بەيسەنبى, 22 قازان 2020
COVID-19 قازاقستاندا. جۇقتىرعاندار — 109907. جازىلعاندار — 105385. قايتىس بولعاندار — 1796
جاڭالىقتار 1662 5 پىكىر 30 قىركۇيەك, 2019 ساعات 12:21

21 مىڭ تەڭگە جاردەماقى العان وتباسىنىڭ ەكى كومپانياسى بار بوپ شىقتى

21 مىڭدى حالىققا جاپپاي تاراتقان ۇكىمەت ەندى قۇجات جۇزىندە كىرىسى اسىپ كەتكەندەردىڭ اقشاسىن سوتپەن قايتارۋدى شىنداپ قولعا الىپ جاتىر. قاراعاندىداعى سونداي تەكسەرىستەردە جىل سايىن ميلليونداپ سالىق تولەپ وتىرعان وتباسى جاردەماقى الىپ كەلگەنى انىقتالدى. ءتورت بالاسىنا 85 مىڭ تەڭگە العان اۋلەتتىڭ اتىندا ەكى كومپانيا تىركەلگەن ەكەن. ال قاراعاندىنىڭ جۇمىسپەن قامتۋ ورتالىعى وتباسىنىڭ از قامتىلعان اۋلەتتىڭ قاتارىنا جاتپايتىنىن الەۋمەتتىك جەلىدەن كورىپتى.

بۇل تۋرالى 31 ارنا حابارلايدى.

اتاۋلى الەۋمەتتىك كومەكتى 2 اي بويى الىپ كەلگەن ارداق جاقانوۆا كەڭ سارايداي ءزاۋلىم كوتتەدجدە تۇرادى ەكەن. ەكى قاباتتى كوتەدج كۇيەۋى جانبولات قارجاۋوۆتىڭ اتىندا رەسمي تىركەلگەن. مۇنان وزگە، 4 بالالى وتباسىنىڭ اتىندا ەكى جەكەمەنشىك كومپانيا بار. جانبولات قارجاۋوۆتىڭ ءوزى ءزاۋلىم ۇيدە تۇراتىنىن راستاپ وتىر.

ەكى بىردەي بيزنەستىڭ يەسى جىل سايىنعى سالىق تولەمدەرىن ەشكىمنەن جاسىرماعان. اشىق دەرەككوزدەرىنەن كاسىپكەردىڭ ءار جىلداردا مەملەكەت قازىناسىنا ميلليونداپ اقشا اۋدارعانىن ەش قيىندىقسىز انىقتاۋعا بولادى. دەگەنمەن 4 بالاسى ءۇشىن مەمەلەكەتتەن الىپ كەلگەن 85 مىڭ تەڭگەدەن وڭايلىقپەن باس تارتقىسى جوق. اقشانىڭ ارتىعى جوق دەگەن جانبولات قارجاۋوۆ الەۋمەتتىك كومەكتى توقتاتىپ تاستاعانداردى سوتقا بەرەمىن دەپ وتىر.

«ۇلكەن ءۇي – شەشەمنىڭ كوتتەدجى. بىراق مەنىڭ اتىمدا. ەگەر كومەكتى توقتاتسا، مەن سوتقا بەرىپ، سونى دالەلدەيمىن. بەرسەم، دالەلدەگەننەن كەيىن عانا ءوزىم باس تارتامىن. دالەلدەۋگە تىرىسامىن»، — دەيدى قارجاۋوۆ.

Pk.uchet.kz سايتىندا جانبولات جەتەكشىلىك ەتەتىن كومپانيالاردىڭ بىرىنەن تۇسەتىن سالىق كولەمى 4 جىلدا 2 ميلليوننان باستاپ، 17 ميلليون تەڭگەدەن اسىپتى. ماسەلەن، كاسىپكەر بيىل 4 ملن 904 مىڭ 900 تەڭگە سالىق تولەگەن. ال ەكىنشى كومپانياسى ءۇشىن سوڭعى 3 جىلدا 8 ملن تەڭگەگە جۋىق سالىق تولەگەن.
دەسە دە جانبولات قارجاۋوۆ ەكى كومپانيانىڭ دا جاعدايى مۇشكىل ەكەنىن ايتىپ وتىر. ءتىپتى، ءبىرى بانكروتقا ۇشىراعان. سول ءۇشىن جۇبايىنا تيەسىلى كولىكتى دە ساتۋىنا تۋرا كەلىپتى.

ال ادەتتە جاسىرىن تابىستى مۇدىرمەي انىقتايتىن جۇمىسپەن قامتۋ ورتالىعى بۇل جولى كوپبالالى وتباسىنىڭ تابىسىن كورمەي قالدىق دەيدى. ارداق جاقانوۆا قۇجات تاپسىرعاندا ءوزىنىڭ ايلىعى 50 مىڭ تەڭگە، جولداسى 60 مىڭ تەڭگە الاتىنىن كورسەتكەن. ورتالىق ماماندارى وتباسىنىڭ مولشىلىقتا وتىرعانىن الەۋمەتتىك جەلىدەن كورگەن.

«ءبىزدىڭ بازادا ادامنىڭ قانداي دا ءبىر قوسىمشا اۆتوكولىگى بار ما، شوتىندا ميلليونداعان اقشاسى بار ما نەمەسە اتىندا باسقا دا تۇرعىن ۇيلەر بار ما، مۇنداي مالىمەتتەردى كورە المايمىز»، — دەيدى قالالىق جۇمىسپەن قامتۋ ورتالىعى باسشىسىنىڭ ورىنباسارى باقىتنۇر ءتولىپوۆا.

ەندى ەكى اي بويى 85 مىڭ تەڭگەدەن العان كوپبالالى وتباسى اقشانى ۇكىمەتكە قايتارۋى مۇمكىن. جۇمىسپەن قامتۋ ورتالىعىنىڭ ماماندارى 170 مىڭ تەڭگەنى ءوندىرىپ الۋ ءۇشىن سوتقا ارىز تۇسىرگەن.

Abai.kz

5 پىكىر