ىستەر جونىندەگى سوت كونستانتين لۆوۆيچ سىروەجكيندى "مەملەكەتكە وپاسىزدىق جاساۋ" (175-باپ، 1-ءبولىم) بابى بويىنشا كىنالى دەپ تانىپ، 10 جىلعا سوتتادى" دەلىنگەن ۇقك-ءنىڭ 10 قازان كەشكە قاراي تاراتقان حابارلاماسىندا.

قازاقستانداعى تانىمال قىتايتانۋشى-عالىمنىڭ سوتتالعانى تۋرالى اقپاراتتى العاش رەت 9 قازاندا Liberty قۇقىق قورعاۋ ۇيىمىنىڭ جەتەكشىسى عالىم اعەلەۋوۆ Facebook پاراقشاسىندا حابارلاعان.

ول سىروەجكيننىڭ قازاقستان ازاماتتىعىنان ايرىلعانىن دا جازعان. بىراق ۇقك حابارلاماسىندا ازاماتتىققا بايلانىستى مالىمەت ايتىلمايدى. عالىم اعەلەۋوۆتىڭ جازۋىنشا، سىروەجكين تاعىلعان ايىپتى مويىنداماعان جانە "بيلىكتىڭ ار-ۇياتى ءبىلسىن" دەپ اپەللياتسياعا شاعىم بەرۋدەن باس تارتقان.

بۇعان دەيىن الماتى قالالىق سوتى "بۇل ىستە مەملەكەتتىك قۇپيا بار" دەپ اقپارات بەرۋدەن باس تارتقان ەدى. ءاۋ باستان سىروەجكيننىڭ ءىسى جابىق ءجۇردى.

ونىڭ اقپان ايىندا قاماۋعا الىنعانى مامىر ايىندا عانا بەلگىلى بولدى. ۇقك سىروەجكين "مەملەكەتكە وپاسىزدىق جاسادى" دەگەن ايىپپەن 19 اقپاننان بەرى قاماۋدا وتىرعانىن حابارلادى. سول كەزدە سىروەجكيننىڭ ازاماتتىعى جايلى سۇراقتار دا تۋىنداعان. بىراق رەسمي ورگاندار ول تۋرالى جەتكىلىكتى اقپارات بەرمەگەن.

امەريكالىق Wall Street Journal گازەتى 10 شىلدەدە دەرەككوزدەرىنە سىلتەمە جاساپ، «سىروەجكين اقشالاي سىياقىعا قىتايعا قۇپيا قۇجات ساتۋى مۇمكىن» دەگەن اقپارات تاراتقان. Wall Street Journal قىتاي بيلىگىنىڭ سىروەجكين ءىسىن «جوقتان بار جاساۋ» دەپ سيپاتتاعانىن ەسكەرتكەن. باسىلىم سىروەجكيننىڭ قازىرگى پرەزيدەنت قاسىم-جومارت توقاەۆ پرەمەر-مينيستر بولىپ تۇرعاندا قىتاي ماسەلەسى بويىنشا كەڭەسشىسى بولعانىنا نازار اۋدارعان.

مامىردا قازاقستاننىڭ بىرنەشە زەرتتەۋشىسى توقاەۆتان بۇل ءىستى باقىلاۋىنا الۋدى، سىروەجكيندى ۇيقاماققا بوساتۋدى سۇراعان. بىراق توقاەۆتىڭ زەرتتەۋشىلەر حاتىنا جاۋاپ بەرگەنى نەمەسە بەرمەگەنى بەلگىسىز.

سسسر مەملەكەتتىك قاۋىپسىزدىك كوميتەتىنىڭ جوعارى مەكتەبىن بىتىرگەن 62 جاستاعى كونستانتين سىروەجكين - قازاقستاندا قىتاي ماسەلەلەرى بويىنشا بەلگىلى ساراپشىلاردىڭ ءبىرى. ورىس، اعىلشىن جانە قىتاي تىلىندە جارىق كورگەن مىڭنان استام ماقالانىڭ اۆتورى. 2006 جىلدان قازاقستان پرەزيدەنتى جانىنداعى ستراتەگيالىق زەرتتەۋلەر ينستيتۋتىنىڭ باس عىلىمي قىزمەتكەرى.

2017 جىلى قازاقستان "تەرروريستىك قىلمىستار جاساعانى ءۇشىن، سونداي-اق قازاقستان رەسپۋبليكاسىنىڭ ومىرلىك ماڭىزى بار مۇددەلەرىنە وزگە دە اۋىر زيان كەلتىرگەنى ءۇشىن" ازاماتتىعىنان ايىرۋ تۋرالى زاڭ نورماسىن ەنگىزگەن. بۇعان دەيىن زاڭنىڭ بۇل نورماسى بويىنشا قانداي دا ءبىر ادامنىڭ ازاماتتىقتان ايىرىلعانى جايلى اقپارات بولماعان.

Abai.kz

11 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1578
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2276
عيبىرات

قايسار رۋحتى عازيز جان

مۇحتار قۇل-مۇحاممەد 3594