قىزىلورداداعى «مۇز ايدىنى» سپورت كەشەنىندە ۆولەيبولدان ارداگەرلەر اراسىندا «قورقىت  بابا» كۋبوگىنا ارنالعان حالىقارالىق ءتۋرنيردىڭ اشىلۋ سالتاناتى ءوتتى. سايىسقا رەسەي، وزبەكستان مەملەكەتتەرى مەن الماتى، شىمكەنت، بايقوڭىر قالالارىنان جانە تۇركىستان، جامبىل وبلىستارى مەن سىر ەلىنەن  7 كوماندا، 55 جاستان جوعارى 100 جۋىق ارداگەر قاتىسۋدا. 

سونداي-اق،  جارىستىڭ قۇرمەتتى قوناقتارى - قر گەنەرال لەيتەنانتى شاردارباەۆ امانكەلدى سماعۇلۇلى، قازاق ۇلتتىق اگرارلىق ۋنيۆەرسيتەتىنىڭ رەكتورى ەسپولوۆ تلەكتەس يسابايۇلى ارنايى كەلدى.

ءتۋرنيردىڭ اشىلۋ سالتاناتىنا قىزىلوردا وبلىسىنىڭ اكىمى قۋانىشبەك دوسمايىلۇلى قاتىسىپ، سايىسقا قاتىسۋشىلارعا ساتتىلىك تىلەدى.

ايتا كەتەيىك، قىزىلوردا وبلىسىندا قورقىت اتانى الەمدىك دەڭگەيدە تانىتۋعا بايلانىستى كوپتەگەن شارالار اتقارىلۋدا. 2006 جىلدان بەرى «تۇركسوي» حالىقارالىق ۇيىمىمەن بىرلەسىپ تۇركىتىلدەس ەلدەردىڭ حالىقارالىق «قورقىت جانە ۇلى دالا سازى» فولكلورلىق-مۋزىكالىق ونەر فەستيۆالىن وتكىزۋ داستۇرگە اينالدى. جاقىندا عانا بەسىنشى رەت ۇيىمداستىرىلدى. قارماقشى اۋدانىنداعى قورقىت اتا كەسەنەسى ەلباسى تاپسىرماسىمەن 2015 جىلى قايتا جاڭعىرتىلىپ، «قورقىت اتا زيارات ەتۋ ورتالىعى» قوسا سالىندى، كەشەن  «ەكسپو-2017» بۇكىلالەمدىك كورمەسى نىساندارىنىڭ ءبىرى رەتىندە تانىلىپ، سان مىڭداعان تۋريستەر كەلدى. 

«ءوڭىرىمىز ءۇشىن دە، ەلىمىز ءۇشىن دە ەڭ ماڭىزدىسى - 2018 جىلى 28 قاراشادا ماۆريكي رەسپۋبليكاسىندا وتكەن يۋنەسكو-نىڭ 13-سەسسياسىندا قورقىت اتا رۋحاني مۇرالارى بىرىككەن ۇلتتار ۇيىمى جانىنداعى يۋنەسكو-نىڭ عالامدىق ماتەريالدىق ەمەس مۇرالار تىزىمىنە ەندى.  بۇل جۇمىستاردىڭ جۇزەگە اسۋىندا وبلىستى التى جىلدان اسا ابىرويمەن باسقارعان مەملەكەت جانە قوعام قايراتكەرى قىرىمبەك ەلەۋۇلى كوشەرباەۆتىڭ ۇلەسى زور ەكەنىن ايتۋىمىز كەرەك. مىنە، بۇگىن سىر وڭىرىندە ءتۇرلى سالادا قىزمەت ەتكەن ارداگەرلەر اراسىندا العاش رەت جارىس ۇيىمداستىرىلىپ وتىر. بۇل جارىس اعا بۋىننىڭ جاستارعا كورسەتكەن ۇلگىسى ءارى بۇقارالىق سپورتتى دامىتۋدىڭ ەرەكشە ءتاسىلى دەپ تۇسىنەمىز»،-دەدى ايماق باسشىسى.

ءتۋرنيردىڭ اشىلۋ سالتاناتى كونتسەرتتىك باعدارلامامەن جالعاستى.

Abai.kz